नीति आयोगै बैठक मा सीएम धामी: प्रधानमंत्री नरेंद्र मोदी की अध्यक्षता मा आज नीति आयोगै अहम बैठक ह्वे. बैठक मा सीएम पुष्कर सिंह धामी न भी हिस्सा लिनी. ई बैठक मा केंद्र और राज्य और केंद्र शासित प्रदेशूं का बीच सहयोग और एक नई दिशा मा काम कन्न थै लेकी और तालमेल बैठाणौ चर्चा करे गी. बैठक का एजेंडा मा फसल विविधीकरण, तिलहन- दाल और कृषि क्षेत्र मा आत्मनिर्भरता, राष्ट्रीय शिक्षा नीति, शहरी शासन समेत अन्य मुद्दा शामिल छा.
धामी कैबिनेट विस्तारै चर्चा शुरू: उत्तराखंड भाजपा मा प्रदेश अध्यक्ष बदलना बाद अब मंत्रिमंडल विस्तारै चर्चा शुरू ह्वे गीन. फिलहाल धामी मंत्रिमंडल मा मंत्रियूं का तीन पद खाली छन. प्रदेश मा नई सरकार का गठन का बाद से मणै जांणू छौ कि मदन कौशिक थै संगठनै जिम्मेदारी से मुक्त करी उंथै सरकार मा जगह दिये जै सकदी, अब उंका संगठन से मुक्त होंणा बाद या चर्चा फिर से तेज ह्वे गी.
स्मृति ईरानी कौ दौरा कु विरोध: केंद्रीय मंत्री स्मृति ईरानी आज देहरादून दौरे पर छन. ऊंका दौरा का विरोध मा महिला कांग्रेस न राज्य अतिथि गृह बीजापुर का बैर चूड़ी और काला दुपट्टा लहरै की विरोध प्रदर्शन करी. ये दौरान महिला कांग्रेस कार्यकर्ताऊं न केंद्रीय मंत्री समृति ईरानी पर जमकर हमला बोली. बीजापुर गेस्ट हाउस का भैर प्रदर्शन कन्न वाली महिला कांग्रेसै कार्यकर्ताऊं थै पुलिस न गिरफ्तार करी. ज्या का बाद सब्यूं थै पुलिस लैन भेजे गी. ये दौरान कांग्रेस महिलाऊं न स्मृति ईरानी गो बैक का नारा भी लगैन.
8 अगस्तौ तीलू रौतेली पुरस्कार:उत्तराखंड मा हर साल 8 अगस्तै वीरांगना तीलू रौतेली की जयंती बड़ा धूमधाम से मनये जांदी. या थै लेकी पूरा प्रदेश मा कार्यक्रमूं कु आयोजन किये जांदू. ये मौका पर हर साल महिला सशक्तिकरण एवं बाल विकास विभाग तीलू रौतेली पुरस्कार देंदू. ये साल भी 8 अगस्तौ प्रदेश मा तीलू रौतेली पुरस्कार दिये जाला. यां कु थै लेकी सबी तैयारी पूरी ह्ववे गीन. अबरी तीलू रौतेली पुरस्कार थै कुल कुल 120 आवेदन अयां छन.
तीलू रौतेली दगड़ी आंगनबाड़ी कार्यक्रत्री पुरस्कार: धामी सरकार ये साल तीलू रौतेली पुरस्कार का दगड़ि ही आंगनबाड़ी कार्यक्रत्री पुरस्कार भी दैंण वाली च. प्रदेश मा तीलू रौतेली पुरस्कार थै लेकी कुल 120 और आंगनबाड़ी पुरस्कार थै 62 आवेदन ऑनलाइन माध्यम से विभाग थै मिलीन. ये नौ सबी जिलों बटी अयां छन. 8 अगस्तौ तीलू रौतेली पुरस्कार का दगड़ि ही आंगनबाड़ी वर्करुं थै भी सम्मानित किये जाली. यां मा ऊं महिलाऊं थै सम्मानित किये जालू जौन शिक्षा, समाज, पर्यावरण सहित अन्य क्षेत्रूं मा उत्कृष्ट कार्य करी हो.
मसूरी रोड एक्सीडेंट मां 10 घायल:मसूरी मा आईटीबीपी गेट का समणि एक रोडवेजै बस अनियंत्रित ह्वे की सड़क बटी दूसरी सड़क पर पलट की. घटना का टैम बस मा 39 यात्री सवार छा, ज्या मा 8 यात्री गंभीर रूप से घायल ह्वे गीन. घटना की जानकारी का बाद मसूरी भारतीय तिब्बत सीमा पुलिस बल, मसूरी पुलिस, 108 एंबुलेंस और फायर सर्विस मौके पर पौंछिन, ज्या रा बाद रेस्क्यू ऑपरेशन शुरू करे गी. 10 घायलू थै मसूरी भारतीय तिब्बत सीमा पुलिस का अस्पताल मा भर्ती करे गी, जबकि अन्य घायूलू थै मसूरी उप जिला चिकित्सालय मा भर्ती करे गी
रक्षाबंधन पर सरकार और डाक विभाग कु तोहफा:रक्षाबंधन पर उत्तराखंड सरकार और डाक विभाग न बड़ू तोहफा दिनी. रक्षाबंधन का दिन महिला उत्तराखंडै रोडवेजै बसूं मा फ्री सफर कर सकदन. या सुविधा सिर्फ उत्तराखंडै सीमा मा ही लागू राली. वखी, डाक विभाग न भी राखी भेजणौ देहरादून मा स्पेशल काउंडर खोल्यां छन. यां का अलावा राखी भेजणौ डाक विभाग न एक स्पेशल लिफाफा भी बणै, जु की वाटर प्रूफ च.
निम मा स्पोर्ट्स क्लाइंबिंग चैंपियनशिप : नेहरू पर्वतारोहण संस्थान मा 12 से 14 अगस्त तक नेशनल स्पोर्ट्स क्लाइंबिंग चैंपियनशिप आयोजित किये जाली. ई चैंपियनशिप मा देशभरै 7 टीमूं का करीब 250 क्लाइंबर प्रतिभाग करला. ई प्रतियोगिता मा उत्तराखंड का आठ क्लाइंबर भी शामिल होंणा छन, ज्या मा पांच उत्तरकाशी का छन. प्रतियोगिता का शुभारंभ थै मुख्यमंत्री पुष्कर सिंह धामी थै आमंत्रित किये जालू. निम का प्रधानाचार्य कर्नल अमित बिष्ट न बथै कि उत्तराखंड मा या प्रतियोगिता पैली बार आयोजित होंणी च.
मानसूनै दस्तक दगड़ि डेंगू कु खतरा: मानसूनै दस्तक का दगड़ि ही नगर निगम और स्वास्थ्य विभाग का अधिकारियूं थै डेंगू फैन्नै चिंता सतौण लग गी. नगर आयुक्त न अफसरुं थै हिदायत दिनी कि नगर निगम का सभी सुपरवाइजरुं की अगुवाई मा वार्डवार डोर-टू-डोर सघन अभियान चलये जौ. अभियान मा सुपरवाइजरुं का अलावा आशा कार्यकर्ताऊं और एएनएमै भी मदद लिये जौ. या का तहत नगर निगम की टीम हर रोज 100 घौरुं मा जाली.
