अपणुं उत्तराखंडः दिनभरै खास खबर, एक नजर मा

रक्षाबंधन पर सरकार और डाक विभाग कु तोहफा, उत्तराखंड मा नैचुरोपैथी डॉक्टरुं कु होलू पंजीकरण,करन माहरा न केंद्र सरकार पर बोली हमला,देहरादून मा आप की तिरंगा यात्रा, ईनी बड़ी दिनभरै खास खबर, एक नजर

रक्षाबंधन पर सरकार और डाक विभाग कु तोहफा:रक्षाबंधन पर उत्तराखंड सरकार और डाक विभाग न बड़ू तोहफा दिनी. रक्षाबंधन का दिन महिला उत्तराखंडै रोडवेजै बसूं मा फ्री सफर कर सकदन. या सुविधा सिर्फ उत्तराखंडै सीमा मा ही लागू राली. वखी, डाक विभाग न भी राखी भेजणौ देहरादून मा स्पेशल काउंडर खोल्यां छन. यां का अलावा राखी भेजणौ डाक विभाग न एक स्पेशल लिफाफा भी बणै, जु की वाटर प्रूफ च.

उत्तराखंड मा नैचुरोपैथी डॉक्टरुं कु होलू पंजीकरण: पतंजलि योगपीठ का महामंत्री आचार्य बालकृष्ण का जन्मदिन कार्यक्रम का मौका पर आज सीएम धामी हरिद्वार पौंछिन. ये दौरान सीएम धामी न नेचुरोपैथी (प्राकृतिक चिकित्सा) डॉक्टरुं का पंजीकरण कन्नौ घोषणा करी. ऊंन बोली हम उम्मीद करदां की पतंजलि, उत्तराखंड मा विश्व स्तरीय नेचुरोपैथी अस्पताल खोन्न मा सरकारै मदद करलू. पतंजलि योगपीठ मा आयोजित कार्यक्रम मा राज्यपाल गुरमीत सिंह, कैबिनेट मंत्री प्रेमचंद अग्रवाल, डॉ धन सिंह रावत और सुबोध उनियाल समेत कई अन्य लोग भी मौजूद रैन.

धामी कैबिनेट विस्तारै चर्चा शुरू: उत्तराखंड भाजपा मा प्रदेश अध्यक्ष बदलना बाद अब मंत्रिमंडल विस्तारै चर्चा शुरू ह्वे गीन. फिलहाल धामी मंत्रिमंडल मा मंत्रियूं का तीन पद खाली छन. प्रदेश मा नई सरकार का गठन का बाद से मणै जांणू छौ कि मदन कौशिक थै संगठनै जिम्मेदारी से मुक्त करी उंथै सरकार मा जगह दिये जै सकदी, अब उंका संगठन से मुक्त होंणा बाद या चर्चा फिर से तेज ह्वे गी.

आंगनबाड़ी कार्यक्रत्री पुरस्कार शुरू करली धामी सरकार: धामी सरकार तीलू रौतेली पुरस्कार का दगड़ि ही आंगनबाड़ी कार्यक्रत्री पुरस्कार भी शुरू कन्न वाली च. कैबिनेट मंत्री रेखा आर्य न बथै सभी जिलों बटी यां कु थै आंगनबाड़ी वर्करुं की लिस्ट मंगै गी. 8 अगस्तौ तीलू रौतेली पुरस्कार का दगड़ि ही आंगनबाड़ी वर्करुं थै भी सम्मानित किये जाली, ज्या कु थै लेकी कार्य योजना भी तैयार ह्वे गी. यां मा ऊं महिलाऊं थै सम्मानित किये जालू जौन शिक्षा, समाज, पर्यावरण सहित अन्य क्षेत्रूं मा उत्कृष्ट कार्य करी हो.

