अपणुं उत्तराखंडः दिनभरै खास खबर, एक नजर मा

नरेंद्र सिंह नेगी थै लाइफटाइम अचीवमेंट अवॉर्ड, देहरादून मा भाजपा प्रदेश अध्यक्ष कु भव्य स्वागत, धामी कैबिनेट विस्तारै चर्चा शुरू,'हर घर तिरंगा' अभियानै शुरुआत, ईनी बड़ी दिनभरै खास खबर, एक नजर

देहरादून मा भाजपा प्रदेश अध्यक्ष कु भव्य स्वागत: उत्तराखंड भाजपा का नया प्रदेश अध्यक्ष का रूप मा आज महेंद्र भट्टै पूरे शहर भर मा भव्य स्वागत करे गी. ये दौरान बीजेपी कार्यकर्ताऊं एक विशाल रैली भी निकाली. देहरादून महानगर कार्यालय मा सबसे पैली महानगर अध्यक्ष सीताराम भट्ट न प्रदेश अध्यक्ष महेंद्र भट्ट कु स्वागत करी. ये मौके पर देहरादून मेयर सुनील उनियाल गामा, कैबिनेट मंत्री प्रेमचंद अग्रवाल, विधायक खजान दास सहित कई भाजपा नेता मौजूद रैन.

धामी कैबिनेट विस्तारै चर्चा शुरू: उत्तराखंड भाजपा मा प्रदेश अध्यक्ष बदलना बाद अब मंत्रिमंडल विस्तारै चर्चा शुरू ह्वे गीन. फिलहाल धामी मंत्रिमंडल मा मंत्रियूं का तीन पद खाली छन. प्रदेश मा नई सरकार का गठन का बाद से मणै जांणू छौ कि मदन कौशिक थै संगठनै जिम्मेदारी से मुक्त करी उंथै सरकार मा जगह दिये जै सकदी, अब उंका संगठन से मुक्त होंणा बाद या चर्चा फिर से तेज ह्वे गी.

'हर घर तिरंगा' अभियानै शुरुआत: उत्तराखंड मा भाजपा न आज 'हर घर तिरंगा' अभियानै शुरुआत करेली. सोमवारौ सीएम धामी, भाजपा प्रवक्ता संबित पात्रा और भाजपा प्रदेश अध्यक्ष महेंद्र भट्ट न अभियानै शुरुआत करी. उत्तराखंड मा भाजपा न राज्य मा लगभग 20 लाख घौरुं मा तिरंगा लगौणौ लक्ष्य रख्यूं च. ये अभियान मा भाजपा गैलंट्री अवॉर्ड से सम्मानित विजेताऊं थै भी शामिल करली. यू कार्यक्रम 13 अगस्त से 15 अगस्त तक चललू.

आंगनबाड़ी कार्यक्रत्री पुरस्कार शुरू करली धामी सरकार: धामी सरकार तीलू रौतेली पुरस्कार का दगड़ि ही आंगनबाड़ी कार्यक्रत्री पुरस्कार भी शुरू कन्न वाली च. कैबिनेट मंत्री रेखा आर्य न बथै सभी जिलों बटी यां कु थै आंगनबाड़ी वर्करुं की लिस्ट मंगै गी. 8 अगस्तौ तीलू रौतेली पुरस्कार का दगड़ि ही आंगनबाड़ी वर्करुं थै भी सम्मानित किये जाली, ज्या कु थै लेकी कार्य योजना भी तैयार ह्वे गी. यां मा ऊं महिलाऊं थै सम्मानित किये जालू जौन शिक्षा, समाज, पर्यावरण सहित अन्य क्षेत्रूं मा उत्कृष्ट कार्य करी हो.

