अपणुं उत्तराखंडः दिनभरै खास खबर, एक नजर मा

काशीपुर मा BJP प्रादेशिक प्रशिक्षण शिविर कु समापन,देहरादून मा कांग्रेस कु विरोध प्रदर्शन,ऐदी गौ मा सेब दिवस कार्यक्रम,पुल शटरिंग गिन्न का मामला मा बड़ू एक्शन, ईनी बड़ी दिनभरै खास खबर, एक नजर

BJP प्रादेशिक प्रशिक्षण शिविर कु समापन: काशीपुर मा आज बीजेपी का प्रदेश प्रशिक्षण शिविर कु आज आखिरी दिन छौ. कार्यक्रम समापन समाराहो का मौका पर सीएम धामी आज काशीपुर पौंछिन. ज्या का बाद ऊंन ये कार्यक्रम मा शिरकत करी. ये दौरान सीएम धामी न कार्यकर्ताऊं थै अनुशासन कु पालन और संगठन का प्रति ईमानदारी से काम कन्नै बात बोली.

आंगनबाड़ी कार्यक्रत्री पुरस्कार शुरू करली धामी सरकार: धामी सरकार तीलू रौतेली पुरस्कार का दगड़ि ही आंगनबाड़ी कार्यक्रत्री पुरस्कार भी शुरू कन्न वाली च. कैबिनेट मंत्री रेखा आर्य न बथै सभी जिलों बटी यां कु थै आंगनबाड़ी वर्करुं की लिस्ट मंगै गी. 8 अगस्तौ तीलू रौतेली पुरस्कार का दगड़ि ही आंगनबाड़ी वर्करुं थै भी सम्मानित किये जाली, ज्या कु थै लेकी कार्य योजना भी तैयार ह्वे गी. यां मा ऊं महिलाऊं थै सम्मानित किये जालू जौन शिक्षा, समाज, पर्यावरण सहित अन्य क्षेत्रूं मा उत्कृष्ट कार्य करी हो.

देहरादून मा कांग्रेस कु विरोध प्रदर्शन: नेशनल हेराल्ड केस मामला मा आज कांग्रेस अध्यक्षा सोनिया गांधी थै ED न तलब करी. ज्या का विरोध मा पूरा देश मा कांग्रेस न प्रदर्शन करी. ई कड़ी मा देहरादून मा भी नेता प्रतिपक्ष यशपाल आर्य और कांग्रेस प्रदेश अध्यक्ष करन माहरा का नेतृत्व मा जोरदार प्रदर्शन ह्ववे. ईडी कार्यालय का भैर प्रदर्शन कन्ना वाला कांग्रेस नेताऊं थै पुलिस न हिरासत मा लेकी पुलिस लैन भेजी. ये दौरान कांग्रेस नेताऊं न जांच एजेंसियूं का गलत इस्तेमालै बात बोली.

रुड़की मेयर गौरव गोयल बढिन मुश्किल: रुड़की नगर निगम का मेयर गौरव गोयल का मामला मा आज नैनीताल हाईकोर्ट मा सुणवै ह्वे. मामला थै सुणना बाद मुख्य न्यायधीशै अध्यक्षता वाली खंडपीठ न सरकार थै नगर निगम एक्ट की संशोधित धारा 16 का अंतर्गत द्वी मैना का भीतर कार्रवाई कन्ना निर्देश दिनी. गौरव गोयल पर जमीनै लीज बढ़ौण का एवज मा 25 लाख रुप्या फोन कर मंगणौ आरोप च. ये मामला मा ऊंकु वॉइस सैंपल भी लिये गी छौ, जु फोरेंसिक जांच में सही पये गी.