करन माहरा न केंद्र सरकार पर बोली हमला: कांग्रेस प्रदेश अध्यक्ष करन माहरा न आज विभिन्न मुद्दों पर सरकार पर हमला बोली. ऊंन बोली केंद्र सरकार बदले भावना से कार्रवाई कन्नी च. करन माहरा न केंद्र सरकार पर केंद्रीय एजेंसियूं का दुरूपयोग कन्नौ आरोप भी लगै. ऊंन बोली भाजपा छोड़न वाला नेताऊं पर तुरंत भाजपा सरकार कार्रवाई करदी, जबकि भाजपा ज्वाइन कन्न वाला नेताऊं की फाइल एकदम गायब ह्वे जांदी.

देहरादून मा आप की तिरंगा यात्रा:आजादी की 75वीं वर्षगांठ का मौका और आम आदमी पार्टी का राष्ट्रीय संयोजक अरविंद केजरीवाल के आह्वान पर देहरादून मा आप कार्यकर्ताऊं न तिरंगा यात्रा निकाली. यात्रा सुबेर 11 बजे अंबेडकर पार्क से शुरू ह्वे. या यात्रा घंटाघर से ह्वे की एस्ले हॉल, सुभाष चौक से लैंसडाउन चौक पौंछि. यां का बाद वापस घंटा घर यात्रा समाप्त ह्वे. ये दौरान101 फीट लंबू तिरंगा फैरे गी.

CUET की परीक्षा तकनीकी खामी से रद्द: श्रीनगर एनआईटी मा आज होंण वालू CUET एग्जाम तकनीकी खामियूं का कारण रद्द ह्वे गी. ज्या का कारण दूर दराज से अयां छात्रूं काफी मायूस ह्वेन. छात्रूं की परेशानी देखी गढ़वाल विवि का छात्र संगठन जय हो न यां का खिलाफ विवि. परिसर मा जोरदार हंगामा करी. ये दौरान प्रदर्शनकारी छात्रूं न गढ़वाल विवि और शिक्षा मंत्रालय कु पुतला भी फूंकी.

AIIMS ऋषिकेश मा बच्चों थै एक्सीलेंट सेंटर:प्रदेश मा शिशु मृत्यु दर मा कमी लौणौ ऋषिकेश एम्स निदेशक न तैयारी शुरू करेन. अब जल्द ही एम्स ऋषिकेश मा बीमार बच्चों थै एक्सीलेंट सेंटर तैयार किये जालू. या का तहत अब एम्स ऋषिकेश मा आउटरीच बच्चों थै भी इलाज दिये जालू. यां का अलावा भविष्य मा दुर्गम क्षेत्रूं तक बीमार बच्चौं थै ड्रोन का माध्यम से दवै पौछये जाली. बथै द्या उत्तराखंड मा बच्चों की मृत्यु दर राष्ट्रीय अनुपात से भौत ज्यादा च, ज्या का कारण अब यू प्रयास तेज ह्वे गीन.

मानसूनै दस्तक दगड़ि डेंगू कु खतरा:मानसूनै दस्तक का दगड़ि ही नगर निगम और स्वास्थ्य विभाग का अधिकारियूं थै डेंगू फैन्नै चिंता सतौण लग गी. नगर आयुक्त न अफसरुं थै हिदायत दिनी कि नगर निगम का सभी सुपरवाइजरुं की अगुवाई मा वार्डवार डोर-टू-डोर सघन अभियान चलये जौ. अभियान मा सुपरवाइजरुं का अलावा आशा कार्यकर्ताऊं और एएनएमै भी मदद लिये जौ. या का तहत नगर निगम की टीम हर रोज 100 घौरुं मा जाली.

उत्तराखंड मा फिर बढ़ी कोरोना : उत्तराखंड मां एक बार फिर से कोरोना का मामलौ मा बढौतरी होंणी च. ज्या का कारण सरकार और स्वास्थ्य विभाग चिंतित छन. आज प्रदेश मा कोरोना का 275 नया मामला समणि ऐनी, ज्या का बाद प्रदेश मा कोरोना संक्रमितू की संख्या 98,127 ह्वे गी, जबकि यां से मन्न वालौ की संख्या 291 च.