विधानसभा बैक डोर भर्ती मामला मा जांच:विधानसभा भर्ती अनियमितता मामला मा धामी सरकार न जांच कन्नै बात बोली. मुख्यमंत्री पुष्कर सिंह धामी न ये संबंध मा विधानसभा अध्यक्ष से बात करी जांच करौणौ अनुरोध करी. यां का अलावा भाजपा सरकार पुरणी भर्तियूं की भी जांच करौणा मूड मा च. बथै द्या विधानसभा भर्ती अनियमितता मामला मा मुख्यमंत्री आवास से लेकी मंत्रियूं और संघ से जुड़्या लोखूं का करीब्यूं थै विधानसभा मा नियुक्ति दिये गी छै.
हल्द्वानी मा CM धामी का हेलीकॉप्टरै की इमरजेंसी लैंडिंग: मुख्यमंत्री सीएम पुष्कर सिंह धामी का हेलीकॉप्टरै आज हल्द्वानी का गौलापार हेलीपैड पर इमरजेंसी लैंडिंग करये गी. खराब मौसम का कारण धामी का हेलीकॉप्टरै इमरजेंसी लैंडिंग करये गी. सीएम धामी नैनीताल जांणा छा. रस्ता मा मौसम खरबा होंण का कारण हेलीकॉप्टरै इमरजेंसी लैंडिंग करौण पड़ी. यख बटी सीएम धामी सुशीला तिवारी हॉस्पिटल रवाना ह्वेन. जख ऊंन उत्तराखंड और यूपी का सिरसा बॉर्डर पर सड़क हादसा मा घायल लोखूं से मुलाकात करी.
सितारगंज सड़क हादसा की होली मजिस्ट्रेट जांच: हल्द्वानी मा हेलीकॉप्टरै इमरजेंसी लैंडिंग का बाद सीएम धामी सुशीला तिवारी हॉस्पिटल पौंछिन. जख ऊंन सिरसा बॉर्डर सड़क हादसा मा घायलूं कु हालचाल जांणी. यख सीएम धामी न घायलूं का बेहतर इलाज थै लेकी डॉक्टरुं थै निर्देश दिनी. दगड़ा मा ही ऊंन घायलूं और मृतकुं का आश्रितूं थै मुआवजा कु ऐलान भी करी. सीएम धामी ने सितारगंज सड़क हादसा की मजिस्ट्रेट जांचै बात भी बोली.
फिर खुलली कर्मकार कल्याण बोर्डै फाइल: धामी सरकार एक बार फिर से कर्मकार कल्याण बोर्डै फाइल खोन्न वाली च. अबरी बोर्ड मा खरीद मामलै दोबारा जांच किये जाली. मामला मा राज्य सरकार 2017 से 2022 तकै सभी खरीदूं की ऑडिट करौणै तैयारी कन्नी च. ये दौरान हरक सिंह रावत ये विभाग की मंत्री छा. जानकारी का अनुसार ईं जांच से पूर्व कैबिनेट मंत्री हरक सिंह रावतै घेराबंदी की तैयारी किये जांणी च
धामी कैबिनेट विस्तारै चर्चा शुरू: उत्तराखंड भाजपा मा प्रदेश अध्यक्ष बदलना बाद अब मंत्रिमंडल विस्तारै चर्चा शुरू ह्वे गीन. फिलहाल धामी मंत्रिमंडल मा मंत्रियूं का तीन पद खाली छन. प्रदेश मा नई सरकार का गठन का बाद से मणै जांणू छौ कि मदन कौशिक थै संगठनै जिम्मेदारी से मुक्त करी उंथै सरकार मा जगह दिये जै सकदी, अब उंका संगठन से मुक्त होंणा बाद या चर्चा फिर से तेज ह्वे गी.
