अपणुं उत्तराखंडः दिनभरै खास खबर, एक नजर मा

उत्तरकाशी हिमस्खलन मा 7 पर्वतारोहियों क मौत. उत्तराखंड दौरा पन राजनाथ सिंह. तोड़ी ग्याई हाकम क रिजॉर्ट. हरक न मांगी प्रेमचंद कु इस्तीफा. ईनी बड़ी दिनभरै खास खबर, एक नजर

उत्तरकाशी हिमस्खलन मा 7 पर्वतारोहियों क मौत: उत्तराखंड क सीमांत जनपद उत्तरकाशी मा द्रौपदी का डांडा 2 (Draupadi ka Danda) पर्वत चोटी क पास मंगलवार सुबेर भारी हिमस्खलन ह्वै ग्याई. ये मा नेहरू पर्वतारोहण संस्थान क 40 पर्वतारोहियों कु दल फंसी ग्याई. खबर लिखी जाण तक 7 शव बरामद ह्वै गेन जबकि 8 पर्वतारोहियों कु सुरक्षित रेस्क्यू ह्वै ग्याई च. अबी तक 25 लोग लापता बताया जाणा छन. बचाव और राहत कार्यों कु लेकी वायुसेना न द्वी चीता हेलीकॉप्टर तैनात किया छन. NDRF, SDRF, प्रशासन सबी बचाव कार्यूं मा लग्यां छन. अबी भारी बर्फबारी कु कारण रेस्क्यू अभियान रोकी दे ग्यै च.

उत्तराखंड दौरा पन राजनाथ सिंह:केंद्रीय रक्षा मंत्री राजनाथ सिंह उत्तराखंड क द्वी दिवसीय दौरा पन आज देहरादून पौंचिन. राजनाथ सिंह आज देहरादून मा रक्षा मंत्रालय क निजी कार्यक्रम मा शामिल ह्वाल. आर्मी गेस्ट हाउस मा रात्रि विश्राम क बाद ऊ सुबेर चमोली स्थित बदरीनाथ धाम पौंचला. ये कै बाद चीन सीमा पर स्थित अग्रिम चौकी पर सेना अर आईटीबीपी क जवानों दगड़ी विजयदशमी पर्व मनाल.

तोड़ी ग्याई हाकम क रिजॉर्ट: उत्तराखंड अधीनस्थ सेवा चयन आयोग पेपर लीक क बड़ू आरोपी हाकम सिंह क तहसील मोरी क सिदरी गांव मा बण्यूं रिजॉर्ट कु आज प्रशासन की टीम न तोड़ी. रिजॉर्ट पर बुलडोजर चलाण से पैली ग्रामीणों न ये कार्रवाई क विरोध कौरी. ये दौरान हाकम सिंह की पत्नी बिसौली देवी न प्रशासन की टीम क समणि रिजॉर्ट ध्वस्त न कन की गुहार लगैई. काफी समझाण क बाद ग्रामीणों न खुद ही रिजॉर्ट पर लग्यां खिड़की, दरवाजा, छत, फर्नीचर अर लकड़ी क नक्काशीदार खंबा सहित अन्य सामान तैं निकाली कन सुरक्षित कर देऊ. वैका बाद प्रशासन क टीम न आलीशान रिजॉर्ट कु ढांचे पन बुलडोजर चलै कन वै ते गिरै देई.

हरक न मांगी प्रेमचंद कु इस्तीफा:उत्तराखंड विधानसभा बैक डोर भर्ती घोटाले कु लेकी पूर्व कैबिनेट मंत्री अर वरिष्ठ कांग्रेसी नेता हरक सिंह रावत न प्रतिक्रिया देई. उन्होंन बोली कि नैतिकता कु आधार पन विधानसभा भर्ती घोटाला मामला मा तत्कालीन विस अध्यक्ष प्रेमचंद अग्रवाल तैं खुद ही मंत्री पद बिटीं इस्तीफा दे देण चियांद. उन्होंन बोली कि प्रेमचंद अग्रवाल न युवाओं कु हक छीनी च. अर ये उत्तराखंड क दुर्भाग्य च कि प्रेमचंद अग्रवाल अबी भी मंत्री पद पर छन.

