अपणुं उत्तराखंडः दिनभरै खास खबर, एक नजर मा

अपणुं उत्तराखंड मा देखा, दिनभरै खास खबर, एक नजर मा

धर्मनगरी हरिद्वार मा कुंभ कु आगाज ह्वे गी. आज श्री पंचायती अखाड़ा निरंजनी और आनंद अखाड़ा न बड़ी धूमधाम का साथ पेहली धर्मध्वजा की स्थापना करी. इं मौका पर पुलिस और प्रशासन समेत तमाम संत लोग मौजूद छा. यू धर्मध्वजा 52 फीटे ऊंचे पर लगे गी.

आज आनंद अखाड़ा न भोलागिरी आश्रम का पीठाधीश्वर स्वामी तेजसानंद सरस्वती ते महामंडलेश्वर नियुक्त करी. संतो न चादर ओढ़ेकी ऊंकु पट्टाभिषेक करी.

जोशीमठ का रैणी गौं मा राहत बचाव कार्य जारी च. आज सुबेर द्वी और शव मिलिन. मन्न वलों की संख्या 72 ह्वे गी. आज पूर्व केंद्रीय मंत्री और भाजपा नेता उमा भारती रैणी गौं पौंछी. ऊं आपदा प्रभावित इलाकों कु दौरा करी और लौखुं दगड़ी मुलाकात करी.

रुड़की का कुरड़ी गौं मा लोग गंदु पाणिं की समस्या से परेशान छिन. पिछला 6 माह से लगातार शिकायत का बाद भी ऊंकी समस्या नि सुधरी. आज स्थानीय विधायक देशराज कर्णवाले ब्वारी गौं पौंछी. लेकिन ग्रामीणों न ऊंकी एक न सुनी और खूब खरी-खोटी सुने.

नेता प्रतिपक्ष इंदिरा हृदयेश कु बोन्न च कि ऊंका खिलाफ दुष्प्रचार चन्नु च कि वू कांग्रेस बटि बीजेपी ज्वाइन कर सकदिन. ऊं बोली कि बीजेपी नेता यू दुष्प्रचार कन्ना छिन. ऊं ऊंका खिलाफ मुकदमा दर्ज कन्ने चेतावनी दिनी.

आज माघ पूर्णिमा पर हरिद्वार मा सुबेर बटि लोग स्नान खुंण पौंछिन. बड़ी संख्या मा श्रद्धालु न गंगा स्नान करी. इं मौका पर पुलिस और प्रशासने सुरक्षा व्यवस्था चाक-चौबंद रे. साथ ही श्रद्धालुओं ते कोविड गाइडलाइन कु पालन अनिवार्य छो.

पुलिस भर्ती मा आयुसीमा 30 बटि 35 कन्न मामला मा उत्तराखंड लोक सेवा आयोग न स्पष्टीकरण दे. साफ करी कि आयोग का तरपां बटि यू संशोधन मुमकिन नि च.

विजय हजारे ट्रॉफी मा उत्तराखंडे टीम कु धमाकेदार प्रदर्शन जारी च. आज उत्तराखंड टीम न मिजोरम ते 8 विकेट से हरे. उत्तराखंडे टीम की यू लगातार चौथी जीत च.