पीएम मोदी न करी चालक रहित मेट्रो कु उद्घाटन
प्रधानमंत्री नरेन्द्र मोदी न आज दिल्ली मेट्रो की ‘मेजेंटा लाइन’ पर भारत की पैली चालक रहित मेट्रो कु उद्घाटन करी. दगड़ा मां ही ‘एयरपोर्ट एक्सप्रेस लाइन’ पर ‘नेशनल कॉमन मोबिलिटी कार्ड’ सेवा भी शुरू करे गी. मोबिलिटी कार्ड’ सेवा से देश का कै भी हिस्सा मा ‘रुपे-डेबिट कार्ड’ का इस्तेमाल से यात्रा करे जै सकदी.
गह मंत्री न करी प्रतिमा कु अनावरण
गृह मंत्री अमित शाह न आज दिल्ली का फिरोजशाह कोटला मैदान मां दिवंगत भाजपा नेता अरुण जेटली की प्रतिमा कु अनावरण करी. जेटली की ई प्रतिमा थै 96 साल का जांणा मण्या शिल्पकार राम सुतार न तैयार करी. सुतार न ही गुजरात मा 'स्टैच्यू आफ यूनिटी' कु भी निर्माण करी.
रेल यात्र्यूं थै बड़ी खुशखबरी
रेल यात्र्यूं थै बड़ी खुशखबरी च. भारतीय रेलवे न यात्र्यूं की सुविधा थै ध्यान मा रखी कई ट्रेनुं कु विस्तार कन्नौ फैसला करी. भारतीय रेलवे का मुताबिक यूं ट्रेनुं कु परिचालन समय बढैं की 31 दिसंबर से 31 जनवरी करे गी.
उत्तराखंड मां कोरोना कु कहर
उत्तराखंड मां कोरोना कु कहर लगातर बढ़दू ही जांणु च. ब्याली प्रदेश मां कोरोना का 427 नया मामला समणि एनी. जैका का बाद प्रदेश मा कोरोना संक्रमितुं की संख्या 89,645 पौंछि गी. जबकि यां से मन्न वालौं की संख्या 1483 ह्वे गी. कोरोना का बढदा मामलों से सरकार और स्वास्थ्य विभाग चिंतित च.
दिल्ली का एम्स मा भर्ती ह्वे सीएम
मुख्यमंत्री त्रिवेंद्र सिंह रावत थै दिल्ली का एम्स मा भर्ती करये गी. आज सुबेर तक सीएम त्रिवेंद्र रावत दून मेडिकल कॉलेज मा भर्ती छा. उंका फिजिशियन डॉक्टर एनएस बिष्टै सलाह पर सीएम थै दिल्ली रेफर करे गी. वखी पूर्व मुख्यमंत्री हरीश रावत और केंद्रीय शिक्षा मंत्री रमेश पोखरियाल निशंक न सीएम का जल्द टीक होंणै कामना करी.
कांग्रेसन मनै 136 वु स्थापना दिवस
प्रदेश कांग्रेस मुख्यालय मा आज कांग्रेस कार्यकर्ताउं न पार्टी कु 136 वुं स्थापना दिवस मनै. ये दौरान कांग्रेस भवन मा प्रदेश अध्यक्ष प्रीतम सिंह न झंडारोहण करी. जैका बाद कांग्रेस प्रदेश मुख्यालय बटी एक तिरंगा यात्रा निकले की. अध्यक्ष प्रीतम सिंह का नेतृत्व मा निकली तिरंगा यात्रा सैकड़ों कांग्रेस कार्यकर्ता शामिल ह्वेन.
विधानसभा अध्यत्र न रुकै काम
विधानसभा अध्यक्ष प्रेमचंद अग्रवाल न आज आस्था पथ का सुमानी घाट पर बाढ़ सुरक्षा कार्युं कु जायजा लिनी. ये दौरान विधानसभा अध्यक्ष न निर्माण कार्य मां मानकुं की अनदेखी मिली. जैका बाद उंन मौके बटी ही सिंचाई विभाग का अधीक्षण अभियंता थै फोन करी काम रुकौणा आदेश दिनी.
बरखा और बर्फबारी
प्रदेश का कई इलाकुं मा आज सुबेर बटी बरखा और बर्फबारी कु दौर जारी च. जैका कारण यख ठंड बढ़ गी. धनौल्टी, मसूरी मा आज बर्फबारी ह्वे. जैका बाद यख पर्यटक औंण लग्या छन. बर्फवारी का बाद स्थानीय व्यापार्यूं का चेहरों पर चमक ए गी.
आयुर्वेदिक अस्पतालुं मा अब योग कक्षा संचालित
उत्तराखंड का सरकारी आयुर्वेदिक अस्पतालुं मां अब आयुर्वेदिक दगड़ि योग कक्षा भी संचालित किये जाली. केंद्र सरकार की आयुष्मान भारत योजना का तहत कुमाऊं मंडल का 23 आयुर्वेदिक अस्पतालुं थै याकुं चिन्हित करे गी. यू आयुर्वेदिक अस्पतालुं मां उधम सिंह नगर का 6, अल्मोड़ा का 6, नैनीताल का 4, चंपावत का 4, पिथौरागढ़ का 2 और बागेश्वरौ एक अस्पताल च.
मंगलौर मिल में फायरिंग का वीडियो वायरल
मंगलौर कोतवाली क्षेत्र की उत्तम शुगर मिल मा द्वी दिन पैली किसानु न फायरिंग करी छै. जै कु एक वीडियो सोशल मीडिया पर तेजी से वायरल होणू च. वायरल वीडियो मा किसान ट्रैक्टर-ट्रॉली पर बैठी खुलाआम फायरिंग कन्नू च. पुलिस न ये मामला मा 7 लोखु का खिलाफ मुकदमा दर्ज करेली. दगड़ा मा एक थै गिरफ्तार करी तमंचा और कारतूस भी बरामद करेली.
