अपणुं उत्तराखंडः दिनभरै खास खबर, एक नजर मा

बागेश्वर मा CM धामी न करी बस डिपो कु लोकार्पण, बैक डोर मामला मा एक्सपर्ट कमेटी न शुरू करी जांच, UKSSSC पेपर लीक मामला मा 34वीं गिरफ्तारी,बैक डोर भर्ती मामला दुष्प्रचार से निशंक नाराज, ईनी बड़ी दिनभरै खास खबर, एक नजर

बागेश्वर मा CM धामी न करी बस डिपो कु लोकार्पण: मुख्यमंत्री पुष्कर सिंह धामी न आज बागेश्वर मा रोडवेज बस डिपो कु लोकार्पण करी. दगड़ा मा ही सीएम धामी न बागनाथ मंदिर मा जीर्णोद्वार और सरयू पुल कु भी उदघाटन करी. ये मौका पर सीएम धामी न बोली अभी तक उत्तराखंड मा 18 बस डिपो छा, अब 19वां बस डिपो बागेश्वर मा होलू. ये बस डिपो का शुरू होंण से यात्रा सुगम होली, रोजगार और पर्यटन का क्षेत्र मा भी जिला विकसित होलू. बागेश्वर डिपो बटी 21 बसूं कु संचालन किये जालू.

बैक डोर मामला मा एक्सपर्ट कमेटी न शुरू करी जांच:उत्तराखंड विधानसभा भर्ती घोटाला मा गठित जांच कमेटी न आज बटी अपणु काम शुरू करेली. कमेटी की आज पैली बैठक ह्वे. बैठक मा जांच थै कन्न खै अगनै बढ़ये जौ यां पर रणनीति तैयार करे गी. विशेषज्ञ जांच समिति क अध्यक्ष दिलीप कोटिया न बथै जांच का शुरुआती दौर मा सबसे पैली दस्तावेजूं कु संकलन करे जालू. ज्या का बाद जांच थै धीरे-धीरे चरणबद्ध तरीका से अगनै बढये जालू.

बैक डोर भर्ती मामला दुष्प्रचार से निशंक नाराज:विधानसभा बैकडोर भर्ती मामला (back door recruitment case in Uttarakhand) थै लेकी सोशल मीडिया मा वायरल होंण वाली लिस्ट से पूर्व केंद्रीय मंत्री रमेश पोखरियाल निशंक काफी नाराज नजर औंणा छन. रमेश पोखरियाल निशंक न ई लिस्ट मा ऊंकु जिक्र होंण से खफा छन. अब ये मामला मा पूर्व केंद्रीय मंत्री रमेश पोखरियाल निशंक न कानूनी कार्रवाई कन्नै बात बोली. रमेश पोखरियाल निशंक न या बाते हरिद्वार मा कैंसर जांच एवं जागरूकता शिविर मा बोली.

UKSSSC पेपर लीक मामला मा 34वीं गिरफ्तारी: UKSSSC पेपर लीक मामला मा एसटीएफ लगातार कार्रवाई कन्नी च. आज ये मामला मा एसटीएफ न पेपर लीक मामला का सरगना सैय्यद सादिक मूसा का साथी संपन्न राव (sampanna rao) थै लखनऊ का गोमतीनगर बटी गिरफ्तार करी. संपन्न बटी लाखों की नकदी बरामद करे गी. UKSSSC पेपर लीक मामला मा एसटीएफ न या 34वीं गिरफ्तारी करी.

कांग्रेसै भारत जोड़ो यात्रा की तैयारी तेज : 7 सितंबर बटी कांग्रेसै भारत जोड़ो यात्रा शुरू होंण वाली च. ज्या की तैयारी जोरों-शोरों से चन्नी छन. भारत जोड़ो यात्रा मा उत्तराखंड का पूर्व विधानसभा अध्यक्ष गोविंद सिंह कुंजवाल थै यात्रा कु आयोजक बणये गी. उत्तराखंड कांग्रेस का 6 नेता ईं यात्रा मा स्थाई तौर पर शामिल होला. ज्या का कारण पार्टी ई यात्रा थै लेकी खासी एक्टिव नजर औंणी च.

