उत्तराखंड मा राष्ट्रपति चुनाव संपन्न: उत्तराखंड मा आज राष्ट्रपति चुनाव थै लेकी मतदान विधानसभा भवन देहरादून मा संपन्न ह्वे. राष्ट्रपति चुनाव मा प्रदेश का 67 विधायकूं न ही अपणु वोट डाली. कैबिनेट मंत्री चंदन राम दास बीमार होंण का कारण ये मतदान मा हिस्सा नी ले सकीन. वखी, कांग्रेस विधायक तिलक राज बेहड़ भी बीमार छन, बदरीनाथ विधानसभा बटी कांग्रेस विधायक राजेंद्र भंडारी भी मतदान कन्नौ नी पौंछिन.
शहीद का परिवार से सीएम धामी न करी मुलाकात:राष्ट्रीय राइफल्स का शहीद जवान प्रवीन सिंह गुसाईं का परिजनूं से आज सीएम पुष्कर सिंह धामी न मुलाकात करी. ये दौरान सीएम धामी न शहीद का परिवार थै हर संभव मदद कु आश्वासन दिनी. बथै द्या 2 जून सुबेर प्रवीन सिंह जम्मू कश्मीर का शोपियां मा आतंकवादियूं का खिलाफ सर्च ऑपरेशन का दौरान शहीद ह्वे गी छा. प्रवीन सिंह गुसाईं टिहरी जिला की नैलचामी पट्टी का पुंडोली गौं का रौंण वाला छा.
आंगनबाड़ी कार्यक्रत्री पुरस्कार शुरू करली धामी सरकार: धामी सरकार तीलू रौतेली पुरस्कार का दगड़ि ही आंगनबाड़ी कार्यक्रत्री पुरस्कार भी शुरू कन्न वाली च. कैबिनेट मंत्री रेखा आर्य न बथै सभी जिलों बटी यां कु थै आंगनबाड़ी वर्करुं की लिस्ट मंगै गी. 8 अगस्तौ तीलू रौतेली पुरस्कार का दगड़ि ही आंगनबाड़ी वर्करुं थै भी सम्मानित किये जाली, ज्या कु थै लेकी कार्य योजना भी तैयार ह्वे गी. यां मा ऊं महिलाऊं थै सम्मानित किये जालू जौन शिक्षा, समाज, पर्यावरण सहित अन्य क्षेत्रूं मा उत्कृष्ट कार्य करी हो.
टिहरी पौंछिन त्रिवेंद्र सिंह रावत : पूर्व मुख्यमंत्री त्रिवेंद्र सिंह रावत आज टिहरी पौंछिन. जख बीजेपी कार्यकर्ताऊं न ऊंकु जोरदार स्वागत करी. ये दौरान त्रिवेंद्र सिंह रावत न बोली प्रदेश का विकास और स्वरोजगार थै पर्यटन एक बड़ू साधन च. ऊंन बोली टिहरी झील थै स्वीकृत 2100 करोड़ की धनराशि से ये जनपद मा औंण वाला समय मा विश्व स्तरीय पर्यटन स्थल बणला. ऊंन बोली टिहरी जिला मा साहसिक पर्यटन थै लेकी भविष्य मा बहुत संभावना छन.
काशीपुर मा होलू भाजपा कु प्रशिक्षण शिविर: भाजपा प्रदेश अध्यक्ष मदन कौशिक न संगठन का कार्यक्रमूं की जानकारी दिनी. ऊंन बथै 19 से 21 जुलाई तक भाजपा प्रदेश प्रशिक्षण शिविर का आयोजन काशीपुर मा किये जालू. यां कु थै लेकी संगठनै ओर से तैयारी तेज ह्वे गीन. मदन कौशिक न बोली ये प्रशिक्षण शिविर का आयोजन थै लेकी अच्छा कार्यकर्ताऊं थै जल्द ही दायित्व दिये जालू.
परिवहन अधिकारी दिनेश चंद्र पठोई बहाल:संभागीय परिवहन अधिकारी दिनेश चंद्र पठोई थै बहाल करे गी. या कु थै लेकी परिवहन सचिवै तरफा बटी बकायदा आदेश भी जारी करे गी. दिनेश चंद्र पठोई थै विभागीय जांच मा क्लीन चिट मिन्ना बाद यू आदेश जारी करे गीन. बछै द्या 18 मई कु सीएम पुष्कर सिंह धामी का औचक निरीक्षण मा दिनेश चंद्र पठोई दफ्तर मा नी मिली छा, ज्या का बाद सीएम धामी न ऊंथै सस्पेंड करी छौ.
किच्छा मा कैदियूं थै हाईटेक जेल: उत्तराखंडै जेलूं मा अत्यधिक कैदियूं की संख्या थै देखी उधमसिंह नगर मा अत्याधुनिक जेल कु निर्माण किये जांणू च. ई जेल का निर्माण द्वी फेज मा पूरु किये जालू. पैलू फेज का निर्माण कार्य शुरू ह्ले गी. पैला फेज मा 480 कैदियूं थै कारागार बणये जांणू च. या जेल किच्छा का रजपुरा गौ मा 40 एकड़ मा बणये जांणी च. ई जेल मा करीब 2,580 कैदी राला. ई जेल कु काम जुलाई 2023 तक पूरू ह्वे जालू.
मानसूनै दस्तक दगड़ि डेंगू कु खतरा: मानसूनै दस्तक का दगड़ि ही नगर निगम और स्वास्थ्य विभाग का अधिकारियूं थै डेंगू फैन्नै चिंता सतौण लग गी. नगर आयुक्त न अफसरुं थै हिदायत दिनी कि नगर निगम का सभी सुपरवाइजरुं की अगुवाई मा वार्डवार डोर-टू-डोर सघन अभियान चलये जौ. अभियान मा सुपरवाइजरुं का अलावा आशा कार्यकर्ताऊं और एएनएमै भी मदद लिये जौ. या का तहत नगर निगम की टीम हर रोज 100 घौरुं मा जाली.
उत्तराखंड मा थमी कोरोना की रफ्तार:उत्तराखंड मां धीरे-धीरे कोरोना का मामला कम होंणा छन. आज प्रदेश मा कोरोना का 117 नया मामला समणि ऐनी, ज्या का बाद प्रदेश मा कोरोना संक्रमितू की संख्या 94,827 ह्वे गी, जबकि यां से मन्न वालौ की संख्या 283 च. प्रदेश मा कोरोना संक्रमित मरीजुं की रिकवरी रेट 96.10% च.
