अपणुं उत्तराखंडः दिनभरै खास खबर, एक नजर मा

मसूरी गोलीकांड 28 वीं बरसी ,महिलाऊं का क्षैतिज आररक्ष मामला मा सुप्रीम कोर्ट जाली सरकार,बैक डोर भर्ती मामला मा कांग्रेस कु प्रदर्शन,कांग्रेसै भारत जोड़ो यात्रा की तैयारी तेज , ईनी बड़ी दिनभरै खास खबर, एक नजर

मसूरी गोलीकांड 28 वीं बरसी : आज मसूरी गोलीकांड थै 28 साल पूरा ह्वे गीन. मसूरी गोलीकांडै बरसी पर सीएम धामी मसूरी पौंछिन. यख सीएम धामी शहीद आदोंलनकारियूं थै श्रद्धांजलि अर्पित करी. दगड़ा मा ही सीएम धामी न शहीद परिवारुं थै शॉल और माला पैने की सम्मानित भी करी. ये दौरान सीएम धामी एक जनसभा थै भी संबोधित करी. संबोधन का दौरान सीएम धामी की जुबान भी फिसली. सीएम धामी न योगी आदित्यनाथ थै पीएम बथै. हालांकि, तुरंत ही ऊंन अपणी गलती थै ठीक भी करेली छौ.

महिलाऊं का क्षैतिज आररक्ष मामला मा सुप्रीम कोर्ट जाली सरकार: उत्तराखंड मूलै महिलाऊं का 30 प्रतिशत क्षैतिज आरक्षण मामला मा राज्य सरकार सुप्रीम कोर्ट जाली. मसूरी गोलीकांडै 28वीं बरसी का मौके पर सीएम धामी न बोली महिलाऊं का 30 प्रतिशत क्षैतिज आरक्षण का मामला पर राज्य सरकार गंभीर च. . राज्य सरकार ये मामला मा हाईकोर्ट का फैसला थै सुप्रीम कोर्ट मा चुनौती द्याली. ऊंन बोली ये मामा मा पैरवी करी महिलाऊं का हकूं थै मजबूत किये जालू.

बैक डोर भर्ती मामला मा कांग्रेस कु प्रदर्शन:उत्तराखंड विधानसभा मा बैकडोर भर्ती मामला लगातार तूल पकड़नू च. कांग्रेस विधानसभा बैकडोर भर्ती मामला मा हमलावर मोड मा च. आज कांग्रेस न ये मामला मा विधानसभा की समणि प्रदर्शन करी ये मामलै निष्पक्ष जांच करौणै मांग करी. कांग्रेस न बोली हर सरकारै जांच होंण चयेंदी. मामला मा दोषी मंत्रियूं का इस्तीफा भी होंण चयेंदन. विरोध प्रदर्शन मा पूर्व मुख्यमंत्री हरीश रावत, कांग्रेस प्रदेश अध्यक्ष करण माहरा का दगड़ा ही विधायक राजेंद्र भंडारी भी शामिल ह्वेन.

कांग्रेसै भारत जोड़ो यात्रा की तैयारी तेज :7 सितंबर बटी कांग्रेसै भारत जोड़ो यात्रा शुरू होंण वाली च. ज्या की तैयारी जोरों-शोरों से चन्नी छन. ई कड़ी मा एआईसीसी का राष्ट्रीय सचिव और भारत जोड़ो यात्रा का प्रदेश प्रभारी जुबेर खान (State in charge of Bharat Jodo Yatra Zubair Khan) आज देहरादून पौंछिन. ऊंन भारत जोड़ों यात्रा थै लेकी जानकारी साझा करीन. ऊंन बथै भारत जोड़ो यात्रा मा उत्तराखंड का पूर्व विधानसभा अध्यक्ष गोविंद सिंह कुंजवाल थै यात्रा कु आयोजक बणये गी. उत्तराखंड कांग्रेस का 6 नेता ईं यात्रा मा स्थाई तौर पर शामिल होला.

