अपणुं उत्तराखंडः दिनभरै खास खबर, एक नजर मा

कॉमनवेल्थ गेम्स मा उत्तराखंड का लाल कु कमाल, राष्ट्रपति द्रौपदी मुर्मू से मिलिन धामी,12 महिलाऊं थै मिलाी तीलू रौतेली पुरस्कार, महेंद्र भट्ट कु जिला प्रवास कार्यक्रम आज से शुरू, निम मा स्पोर्ट्स क्लाइंबिंग चैंपियनशिप, ईनी बड़ी दिनभरै खास खबर, एक नजर

कॉमनवेल्थ गेम्स मा उत्तराखंड का लाल कु कमाल:उत्तराखंड का अल्मोड़ा का रौंण वाला बैडमिंटन खिलाड़ी लक्ष्य सेन न अपणा डेब्यू कॉमनवेल्थ गेम्स मा इतिहास रचेली. बैडमिंटन खिलाड़ी लक्ष्य सेन बैडमिंटन का पुरुष एकल का फाइनल मुकाबला मा मलेशिया का एंग जे यॉन्ग थै 19-21, 21-9, 21-16 से हरै की गोल्ड मेडेल जीती. लक्ष्य सेन की उपलब्धि पर ऊंका पैतृक गौ मा खुशी कु माहौल च. सीएम धामी न भी लक्ष्य सेन थै गोल्ड मेडेले जीतण पर बधै दिनी.

राष्ट्रपति द्रौपदी मुर्मू से मिलिन धामी: मुख्यमंत्री पुष्कर सिंह धामी आजलक दिल्ली दौरा पर छन. . नीति आयोगै बैठक मा भाग लेणा बाद आज सीएम धामी न राष्ट्रपति द्रौपदी मुर्मू दगड़ि शिष्टाचार भेंट करी. ये दौरान सीएम धामी न द्रौपदी मुर्मू थै ऊंकी ऐतिहासिक जीत पर बधाई दिनी. सीएम धामी मुर्मू की ऐतिहासिक जीत थै नारी शक्ति कु प्रतीक बथै.

12 महिलाऊं थै मिलाी तीलू रौतेली पुरस्कार:आज सर्वे चौक स्थित सभागार मा उत्तराखंड सरकार का महिला सशक्तिकरण एवं बाल विकास विभाग की ओर से प्रदेशै 12 महिलाऊं थै विभिन्न क्षेत्रों मा उत्कृष्ट कार्य कन्नौ थै सम्मानित करे दी. या मा 12 महिलाऊं थै तीलू रौतेली पुरस्कार से नवजे गी, जबकि पैली बार 35 आंगनबाड़ी कार्यकत्रियूं थै भी सम्मानित करे गी. सब्यू थै राज्यपाल सेनि. लेफ्टिनेट जनरल गुरमीत सिंह न सम्मानित करी.

महेंद्र भट्ट कु जिला प्रवास कार्यक्रम आज से शुरू: दिल्ली मा बीजेपी का राष्ट्रीय अध्यक्ष और कई केंद्रीय नेताऊं दगड़ि मुलाकात कन्ना बाद बीजेपी प्रदेश अध्यक्ष महेंद्र भट्ट अब जिलों का दौरौं पर जाला. आज बटी ऊंकु जिला प्रवास कार्यक्रम शुरू होंणू च. महेंद्र भट्ट जिला प्रवास कार्यक्रमै शुरुआत हरिद्वार बटी करला. यां का बाद बीजेपी प्रदेश अध्यक्ष अध्यक्ष महेंद्र भट्ट उधमसिंह नगर और नैनीताल जिलौ की अलग-अलग विधानसभा सीटूं कु भी दौरा करला, ज्या मा वु पार्टी कार्यकर्ताऊं दगड़ि बैठक करला. यां का बाद वु 10 अगस्तौ दिल्ली रवाना होला.