फिर खुलली कर्मकार कल्याण बोर्डै फाइल: धामी सरकार एक बार फिर से कर्मकार कल्याण बोर्डै फाइल खोन्न वाली च. अबरी बोर्ड मा खरीद मामलै दोबारा जांच किये जाली. मामला मा राज्य सरकार 2017 से 2022 तकै सभी खरीदूं की ऑडिट करौणै तैयारी कन्नी च. ये दौरान हरक सिंह रावत ये विभाग की मंत्री छा. जानकारी का अनुसार ईं जांच से पूर्व कैबिनेट मंत्री हरक सिंह रावतै घेराबंदी की तैयारी किये जांणी च

धामी कैबिनेट विस्तारै चर्चा शुरू: उत्तराखंड भाजपा मा प्रदेश अध्यक्ष बदलना बाद अब मंत्रिमंडल विस्तारै चर्चा शुरू ह्वे गीन. फिलहाल धामी मंत्रिमंडल मा मंत्रियूं का तीन पद खाली छन. प्रदेश मा नई सरकार का गठन का बाद से मणै जांणू छौ कि मदन कौशिक थै संगठनै जिम्मेदारी से मुक्त करी उंथै सरकार मा जगह दिये जै सकदी, अब उंका संगठन से मुक्त होंणा बाद या चर्चा फिर से तेज ह्वे गी.

हरिद्वार का पंचायत चुनाव कु ऐलान: हरिद्वार का पंचायत चुनाव कु ऐलान ह्वे गी. हरिद्वार पंचायत चुनाव 26 सितंबरौ होला. 28 सितंबरौ पंचायत चुनाव की मतगणना होली. हरिद्वार जिला मा एक चरण मा ही पंचायत चुनाव संपन्न करये जाला. जिलाधिकारी विनय शंकर पांडे (Haridwar DM Vinay Shankar Pandey)न बथै 6 से 8 सितंबर तक पंचायत चुनाव का नामांकन होला. 9 से 11 सितंबर तक नामांकन पत्रों की जांच होली. 12 सितंबर नामांकन वापस लेणौ तिथि होली. 13 सितंबरौ प्रतीकों कु आवंटन होलू.

पांच सितंबर बटी केदारनाथै तीसरा चरणै यात्रा शुरू: प्रदेश मा केदारनाथ यात्रा कु पैलू और दूसरू चरण पूरू ह्वे गी. पैला चरणै यात्रा मई और जून मैना मा ह्वे. या मा लगभग नौ लाख तीर्थ यात्री केदारनाथ धाम पौंछिन. जबकि, दूसरा चरणै यात्रा जुलाई और अगस्त मैना मा ह्वे. या मा अब तक एक लाख से ज्यादा भक्त केदारनाथ पौंछिन. अब प्रशासन केदारनाथ यात्रा का तीसरा चरणै तैयारियूं मा जुट गी. पांच सितंबर से केदारनाथै तीसरा चरणै यात्रा शुरू होली. मौसम खुन्ना बाद केदारनाथ थै हेली सेवाऊं कु संचालन भी पांच सितंबर बटी दोबारा शुरू किये जालू.

उत्तराखंड मा फिर बढ़ी कोरोना:उत्तराखंड मां एक बार फिर से कोरोना का मामलौ मा बढौतरी होंणी च. ज्या का कारण सरकार और स्वास्थ्य विभाग चिंतित छन. आज प्रदेश मा कोरोना का 15 नया मामला समणि ऐनी, ज्या का बाद प्रदेश मा कोरोना संक्रमितू की संख्या 103, 437 ह्वे गी, जबकि यां से मन्न वालौ की संख्या 322 च.