ऐदी गौ मा सेब दिवस कार्यक्रम: टिहरी का ऐदी गौ का नारायण उद्यान मा आज सेब दिवस कार्यक्रम कु आयोजन करे गी. ज्या मा प्रदेश का कृषि मंत्री गणेश जोशी न शिरकत करी. गणेश जोशी न दीप प्रज्वलित कर सेब दिवस कार्यक्रम कु शुभारंभ करी. ये दौरान गणेश जोशी न बोली आज किसानूं थै नई टेक्नोलॉजी दगड़ि कृषि और बागवानी का क्षेत्र मा अगनै बढ़ण चयेदुं. ऊंन बोली प्रधानमंत्री नरेन्द्र मोदी की किसान सम्मान निधि योजना से हर किसान थै फायदा मिल्नू च.

किच्छा मा कैदियूं थै हाईटेक जेल: उत्तराखंडै जेलूं मा अत्यधिक कैदियूं की संख्या थै देखी उधमसिंह नगर मा अत्याधुनिक जेल कु निर्माण किये जांणू च. ई जेल का निर्माण द्वी फेज मा पूरु किये जालू. पैलू फेज का निर्माण कार्य शुरू ह्ले गी. पैला फेज मा 480 कैदियूं थै कारागार बणये जांणू च. या जेल किच्छा का रजपुरा गौ मा 40 एकड़ मा बणये जांणी च. ई जेल मा करीब 2,580 कैदी राला. ई जेल कु काम जुलाई 2023 तक पूरू ह्वे जालू.

पुल शटरिंग गिन्न का मामला मा बड़ू एक्शन:रुद्रप्रयाग का नरकोटा का समणि ऑल वेदर रोड का निर्माणाधीन पुलै शटरिंग गिन्ना का मामला मा कंपनी का प्रोजेक्ट मैनेजर और सहायक इंजीनियर पर कार्रवाई करेली. ये मामला मा द्वी यूं थै जेल भेजेली. बुधवारौ ये हादसा मा 3 मजदूरुं की मौत ह्ले गी छै. मजदूरुं का परिजनूं की तहरीर पर प्रोजेक्ट मैनेजर और सहायक इंजीनियर का खिलाफ मुकदमा दर्ज करे गी छौ.

उत्तराखंड मा मौसम कु रेड अलर्ट: उत्तराखंड मा मौसम विभाग न रेड अलर्ट जारी करर्यूं च. ज्या का बाद आपदा प्रबंधन विभाग एक्शन मा च. उत्तराखंड आपदा प्रबंधन विभाग न हालात थै देखी यात्रा मार्गूं का दगड़ा ही अन्य 400 जगहूं पर जेसीबी मशीन लगई छन. यां का दगड़ा ही प्रदेश मा आपदा का हालातू से निपटणौ पांच जगहूं पर एनडीआरएफै तैनाती भी करी च. प्रदेश मा अलर्ट का बाद 9 जनपदूं मा स्कूलूं थै एहतियात का तौर पर बंद करे गी.

मानसूनै दस्तक दगड़ि डेंगू कु खतरा: मानसूनै दस्तक का दगड़ि ही नगर निगम और स्वास्थ्य विभाग का अधिकारियूं थै डेंगू फैन्नै चिंता सतौण लग गी. नगर आयुक्त न अफसरुं थै हिदायत दिनी कि नगर निगम का सभी सुपरवाइजरुं की अगुवाई मा वार्डवार डोर-टू-डोर सघन अभियान चलये जौ. अभियान मा सुपरवाइजरुं का अलावा आशा कार्यकर्ताऊं और एएनएमै भी मदद लिये जौ. या का तहत नगर निगम की टीम हर रोज 100 घौरुं मा जाली.

उत्तराखंड मा थमी कोरोना की रफ्तार: उत्तराखंड मां धीरे-धीरे कोरोना का मामला कम होंणा छन. आज प्रदेश मा कोरोना का 183 नया मामला समणि ऐनी, ज्या का बाद प्रदेश मा कोरोना संक्रमितू की संख्या 95,347 ह्वे गी, जबकि यां से मन्न वालौ की संख्या 286 च. प्रदेश मा कोरोना संक्रमित मरीजुं की रिकवरी रेट 96.10% च.