धामी कैबिनेट विस्तारै चर्चा शुरू: उत्तराखंड भाजपा मा प्रदेश अध्यक्ष बदलना बाद अब मंत्रिमंडल विस्तारै चर्चा शुरू ह्वे गीन. फिलहाल धामी मंत्रिमंडल मा मंत्रियूं का तीन पद खाली छन. प्रदेश मा नई सरकार का गठन का बाद से मणै जांणू छौ कि मदन कौशिक थै संगठनै जिम्मेदारी से मुक्त करी उंथै सरकार मा जगह दिये जै सकदी, अब उंका संगठन से मुक्त होंणा बाद या चर्चा फिर से तेज ह्वे गी.

भोल निकलली टपकेशवर महाराजै शोभायात्रा: 9 अगस्तौ देहरादून मा टपकेशवर महाराजै शोभायात्रा निकले जाली. ई शोभायात्रा थै लेकी सबी तैयारी पूरी ह्ले गीन. पुलिस न शोभायात्रा का दौरान सुरक्षा से लेकी ट्रैफिक प्लान भी तैयार करेली. शोभायात्रा का दौरान लोखूं थै परेशानी न हो यां कु थै पुलिस न शहर मा ट्रैफिक डायवर्ट करेली. शोभायात्रा का शिवाजी धर्मशाला से निकलम पर आईएसबीटी की ओर से औंण वाला ट्रैफिक थै निरंजनपुर मंडी बटी जीएमएस रोडै तरफां डायवर्ट किये जालू.

रक्षाबंधन पर सरकार और डाक विभाग कु तोहफा:रक्षाबंधन पर उत्तराखंड सरकार और डाक विभाग न बड़ू तोहफा दिनी. रक्षाबंधन का दिन महिला उत्तराखंडै रोडवेजै बसूं मा फ्री सफर कर सकदन. या सुविधा सिर्फ उत्तराखंडै सीमा मा ही लागू राली. वखी, डाक विभाग न भी राखी भेजणौ देहरादून मा स्पेशल काउंडर खोल्यां छन. यां का अलावा राखी भेजणौ डाक विभाग न एक स्पेशल लिफाफा भी बणै, जु की वाटर प्रूफ च.

निम मा स्पोर्ट्स क्लाइंबिंग चैंपियनशिप : नेहरू पर्वतारोहण संस्थान मा 12 से 14 अगस्त तक नेशनल स्पोर्ट्स क्लाइंबिंग चैंपियनशिप आयोजित किये जाली. ई चैंपियनशिप मा देशभरै 7 टीमूं का करीब 250 क्लाइंबर प्रतिभाग करला. ई प्रतियोगिता मा उत्तराखंड का आठ क्लाइंबर भी शामिल होंणा छन, ज्या मा पांच उत्तरकाशी का छन. प्रतियोगिता का शुभारंभ थै मुख्यमंत्री पुष्कर सिंह धामी थै आमंत्रित किये जालू. निम का प्रधानाचार्य कर्नल अमित बिष्ट न बथै कि उत्तराखंड मा या प्रतियोगिता पैली बार आयोजित होंणी च.

मानसूनै दस्तक दगड़ि डेंगू कु खतरा:मानसूनै दस्तक का दगड़ि ही नगर निगम और स्वास्थ्य विभाग का अधिकारियूं थै डेंगू फैन्नै चिंता सतौण लग गी. नगर आयुक्त न अफसरुं थै हिदायत दिनी कि नगर निगम का सभी सुपरवाइजरुं की अगुवाई मा वार्डवार डोर-टू-डोर सघन अभियान चलये जौ. अभियान मा सुपरवाइजरुं का अलावा आशा कार्यकर्ताऊं और एएनएमै भी मदद लिये जौ. या का तहत नगर निगम की टीम हर रोज 100 घौरुं मा जाली.

उत्तराखंड मा फिर बढ़ी कोरोना : उत्तराखंड मां एक बार फिर से कोरोना का मामलौ मा बढौतरी होंणी च. ज्या का कारण सरकार और स्वास्थ्य विभाग चिंतित छन. आज प्रदेश मा कोरोना का 143 नया मामला समणि ऐनी, ज्या का बाद प्रदेश मा कोरोना संक्रमितू की संख्या 1,000,18 ह्वे गी, जबकि यां से मन्न वालौ की संख्या 301 च.