NSUI कार्यकर्ताऊं न करी छात्रसंघ चुनाव करौणै मांग: उत्तराखंड मा छात्रसंघ चुनाव करौणै मांग थै लेकी आज एनएसयूआई कार्यकर्ताऊं न उच्च शिक्षा मंत्री धन सिंह रावत का आवास कु घेराव कन्नौ प्रयास करी, मगर पुलिस न प्रदर्शनकारियूं थै यमुना कॉलोनी का मेन गेट पर ही बैरिकेडिंग लगै की रोकी. ज्या का बाद नाराज एनएसयूआई कार्यकर्ताऊं न बैरिकेडिंग गिरै. ये दौरान पुलिस और प्रदर्शनकारियूं का बीच जमकर धक्का मुक्की ह्वे. ये दौरान पुलिसन बल प्रयोग भी करी. ज्या का बाद आंदोलनरत छात्र सड़क पर धरना पर बैठ गीन.
जल्द होलू खिलाड़ी उद्यमान योजना कु शुभारंभ: खेल मंत्री रेखा आर्य न आगामी 29 अगस्त राष्ट्रीय खेल दिवस की तैयारियूं थै लेकी खेल विभाग का अधिकारियूं दगड़ि समीक्षा बैठक करी. या बैठक रेखा आर्य का यमुना कॉलोनी स्थित शासकीय आवास पर ह्वे. बैठक मा खेल मंत्री रेखा आर्य न बथै की 29 अगस्तौ राष्ट्रीय खेल दिवस का मौके पर 8 से 14 वर्ष तक का बच्चों थै मुख्यमंत्री खिलाड़ी उदयमान योजना कु शुभारंभ करला. या का तहत बच्चों थै 1500 रुप्या की खेल छात्रवृत्ति प्रदान किये जाली.
UKSSSC Paper Leak मामला मा 27वीं गिरफ्तारी:उत्तराखंड एसटीएफ न UKSSSC Paper Leak मामला मा यूपी और उत्तराखंड का नकल माफिया का एक और गठजोड़ कु पर्दाफाश करी. वीपीडीओ परीक्षा प्रश्न पत्र लीक मामला मेा यूपी का चंदौली निवासी शशिकांत थै गहन पूछताछ और साक्ष्यों का आधार पर आज गिरफ्तार करे गी. दगड़ा मा ही एसटीएफ न नकल का एक नए सेंटर कु भी खुलासा करी. यूकेएसएसएससी पेपर लीक मामला मा एसटीएफ न या 27वीं गिरफ्तारी करी.
पांच सितंबर बटी केदारनाथै तीसरा चरणै यात्रा शुरू: प्रदेश मा केदारनाथ यात्रा कु पैलू और दूसरू चरण पूरू ह्वे गी. पैला चरणै यात्रा मई और जून मैना मा ह्वे. या मा लगभग नौ लाख तीर्थ यात्री केदारनाथ धाम पौंछिन. जबकि, दूसरा चरणै यात्रा जुलाई और अगस्त मैना मा ह्वे. या मा अब तक एक लाख से ज्यादा भक्त केदारनाथ पौंछिन. अब प्रशासन केदारनाथ यात्रा का तीसरा चरणै तैयारियूं मा जुट गी. पांच सितंबर से केदारनाथै तीसरा चरणै यात्रा शुरू होली. मौसम खुन्ना बाद केदारनाथ थै हेली सेवाऊं कु संचालन भी पांच सितंबर बटी दोबारा शुरू किये जालू.
उत्तराखंड मा फिर बढ़ी कोरोना: उत्तराखंड मां एक बार फिर से कोरोना का मामलौ मा बढौतरी होंणी च. ज्या का कारण सरकार और स्वास्थ्य विभाग चिंतित छन. आज प्रदेश मा कोरोना का 45 नया मामला समणि ऐनी, ज्या का बाद प्रदेश मा कोरोना संक्रमितू की संख्या 102, 980 ह्वे गी, जबकि यां से मन्न वालौ की संख्या 318 च.
