GIC मासौं का नवनिर्मित भवन कु लोकार्पण: कैबिनेट मंत्री डॉ धन सिंह रावत आजकल अपणी विधानसभा क्षेत्रूं का तीन दिवसीय भ्रमण पर छन. ई कड़ी मा आज धन सिंह रावत पेशावर कांड का नायक वीर चंद्र सिंह गढ़वाली का गांव मासौं पौंछिन. जख ऊंन राजकीय इंटर कॉलेज मासौं का नवनिर्मित भवन कु लोकार्पण करी. ये दौरान ऊंन वीर चंद्र सिंह गढ़वाली की मूर्ति कु भी अनावरण करी. शिक्षा मंत्री धन सिंह रावत न बथै कि करीब डेढ़ करोड़ै लागत से राजकीय इंटर कॉलेज मासौं कु आधुनिक भवन तैयार करे गी.
जनपदूं मा कांग्रेसै 75 किलोमीटर पदयात्रा:आजादी की 75वीं वर्षगांठ पर कांग्रेस प्रदेश का जनपदूं मा 75 किलोमीटर पैदल यात्रा निकलली. ज्या कु थै लेकी आज उधम सिंह नगर जिला मुख्यालय मा नेता प्रतिपक्ष न कार्यकर्ताऊं दगड़ि बैठक करी. ई बैठक मा नेता प्रतिपक्ष यशपाल आर्य और उपनेता प्रतिपक्ष भुवन कापड़ी न पदयात्रा थै लेकी कांग्रेस पदाधिकारियूं दगड़ि विस्तार से चर्चा करी. नेता प्रतिपक्ष यशपाल आर्य न बथै पदयात्रा मा महंगाई, बेरोजगारी जन ज्वलंत सवाल उठये जाला. दगड़ा मा ही जनता से सीधू संवाद करे जालू.
यूरोपीय देशूं का दौरा पर जाला 6 विधायक: उत्तराखंड का कृषि मंत्री गणेश जोशी दगड़ि सत्ता और विपक्ष का 6 विधायक और अधिकारियूं कु दल यूरोपीय देशूं का दौरा पर जाला. सत्ताधारी दल का चार विधायकूं मा राम सिंह कैड़ा, सुरेश गड़िया, प्रदीप बत्रा और रेनू बिष्ट शामिल छन. यां का अलावा द्वी कांग्रेस का विधायकूं मा मनोज तिवारी व हरीश धामी शामिल छन. यू सबी यूरोपीय देशूं मा कृषि मा इस्तेमाल होंण वाली टेक्नोलॉजी की गहन जानकारी ल्याला. गणेश जोशी न बोली न या से प्रदेशै इकोनॉमी थै मजबूती मिलली.
दिनभरै खास खबर, एक नजर मा. आंगनबाड़ी कार्यक्रत्री पुरस्कार शुरू करली धामी सरकार: धामी सरकार तीलू रौतेली पुरस्कार का दगड़ि ही आंगनबाड़ी कार्यक्रत्री पुरस्कार भी शुरू कन्न वाली च. कैबिनेट मंत्री रेखा आर्य न बथै सभी जिलों बटी यां कु थै आंगनबाड़ी वर्करुं की लिस्ट मंगै गी. 8 अगस्तौ तीलू रौतेली पुरस्कार का दगड़ि ही आंगनबाड़ी वर्करुं थै भी सम्मानित किये जाली, ज्या कु थै लेकी कार्य योजना भी तैयार ह्वे गी. यां मा ऊं महिलाऊं थै सम्मानित किये जालू जौन शिक्षा, समाज, पर्यावरण सहित अन्य क्षेत्रूं मा उत्कृष्ट कार्य करी हो.
रुद्रप्रयाग जिला अस्पताल जच्चा-बच्चा मौत मामला: जिला अस्पताल मा नाबालिग और बच्चा की मौत का मामला मा राजस्व पुलिस न कार्रवाई करी. राजस्व पुलिस न मामला मा अज्ञात का खिलाफ पॉक्सो एक्ट का तहत मुकदमा दर्ज करेली. दगड़ा मा ही ये मामला की जांच थै रेगुलर पुलिस थै सौंपणै भी एक पत्र लिखे गी. वखी, दूसरा ओर अस्पताल प्रबंधन न भी ये मामला की जांच थै लेकी तीन सदस्यीय जांच कमेटी गठित करेली.
कांवड़ वाहनूं थै हरिद्वार टोल प्लाजा फ्री: उत्तराखंड मा कांवड़ यात्रा मा जमकर जनसैलाब उमड़नू च. या थै देखी पुलिस और प्रशासन लगातार व्यवस्था बणौण मा लग्यां छन. ई क्रम मा अब डाक कांवड़ वाहनूं थै विशेष व्यवस्था करे गी. डाक कांवड़ वाहनूं थै हरिद्वार टोल प्लाजा थै 26 जुलाई तक फ्री करे गी. आज एसएसपी देहरादून न भी रायवाला पौंछि कांवड़ व्यवस्थाऊं कु जायजा लिनी.
किच्छा मा कैदियूं थै हाईटेक जेल:उत्तराखंडै जेलूं मा अत्यधिक कैदियूं की संख्या थै देखी उधमसिंह नगर मा अत्याधुनिक जेल कु निर्माण किये जांणू च. ई जेल का निर्माण द्वी फेज मा पूरु किये जालू. पैलू फेज का निर्माण कार्य शुरू ह्ले गी. पैला फेज मा 480 कैदियूं थै कारागार बणये जांणू च. या जेल किच्छा का रजपुरा गौ मा 40 एकड़ मा बणये जांणी च. ई जेल मा करीब 2,580 कैदी राला. ई जेल कु काम जुलाई 2023 तक पूरू ह्वे जालू.
उत्तराखंड मा मौसम कु अलर्ट: मौसम विज्ञान केंद्र देहरादून न उत्तराखंड थै लेकी पूर्वानुमान जारी करी. मौसम विभाग का मुताबिक प्रदेश का पर्वतीय इलाकूं मा कखी-कखी तेज बरखा होणौ संभावना च. मौसम विज्ञान केंद्र न देहरादून, टिहरी, पौड़ी, उत्तरकाशी, नैनीताल, चंपावत, बागेश्वर, पिथौरागढ़, उधमसिंहनगर और अल्मोड़ा थै लेकी येलो अलर्ट जारी करी. वखी नैनीताल और चंपावत थै लेकी ऑरेंज अलर्ट जारी करे गी.
मानसूनै दस्तक दगड़ि डेंगू कु खतरा: मानसूनै दस्तक का दगड़ि ही नगर निगम और स्वास्थ्य विभाग का अधिकारियूं थै डेंगू फैन्नै चिंता सतौण लग गी. नगर आयुक्त न अफसरुं थै हिदायत दिनी कि नगर निगम का सभी सुपरवाइजरुं की अगुवाई मा वार्डवार डोर-टू-डोर सघन अभियान चलये जौ. अभियान मा सुपरवाइजरुं का अलावा आशा कार्यकर्ताऊं और एएनएमै भी मदद लिये जौ. या का तहत नगर निगम की टीम हर रोज 100 घौरुं मा जाली.
