अपणुं उत्तराखंडः दिनभरै खास खबर, एक नजर मा

उत्तराखंड मा बरखा से भारी नुकसान,आपदा प्रभावित क्षेत्रूं कु अधिकार्यूं न करी दौरा,कुरूड़ पर्यटन विकास मेला मा सीएम धामी,स्टेट सीनियर बैडमिंटन प्रतियोगिता संपन्न, फिर खुलली कर्मकार कल्याण बोर्डै फाइल,ईनी बड़ी दिनभरै खास खबर, एक नजर

उत्तराखंड मा बरखा से भारी नुकसान:प्रदेश मा आफतै बरखा का कारण से जन जीवन बुरी तरह अस्त व्यस्त ह्वे गी. प्रदेश का अलग-अलग हिस्सौ से तेज बरखा, बादल फटणै से अब तक 7 लोखूं की मौत ह्ववे गी, जबकि 13 लोग अभी भी लापता छन. एनडीआरएफ, एसडीआरएफ और पुलिसै टीमें लगातार रेस्क्यू ऑपरेशन मा जुटी छन, प्रदेश मा बरखा का कारण 263 सड़क बंद ह्ववे गीन, जौं थै खोन्नौ काम लगातार जारी च.

आपदा प्रभावित क्षेत्रूं कु अधिकार्यूं न करी दौरा: उत्तराखंड मा आफतै बरखा का बाद आज डीजीपी अशोक कुमार, विधायक प्रीतम सिंह पंवार, टिहरी डीएम, डीआईजी गढ़वाल, देहरादून एसएसपी और सेनानायक एसडीआरएफ न आपदा प्रभावित क्षेत्रूं कु दौरा करी. यू सभी आज हालतूं कु जायजा लेणौ कुमाल्डा, सरखेत, मालदेवता और वे का आसपास का इलाकों मा पौछिन. ये दौरान यूं अधिकारयूं न पुलिस और एसडीआरएफै ओर से चलये जांण वाला रेस्क्यू और राहत कार्यूं की जानकारी लिनी.

कुरूड़ पर्यटन विकास मेला मा सीएम धामी:बागेश्वर का कुरूड़ मा पर्यटन विकास मेला कु आयोजन किये जांणू च. आज सीएम धामी न वर्चुअली ये पर्यटन विकास मेला मा शिरकत करी. ये दौरान सीएम पुष्कर सिंह धामी एक जनसभा थै भी संबोधित करी. ज्या मा सीएम धामी न धार्मिक और पर्यटन का क्षेत्र मा सरकार का कामूं का बारा मा विस्तार से बात साझा करी. दगड़ा मा ही सीएम धामी न राजराजेश्वरी माता नंदा से सबु का मंगलै कामना करी.

स्टेट सीनियर बैडमिंटन प्रतियोगिता संपन्न:उत्तरांचल राज्य बैडमिंटन एसोसिएशन द्वारा आयोजित 20वीं उत्तराखण्ड राज्य सीनियर बैडमिंटन प्रतियोगिता कु आज समापन ह्वे गी. समापन कार्यक्रम मा खेल मंत्री रेखा आर्या न भी शिरकत करी. ये मौका पर खेल मंत्री रेखा आर्य न यूएसबीए की अध्यक्ष अलकनंदा अशोक दगड़ि बैडमिंटन भी खेली. यां का बाद खेल मंत्री रेखा आर्य न खिलाड़ियू कु मनोबल बढै. ऊंन मौजूद सभी खिलाड़ियूं का उज्जवल भविष्य का कामना करी सबुं थै शुभकामना दिनीन.

