अपणुं उत्तराखंडः दिनभरै खास खबर, एक नजर मा

गृहमंत्री से सीएम धामी की मुलाकात, उत्तराखंड सूचना विभाग मा बड़ू फेरबदल,निम मा स्पोर्ट्स क्लाइंबिंग चैंपियनशिप,नासिक मा हरिद्वारै प्रकाम्या न तलवारबाजी मी जीती स्वर्ण, ईनी बड़ी दिनभरै खास खबर, एक नजर

गृहमंत्री से सीएम धामी की मुलाकात: मुख्यमंत्री पुष्कर सिंह धामी आजकल दिल्ली दौरा पर छन. आज दिल्ली दौरा पर सीएम धामी न केंद्रीय गृहमंत्री अमित शाह दगड़ी मुलाकात करी. ये दौरान द्वी नेताऊं का बीच उत्तराखंड मा विकास योजनाऊं थै लेकी बातचीत ह्वे. दगड़ा मा ही उत्तराखंड मा कैबिनेट विस्तार की संभावनाऊं पर भी चर्चा करे गी. सीएम धामी दगड़ा नवनियुक्त प्रदेश अध्यक्ष महेंद्र भट्ट भी दिल्ली दौरा पर छन.

धामी कैबिनेट विस्तारै चर्चा शुरू:उत्तराखंड भाजपा मा प्रदेश अध्यक्ष बदलना बाद अब मंत्रिमंडल विस्तारै चर्चा शुरू ह्वे गीन. फिलहाल धामी मंत्रिमंडल मा मंत्रियूं का तीन पद खाली छन. प्रदेश मा नई सरकार का गठन का बाद से मणै जांणू छौ कि मदन कौशिक थै संगठनै जिम्मेदारी से मुक्त करी उंथै सरकार मा जगह दिये जै सकदी, अब उंका संगठन से मुक्त होंणा बाद या चर्चा फिर से तेज ह्वे गी.

आंगनबाड़ी कार्यक्रत्री पुरस्कार शुरू करली धामी सरकार: धामी सरकार तीलू रौतेली पुरस्कार का दगड़ि ही आंगनबाड़ी कार्यक्रत्री पुरस्कार भी शुरू कन्न वाली च. कैबिनेट मंत्री रेखा आर्य न बथै सभी जिलों बटी यां कु थै आंगनबाड़ी वर्करुं की लिस्ट मंगै गी. 8 अगस्तौ तीलू रौतेली पुरस्कार का दगड़ि ही आंगनबाड़ी वर्करुं थै भी सम्मानित किये जाली, ज्या कु थै लेकी कार्य योजना भी तैयार ह्वे गी. यां मा ऊं महिलाऊं थै सम्मानित किये जालू जौन शिक्षा, समाज, पर्यावरण सहित अन्य क्षेत्रूं मा उत्कृष्ट कार्य करी हो.

उत्तराखंड सूचना विभाग मा बड़ू फेरबदल: उत्तराखंड सूचना विभाग न अधिकारियूं थै विभिन्न जिम्मेदारियां बांटिन. विभाग का 6 अधिकारियूं थै प्रचार-प्रसार से लेकी विभिन्न यूनिटूं कु काम सौंपै गी. विभाग मा अपर निदेशक अनिल चंदोला थै कार्यालय से संबंधित कार्य सौंपे गीन. यां का अलावा संयुक्त निदेशक आशीष कुमार त्रिपाठी थै सूचना का अधिकार से संबंधित अपील, क्षेत्र मा प्रचार प्रसार और मुख्यालय का आहरण वितरण कु काम दिये गी. संयुक्त निदेशक के एस चौहान थै दिल्ली मा राज्य सूचना केंद्रै जिम्मेदारी दिये गी.