AIIMS ऋषिकेश मा बच्चों थै एक्सीलेंट सेंटर:प्रदेश मा शिशु मृत्यु दर मा कमी लौणौ ऋषिकेश एम्स निदेशक न तैयारी शुरू करेन. अब जल्द ही एम्स ऋषिकेश मा बीमार बच्चों थै एक्सीलेंट सेंटर तैयार किये जालू. या का तहत अब एम्स ऋषिकेश मा आउटरीच बच्चों थै भी इलाज दिये जालू. यां का अलावा भविष्य मा दुर्गम क्षेत्रूं तक बीमार बच्चौं थै ड्रोन का माध्यम से दवै पौछये जाली. बथै द्या उत्तराखंड मा बच्चों की मृत्यु दर राष्ट्रीय अनुपात से भौत ज्यादा च, ज्या का कारण अब यू प्रयास तेज ह्वे गीन.

किच्छा मा कैदियूं थै हाईटेक जेल: उत्तराखंडै जेलूं मा अत्यधिक कैदियूं की संख्या थै देखी उधमसिंह नगर मा अत्याधुनिक जेल कु निर्माण किये जांणू च. ई जेल का निर्माण द्वी फेज मा पूरु किये जालू. पैलू फेज का निर्माण कार्य शुरू ह्ले गी. पैला फेज मा 480 कैदियूं थै कारागार बणये जांणू च. या जेल किच्छा का रजपुरा गौ मा 40 एकड़ मा बणये जांणी च. ई जेल मा करीब 2,580 कैदी राला. ई जेल कु काम जुलाई 2023 तक पूरू ह्वे जालू.

नरेंद्र सिंह नेगी थै लाइफटाइम अचीवमेंट अवॉर्ड: रोटरी क्लब अलकनंदा वैली कु द्वितीय अधिष्ठापन समारोह मलेथा का एक होटल मा धूमधाम से मनये गी. ये मौका पर गढ़ रत्न और प्रसिद्ध लोक गायक नरेंद्र सिंह नेगी थै लाइफटाइम अचीवमेंट अवॉर्ड से सम्मानित करे गी. यां का अलावा अलग-अलग बोर्डूं का हाईस्कूल एवं इंटरमीडिएट टॉपरुं थै भी ये कार्यक्रम मा सम्मानित करे गी.

आध्यात्मिक वेडिंग डेस्टिनेशन बणलू त्रियुगीनारायण मंदिर: त्रियुगीनारायण मंदिर धीरे-धीरे अब युवाओं की भी पसंद बणनू च. पिछला कुछ सालूं मा चत्रियुगीनारायण मा ब्यों कु क्रेज बढ़ी . वेडिंग डेस्टिनेशन का रुप मा त्रियुगीनारायण मंदिर थै विकसित कन्नै पर्यटन विभाग पैली से काम कन्नू च. अब बदरी-केदार मंदिर समिति न भी या कु थै लेकी प्रयास तेज करेन. बदरी-केदार मंदिर समिति न त्रियुगीनारायण मंदिर थै आध्यात्मिक वेडिंग डेस्टिनेशन का तौर पर डेवलप कन्नौ फैसला करी.

मानसूनै दस्तक दगड़ि डेंगू कु खतरा:मानसूनै दस्तक का दगड़ि ही नगर निगम और स्वास्थ्य विभाग का अधिकारियूं थै डेंगू फैन्नै चिंता सतौण लग गी. नगर आयुक्त न अफसरुं थै हिदायत दिनी कि नगर निगम का सभी सुपरवाइजरुं की अगुवाई मा वार्डवार डोर-टू-डोर सघन अभियान चलये जौ. अभियान मा सुपरवाइजरुं का अलावा आशा कार्यकर्ताऊं और एएनएमै भी मदद लिये जौ. या का तहत नगर निगम की टीम हर रोज 100 घौरुं मा जाली.

उत्तराखंड मा फिर बढ़ी कोरोना : उत्तराखंड मां एक बार फिर से कोरोना का मामलौ मा बढौतरी होंणी च. ज्या का कारण सरकार और स्वास्थ्य विभाग चिंतित छन. आज प्रदेश मा कोरोना का 275 नया मामला समणि ऐनी, ज्या का बाद प्रदेश मा कोरोना संक्रमितू की संख्या 98,127 ह्वे गी, जबकि यां से मन्न वालौ की संख्या 291 च.