प्रशासनिक अधिकारी पन लगी छेड़छाड़ क आरोप:दिल्ली सरकार मा तैनात प्रशासनिक अधिकारी एवी प्रेमनाथ पन नाबालिग दगड़ी छेड़छाड़ कु आरोप लगी च. दिल्ली निवासी 17 साल की नाबालिग लड़की न अधिकारी पन छेड़छाड़ कु आरोप लगाई च. आरोपी अधिकारी एवी प्रेमनाथ क अल्मोड़ा का गोविंदपुर स्थित डंडाकांडा मा एक स्कूल च. ये स्कूस मा ई लड़की कुछ महीना पैली आई छै, वै दौरान अधिकारी पन छेड़खानी अर दुराचार क प्रयास कन कु आरोप च. लड़की क परिजनों ने डीएम कु तहरीर देई, जैका बाद आरोपी कु खिलाफ राजस्व पुलिस न मुकदमा दर्ज कौरी च.

रावण कु किरदार पन संत नाखुश:ओम राउत निर्देशित फिल्म 'आदिपुरुष' क टीजर जारी होण क बाद बिटीं फिल्म क विरोध शुरू ह्वै ग्याई. अभिनेता सैफ अली खान न फिल्म मा रावण कु अहम किरदार निभै च, पर रावण कु किरदार कु लेकी अखाड़ा परिषद भड़क ग्यै च. अखाड़ा परिषद अध्यक्ष रविंद्र पुरी न यै ते हिंदू विरोधी बतै च. उन्होंन बोली कि सबी संत फिल्म क शूटिंग स्थल भोपाल जाला अर जूता फेंकी कन विरोध जताला.

किसान महापंचायत कु आयोजन:उधमसिंह नगर जनपद क किच्छा इंटरार्क फैक्ट्री कु भैर आयोजित मजदूर किसान महापंचायत मा आज भारतीय किसान यूनियन कु नेता राकेश टिकैत न श्रमिकों तैं समर्थन देई. उन्होंन बोली कि श्रमिक पिछला 400 दिनों बिटीं मांगों कु लेकी धरना पर बैठ्यां छन, पर ऊं की समस्या कु हल अबी नी ह्वै पाई च. उन्होंन बोली कि जब तक श्रमिकों कु ऊं का हक नी मिलदू तब तक आंदोलन चलदू रैलू. वखी अंकिता भंडारी हत्याकांड पर राकेश टिकैत न बोली कि भ्वाल ऊ अंकिता क परिजनों दगड़ी मुलाकात करला.

फिर हनी ट्रैप मा फंसी सेना कु जवान: हनी ट्रैप मा फंसी कन पाकिस्तान की एक महिला तैं सेना की जानकारी भेजन वालु रुड़की बीईजी मा तैनात अकाउंटेंट इमामी खान पर पुलिस न मुकदमा दर्ज कौरी च. इमामी खान आगरा उत्तर प्रदेश क रैण वालु च. वैतेई 15 दिन पैली रुड़की बीईजी दगड़ी अटैच कौरी ग्यै छै. इमामी खान न मई से 20 जून तक पाकिस्तान मा बैठी एक महिला तैं करीब 230 मैसेज भेजी छन. ये बात की जानकारी होण पन मेरठ बिटीं सेना क अधिकारियों की एक टीम रुड़की पौंची अर अकाउंटेंट क मोबाइल की जांच कौरी. वैका मोबाइल जब्त कर लेई ग्यै च.

नेशनल हाईवे 74 पन दर्दनाक हादसा: नेशनल हाईवे 74 पर पंचक्की किच्छा क पास बाइक सवार मां-बेटा अर दादी तेज रफ्तार रोडवेज बस की चपेट में ऐ ग्येन. शक्तिफार्म निवासी गोविंद सिंह अपणी दादी क आंख कु ऑपरेशन करै कन मां अर दादी तैं बाइक पर बैठे कन घर लौटणु छै, तबी बीच रास्ता मा एनएच 74 पंचक्की किच्छा कु पास रोडवेज बस का चपेट में आण से दादी की मौका पन ही मौत ह्वै ग्यै, जबकि गोविंद और वैकी मां घाय छन. ड्राइवर बस सहित फरार च.

नजीबाबाद हाईवे पन 3 लोगूं की मौत:हरिद्वार क श्यामपुर थाना क्षेत्र मा नजीबाबाद हाईवे पन गेंड़ीखाता कु पास कार दुर्घटना मा एक महिला दगड़ी 3 लोगूं की मौका पर ही मौत ह्वै ग्याई. हरिद्वार से नजीबाबाद कु रास्ता मा एक कंटेनर क पिछणे बिटीं कार की टक्कर ह्वै ग्याई. पुलिस कु वाहन काटण पड़ी तब जैकन कार बिटीं शवों कु निकाली जै सकी. तीनों वैगनआर कार सवार बिजनौर की ओर जाणा छै. मृतकों की पहचान प्रमोद (38 वर्ष), वैका पत्नी नीतू (35 वर्ष) अर साला रोहित (32 वर्ष) का रूप मा ह्वाई च.