हरिद्वार का पंचायत चुनाव कु ऐलान: हरिद्वार का पंचायत चुनाव कु ऐलान ह्वे गी. हरिद्वार पंचायत चुनाव 26 सितंबरौ होला. 28 सितंबरौ पंचायत चुनाव की मतगणना होली. हरिद्वार जिला मा एक चरण मा ही पंचायत चुनाव संपन्न करये जाला. जिलाधिकारी विनय शंकर पांडे (Haridwar DM Vinay Shankar Pandey)न बथै 6 से 8 सितंबर तक पंचायत चुनाव का नामांकन होला. 9 से 11 सितंबर तक नामांकन पत्रों की जांच होली. 12 सितंबर नामांकन वापस लेणौ तिथि होली. 13 सितंबरौ प्रतीकों कु आवंटन होलू.

हरिद्वार पंचायत चुनाव थै कांग्रेस न गठित करी कमेटी: हरिद्वार पंचायत चुनाव (Haridwar Panchayat Election 2022) कु ऐलान ह्वे गी. उत्तराखंड कांग्रेस न हरिद्वार पंचायत चुनाव मा मजबूती से उतन्नौ 16 सदस्यीय कमेटी कु गठन करेली. कमेटी मा प्रदेश अध्यक्ष करण माहरा, नेता प्रतिपक्ष यशपाल आर्य, पूर्व मुख्यमंत्री हरीश रावत, काजी निजामुद्दीन, प्रीतम सिंह, गणेश गोदियाल, अनुपमा रावत, सतपाल ब्रह्मचारी, ममता राकेश, फुरकान अहमद सहित 16 लोग शामिल छन. ये सबी अधिकृत किये जांण वाला प्रत्याशियूं का चयन एवं चुनाव का सफल संचालन कु काम करला.

फिर खुलली कर्मकार कल्याण बोर्डै फाइल:धामी सरकार एक बार फिर से कर्मकार कल्याण बोर्डै फाइल खोन्न वाली च. अबरी बोर्ड मा खरीद मामलै दोबारा जांच किये जाली. मामला मा राज्य सरकार 2017 से 2022 तकै सभी खरीदूं की ऑडिट करौणै तैयारी कन्नी च. ये दौरान हरक सिंह रावत ये विभाग की मंत्री छा. जानकारी का अनुसार ईं जांच से पूर्व कैबिनेट मंत्री हरक सिंह रावतै घेराबंदी की तैयारी किये जांणी च

धामी कैबिनेट विस्तारै चर्चा शुरू: उत्तराखंड भाजपा मा प्रदेश अध्यक्ष बदलना बाद अब मंत्रिमंडल विस्तारै चर्चा शुरू ह्वे गीन. फिलहाल धामी मंत्रिमंडल मा मंत्रियूं का तीन पद खाली छन. प्रदेश मा नई सरकार का गठन का बाद से मणै जांणू छौ कि मदन कौशिक थै संगठनै जिम्मेदारी से मुक्त करी उंथै सरकार मा जगह दिये जै सकदी, अब उंका संगठन से मुक्त होंणा बाद या चर्चा फिर से तेज ह्वे गी.

पांच सितंबर बटी केदारनाथै तीसरा चरणै यात्रा शुरू: प्रदेश मा केदारनाथ यात्रा कु पैलू और दूसरू चरण पूरू ह्वे गी. पैला चरणै यात्रा मई और जून मैना मा ह्वे. या मा लगभग नौ लाख तीर्थ यात्री केदारनाथ धाम पौंछिन. जबकि, दूसरा चरणै यात्रा जुलाई और अगस्त मैना मा ह्वे. या मा अब तक एक लाख से ज्यादा भक्त केदारनाथ पौंछिन. अब प्रशासन केदारनाथ यात्रा का तीसरा चरणै तैयारियूं मा जुट गी. पांच सितंबर से केदारनाथै तीसरा चरणै यात्रा शुरू होली. मौसम खुन्ना बाद केदारनाथ थै हेली सेवाऊं कु संचालन भी पांच सितंबर बटी दोबारा शुरू किये जालू.

उत्तराखंड मा फिर बढ़ी कोरोना: उत्तराखंड मां एक बार फिर से कोरोना का मामलौ मा बढौतरी होंणी च. ज्या का कारण सरकार और स्वास्थ्य विभाग चिंतित छन. आज प्रदेश मा कोरोना का 62 नया मामला समणि ऐनी, ज्या का बाद प्रदेश मा कोरोना संक्रमितू की संख्या 103, 345 ह्वे गी, जबकि यां से मन्न वालौ की संख्या 322 च.