फिर खुलली कर्मकार कल्याण बोर्डै फाइल: धामी सरकार एक बार फिर से कर्मकार कल्याण बोर्डै फाइल खोन्न वाली च. अबरी बोर्ड मा खरीद मामलै दोबारा जांच किये जाली. मामला मा राज्य सरकार 2017 से 2022 तकै सभी खरीदूं की ऑडिट करौणै तैयारी कन्नी च. ये दौरान हरक सिंह रावत ये विभाग की मंत्री छा. जानकारी का अनुसार ईं जांच से पूर्व कैबिनेट मंत्री हरक सिंह रावतै घेराबंदी की तैयारी किये जांणी च

धामी कैबिनेट विस्तारै चर्चा शुरू:उत्तराखंड भाजपा मा प्रदेश अध्यक्ष बदलना बाद अब मंत्रिमंडल विस्तारै चर्चा शुरू ह्वे गीन. फिलहाल धामी मंत्रिमंडल मा मंत्रियूं का तीन पद खाली छन. प्रदेश मा नई सरकार का गठन का बाद से मणै जांणू छौ कि मदन कौशिक थै संगठनै जिम्मेदारी से मुक्त करी उंथै सरकार मा जगह दिये जै सकदी, अब उंका संगठन से मुक्त होंणा बाद या चर्चा फिर से तेज ह्वे गी.

जल्द होलू खिलाड़ी उद्यमान योजना कु शुभारंभ: खेल मंत्री रेखा आर्य न आगामी 29 अगस्त राष्ट्रीय खेल दिवस की तैयारियूं थै लेकी खेल विभाग का अधिकारियूं दगड़ि समीक्षा बैठक करी. या बैठक रेखा आर्य का यमुना कॉलोनी स्थित शासकीय आवास पर ह्वे. बैठक मा खेल मंत्री रेखा आर्य न बथै की 29 अगस्तौ राष्ट्रीय खेल दिवस का मौके पर 8 से 14 वर्ष तक का बच्चों थै मुख्यमंत्री खिलाड़ी उदयमान योजना कु शुभारंभ करला. या का तहत बच्चों थै 1500 रुप्या की खेल छात्रवृत्ति प्रदान किये जाली.

बौर जलाशय मा होली राष्ट्रीय कयाकिंग कैनोइंग प्रतियोगिता : गूलरभोज स्थित बौर जलाशय मा 33 वीं राष्ट्रीय कयाकिंग कैनोइंग प्रतियोगिता कु आयोजन किये जालू. या प्रतियोगिता 22 से 25 अगस्त तक चलली. प्रतियोगिता थै लेकी प्रशासन न लगभग सभी तैयारी पूरी करेनी. ई कयाकिंग कैनोइंग प्रतियोगिता मा देशभर का 24 राज्यूं का लगभग 80 खिलाड़ी प्रतिभाग करला. कार्यक्रम का शुभारंभ थै लेकी सीएम धामी थै भी आमंत्रण पत्र भेजे गी.

मानसूनै दस्तक दगड़ि डेंगू कु खतरा: मानसूनै दस्तक का दगड़ि ही नगर निगम और स्वास्थ्य विभाग का अधिकारियूं थै डेंगू फैन्नै चिंता सतौण लग गी. नगर आयुक्त न अफसरुं थै हिदायत दिनी कि नगर निगम का सभी सुपरवाइजरुं की अगुवाई मा वार्डवार डोर-टू-डोर सघन अभियान चलये जौ. अभियान मा सुपरवाइजरुं का अलावा आशा कार्यकर्ताऊं और एएनएमै भी मदद लिये जौ. या का तहत नगर निगम की टीम हर रोज 100 घौरुं मा जाली.

उत्तराखंड मा फिर बढ़ी कोरोना : उत्तराखंड मां एक बार फिर से कोरोना का मामलौ मा बढौतरी होंणी च. ज्या का कारण सरकार और स्वास्थ्य विभाग चिंतित छन. आज प्रदेश मा कोरोना का 80 नया मामला समणि ऐनी, ज्या का बाद प्रदेश मा कोरोना संक्रमितू की संख्या 102,172 ह्वे गी, जबकि यां से मन्न वालौ की संख्या 312 च.