रक्षाबंधन पर सरकार और डाक विभाग कु तोहफा: रक्षाबंधन पर उत्तराखंड सरकार और डाक विभाग न बड़ू तोहफा दिनी. रक्षाबंधन का दिन महिला उत्तराखंडै रोडवेजै बसूं मा फ्री सफर कर सकदन. या सुविधा सिर्फ उत्तराखंडै सीमा मा ही लागू राली. वखी, डाक विभाग न भी राखी भेजणौ देहरादून मा स्पेशल काउंडर खोल्यां छन. यां का अलावा राखी भेजणौ डाक विभाग न एक स्पेशल लिफाफा भी बणै, जु की वाटर प्रूफ च.

निम मा स्पोर्ट्स क्लाइंबिंग चैंपियनशिप :नेहरू पर्वतारोहण संस्थान मा 12 से 14 अगस्त तक नेशनल स्पोर्ट्स क्लाइंबिंग चैंपियनशिप आयोजित किये जाली. ई चैंपियनशिप मा देशभरै 7 टीमूं का करीब 250 क्लाइंबर प्रतिभाग करला. ई प्रतियोगिता मा उत्तराखंड का आठ क्लाइंबर भी शामिल होंणा छन, ज्या मा पांच उत्तरकाशी का छन. प्रतियोगिता का शुभारंभ थै मुख्यमंत्री पुष्कर सिंह धामी थै आमंत्रित किये जालू. निम का प्रधानाचार्य कर्नल अमित बिष्ट न बथै कि उत्तराखंड मा या प्रतियोगिता पैली बार आयोजित होंणी च.

नासिक मा हरिद्वारै प्रकाम्या न तलवारबाजी मी जीती स्वर्ण: महाराष्ट्र का नासिक मा 5 से 8 अगस्त तक 11वीं मिनी और पांचवी अंतरराष्ट्रीय तलवारबाजी प्रतियोगिता आयोजित होंणी च. ई प्रतियोगिता मा हरिद्वारै प्रकाम्या न 10 वर्ष आयु वर्ग मा स्वर्ण पदक जीती. प्रकाम्या न फाइनल मुकाबला मा महाराष्ट्रै श्रेया थै 15-05 से हरै की गोल्ड मेडेल जीती. प्रकाम्या की ई उपलब्धि से उंका परिजन काफी खुश छन.

आंगनबाड़ी कार्यकत्रियूं कु धरना प्रदर्शन: कोटद्वार तहसील परिसर मा आज सैकड़ों आंगनबाड़ी कार्यकत्रियूं न एक दिवसीय धरना प्रदर्शन करी. ये दौरान आंगनबाड़ी कार्यकत्रियूं न सरकार पर ऊंकु शोषण कन्नौ आरोप लगै. आंगनबाड़ी कार्यकत्रियूं न 13 अगस्त तक ऊंकी मांग मन्नौ समय दियूं च. मांग पूरी न होंण पर 13 अगस्त से सम्पूर्ण दुगड्डा ब्लॉक मा कार्य बहिष्कारै चेतावनी भी आंगनबाड़ी कार्यकत्रियूं न दिनी.

मानसूनै दस्तक दगड़ि डेंगू कु खतरा: मानसूनै दस्तक का दगड़ि ही नगर निगम और स्वास्थ्य विभाग का अधिकारियूं थै डेंगू फैन्नै चिंता सतौण लग गी. नगर आयुक्त न अफसरुं थै हिदायत दिनी कि नगर निगम का सभी सुपरवाइजरुं की अगुवाई मा वार्डवार डोर-टू-डोर सघन अभियान चलये जौ. अभियान मा सुपरवाइजरुं का अलावा आशा कार्यकर्ताऊं और एएनएमै भी मदद लिये जौ. या का तहत नगर निगम की टीम हर रोज 100 घौरुं मा जाली.

उत्तराखंड मा फिर बढ़ी कोरोना :उत्तराखंड मां एक बार फिर से कोरोना का मामलौ मा बढौतरी होंणी च. ज्या का कारण सरकार और स्वास्थ्य विभाग चिंतित छन. आज प्रदेश मा कोरोना का 294 नया मामला समणि ऐनी, ज्या का बाद प्रदेश मा कोरोना संक्रमितू की संख्या 99,717 ह्वे गी, जबकि यां से मन्न वालौ की संख्या 299 च.