अपणुं उत्तराखंडः दिनभरै खास खबर, एक नजर मा

अपणुं उत्तराखंड मा देखा, दिनभरै खास खबर, एक नजर मा

आज बटि हरिद्वार महाकुंभे शुरुआत ह्वे गी. आज निरंजनी अखाड़ा न अपणिं पेशवाई निकाली. यू कुंभे पेहली पेशवाई छे. इंमा मुख्यमंत्री त्रिवेंद्र सिंह रावत भी पौंछी छा. ऊं संतों दगड़ी मुलाकात भी करी. एक हेलीकॉप्टर और द्वी ग्लाइडर बटि संत और महंतों पर फूलों की बारिश ह्वे. ऊंट, हाथी, चांदी कु सिंहासन और रथ पेशवाई मा मुख्य आकर्षण का केंद्र रे. साथ ही कोविड नियमों कु भी संदेश दिये गे.

पेशवाई का दौरान पेहली बार हरिद्वार मा उत्तराखंडे लोक संस्कृति की झलक दिखी. जेमा ढोल-दमाऊ की थाप पर संत खूब नाचिन. महाकुंभ मा पेशवाई का दौरान संतों कु अलग-अलग रंग भी दिखी. पेशवाई मा नागा साधु भी नजर ऐन.

धर्मनगरी हरिद्वार मा आज पेशवाई का दौरान खूब रंगत दिखी. केंद्रीय ग्रामीण विकास राज्यमंत्री निरंजन ज्योति भी निरंजनी अखाड़ी की पेशवाई मा बतौर महामंडलेश्वर पौंछिन. ऊं ईटीवी भारत दगड़ी खास बातचीत करी. ऊं बोली कि कोरोना वायरस की पाबंदियूं का बाद भी पेशवाई भव्य रे. जेसे वू खुश छिन. साथ ही ऊं लौखुं से ऐहतियाते अपील करी.

आज विधानसभा सत्रे तीसरे दिनी कार्यवाही का दौरान विपक्ष न खूब हंगामा करी. सदन की कार्यवाही का दौरान विधायक राजकुमार न पुरोला ते नयु जिला बणोंणे मांग करी. वखि, भाजपा विधायक देशराज कर्णवाल न भी बेरोजगारी मुद्दा ते उठे.

कोटद्वार कु नयु नाम होलु कण्व नगरी कोटद्वार, सीएम न लगे मुहर

आज मुख्यमंत्री त्रिवेंद्र सिंह रावत न कोटद्वार ते कण्व नगरी कोटद्वार पर मुहर लगेली. हालांकि अध्यादेश जारी होंणा बाद आज सरकार की तरपां बटि नोटिफिकेशन जारी ह्वे.

भोल मुख्यमंत्री त्रिवेंद्र सिंह रावत गैरसैंण विधानसभा सत्र का चौथा दिन अपणिं सरकार कु अंतिम बजट पेश करला. जनता का साथ विपक्ष ते भी बजट से खास उम्मीद च. वखि, अगला साल होंण वला विधानसभा चुनाव का मद्देनजर भी यू बजट खास रोलु.

गैरसैंण मा सोमवार का दिन घाट-नंदप्रयाग मोटर मार्ग चौड़ीकरण खुंण ग्रामीणों न प्रदर्शन करी छो. जेमा ऊंकी पुलिस दगड़ी झड़प भी ह्वे. जेपर विपक्ष न पुलिसकर्मियूं पर प्रदर्शनकारियूं पर लाठी चलोंणे आरोप लगे. मामला मा अब नयु वीडियो समणिं ऐ. जेमा ग्रामीण एसपी राजेश भट्टे वर्दी फाड़ना छिन. मामला मा सीएम त्रिवेंद्र सिंह रावत पेहली ही मजिस्ट्रियल जांच का आदेश दे चुका छिन.

देहरादून बटि दिल्ली जांण वलों ते खुशखबरी च. मौसम मा बदलाव का वजह से उत्तराखंड परिवहन निगम न दिल्ली मार्ग पर वॉल्वों की संख्या बणेली. वॉल्वो की संख्या पेहली जख 8 छे अब 13 ह्वे गिन.