गंगोत्री हाईवे पर पलटी कांवड़ियूं कु ट्रक: गंगोत्री राष्ट्रीय राजमार्ग पर हर्षिल जांगला पुल का समणिं कांवड़ियूं से भर्र्यू एक ट्रक सड़क पर पलटी दुर्घटनाग्रस्त ह्वे गी. घटना की सूचना पर आनन-फानन मा पुलिस फोर्स मौके पर पौंछि. ज्या का बाद सबु थै सुरक्षित भैर निकले गी. चार घायल कांवड़ियूं थै आर्मी हॉस्पिटल व प्राथमिक स्वास्थ्य केंद्र हर्षिल भेजे गी, बाकी सबी कावड्यूं की हालत सामान्य च.
रुद्रप्रयाग जिला चिकित्सालय मा नाबालिग जच्चा-बच्चा की मौत:रुद्रप्रयाग जिला चिकित्सालय मा एक नाबालिग न शौचालय मा एक बच्चा थै जन्म दिनी. ज्या का बाद जच्चा-बच्चा द्वीयूं की मौत ह्वे गी. पैली नजर मा ई घटना मा नाबालिग का परिजनूं की गलती समणि औंणी च. अब पुलिस और अस्पताल प्रबंधन ये मामला की जांच कन्नू कन्ना छन. बथये जांणू च कि नाबालिग नौनी का परिजनू न बदमानी का डौर से कै थै बच्चा होंणै जानकारी नी दिनी, ज्या का कारण या घटना घटी.
कांवड़ वाहनूं थै हरिद्वार टोल प्लाजा फ्री: उत्तराखंड मा कांवड़ यात्रा मा जमकर जनसैलाब उमड़नू च. या थै देखी पुलिस और प्रशासन लगातार व्यवस्था बणौण मा लग्यां छन. ई क्रम मा अब डाक कांवड़ वाहनूं थै विशेष व्यवस्था करे गी. डाक कांवड़ वाहनूं थै हरिद्वार टोल प्लाजा थै 26 जुलाई तक फ्री करे गी. आज एसएसपी देहरादून न भी रायवाला पौंछि कांवड़ व्यवस्थाऊं कु जायजा लिनी.
पुलै शटरिंग गिन्न मामला मा जेई और एई निलंबित: नरकोटा का समणि ऑल वेदर रोड का निर्माणाधीन पुलै शटरिंग गिन्न का मामला पर फिर से एक्शन ह्वे. आज सरकार न ये मामला मा एक सहायक अभियंता और एक कनिष्ठ अभियंता थै निलंबित करेली. वखी, कार्यपालक अभियंता थै फील्ड बटी हटै की मुख्य अभियंता का कार्यालय से अटैच करेली. बथै द्या ये मामला मा 3 मजदूरुं की मौत ह्वे छै, 7 घायल ह्वे छा. मजदूरुं का परिजनूं की तहरीर पर प्रोजेक्ट मैनेजर और सहायक इंजीनियर का खिलाफ मुकदमा भी दर्ज करे गी छौ.
आंगनबाड़ी कार्यक्रत्री पुरस्कार शुरू करली धामी सरकार: धामी सरकार तीलू रौतेली पुरस्कार का दगड़ि ही आंगनबाड़ी कार्यक्रत्री पुरस्कार भी शुरू कन्न वाली च. कैबिनेट मंत्री रेखा आर्य न बथै सभी जिलों बटी यां कु थै आंगनबाड़ी वर्करुं की लिस्ट मंगै गी. 8 अगस्तौ तीलू रौतेली पुरस्कार का दगड़ि ही आंगनबाड़ी वर्करुं थै भी सम्मानित किये जाली, ज्या कु थै लेकी कार्य योजना भी तैयार ह्वे गी. यां मा ऊं महिलाऊं थै सम्मानित किये जालू जौन शिक्षा, समाज, पर्यावरण सहित अन्य क्षेत्रूं मा उत्कृष्ट कार्य करी हो.
यूरोपीय देशूं का दौरा पर जाला 6 विधायक: उत्तराखंड का कृषि मंत्री गणेश जोशी दगड़ि सत्ता और विपक्ष का 6 विधायक और अधिकारियूं कु दल यूरोपीय देशूं का दौरा पर जाला. सत्ताधारी दल का चार विधायकूं मा राम सिंह कैड़ा, सुरेश गड़िया, प्रदीप बत्रा और रेनू बिष्ट शामिल छन. यां का अलावा द्वी कांग्रेस का विधायकूं मा मनोज तिवारी व हरीश धामी शामिल छन. यू सबी यूरोपीय देशूं मा कृषि मा इस्तेमाल होंण वाली टेक्नोलॉजी की गहन जानकारी ल्याला. गणेश जोशी न बोली न या से प्रदेशै इकोनॉमी थै मजबूती मिलली.
किच्छा मा कैदियूं थै हाईटेक जेल:उत्तराखंडै जेलूं मा अत्यधिक कैदियूं की संख्या थै देखी उधमसिंह नगर मा अत्याधुनिक जेल कु निर्माण किये जांणू च. ई जेल का निर्माण द्वी फेज मा पूरु किये जालू. पैलू फेज का निर्माण कार्य शुरू ह्ले गी. पैला फेज मा 480 कैदियूं थै कारागार बणये जांणू च. या जेल किच्छा का रजपुरा गौ मा 40 एकड़ मा बणये जांणी च. ई जेल मा करीब 2,580 कैदी राला. ई जेल कु काम जुलाई 2023 तक पूरू ह्वे जालू.
मानसूनै दस्तक दगड़ि डेंगू कु खतरा:मानसूनै दस्तक का दगड़ि ही नगर निगम और स्वास्थ्य विभाग का अधिकारियूं थै डेंगू फैन्नै चिंता सतौण लग गी. नगर आयुक्त न अफसरुं थै हिदायत दिनी कि नगर निगम का सभी सुपरवाइजरुं की अगुवाई मा वार्डवार डोर-टू-डोर सघन अभियान चलये जौ. अभियान मा सुपरवाइजरुं का अलावा आशा कार्यकर्ताऊं और एएनएमै भी मदद लिये जौ. या का तहत नगर निगम की टीम हर रोज 100 घौरुं मा जाली.
