अपणुं उत्तराखंडः दिनभरै खास खबर, एक नजर मा

अपणुं उत्तराखंड मा देखा, दिनभरै खास खबर, एक नजर मा

देश मा कोरोना कू कहर

देश मा कोरोना कू कहर कम नि होंणू च. अब तलक देश मा कोरोना का 2 लाख 16 से ज्यादा केस ह्वे गिन. वखि, 6 हजार से ज्यादा लोखुं मौत ह्वे गी. पिछला 24 घंटा का भीतर 4600 से ज्यादा केस ऐ गिन.

भारत और ऑस्ट्रेलिया के बीच सात समझौता पर हस्ताक्षर

प्रधानमंत्री नरेंद्र मोदी और ऑस्ट्रेलिया का पीएम स्कॉट मॉरिसन का बीच वर्चुअल शिखर वार्ता ह्वे. जैमा द्वी देशों का बीच सात अहम समझौतों पर हस्ताक्षर ह्वेन. यू पेहली बार च जब पीएम मोदी न क्वी विदेशी नेता का साथ ऑनलाइन 'द्विपक्षीय' शिखर वार्ता करि. बातचीत का दौरान पीएम मोदी न बोली कि भारत और ऑस्ट्रेलिया का बीच दोस्ती कू यू सही मौका च.

उत्तराखंड मा कोरोना कू कहर

उत्तराखंड मा भी कोरोना का केस लगातार बढ़ना छिन. आज शाम 4 बजि तक 60 नया केस समणी ऐन. जैका बाद प्रदेश मा कोरोना का कुल 1145 केस ह्वे गिन. जैमा 286 लोग ठीक होकर अपणु घौर चल गिन. देहरादून जिला मा सबसे ज्यादा 323 केस छिन.

24 घंटा मा द्वी कोरोना मरीजों की मौत

उत्तराखंड मा कोरोना संक्रमण का साथ-साथ मौत कू आंकड़ा भी लगातार बढ़णु च. पिछला 24 घंटा का भीतर प्रदेश मा 2 लौखुं मौत ह्वे गी. ब्यालि 25 साले एक नौनी मौत ह्वे छे और आज एक 26 सालक नौन न ऋषिकेश एम्स मा दम तोड़ी. प्रदेश मा कुल 10 लौखुं मौत ह्वे गी. हालांकि सरकार का ओर से बयान ऐ कि यू लौखुं मौत कोरोना का कारण नि अन्य बीमारी का कारण ह्वे.

हाई कोर्टे फटकार का बाद जागी त्रिवेंद्र सरकार, कांग्रेस न साधी निशाना

हाईकोर्टे फटकार का बाद जागी त्रिवेंद्र सिंह रावत सरकार न ग्रामीण इलाकुं का क्वारंटाइन सेंटरों मा रख-रखाव और अन्य सुविधौं ते 49 करोड़ रुपया जारी करी. वखि, अब मामला मा कांग्रेस न चुटकी ले. बोली कि सरकार ते होश ही कख च, अगर कोर्ट का तरपां बटि आदेश नि ओंदू त सरकार शायद की काम कन्न वलि छे.

प्रवासी की राजस्व अभिरक्षा मा मौत, पटवारी सस्पेंड

गुजरात बटि अपणु घौर पौंछी एक प्रवासी की राजस्व अभिरक्षा मा मौत मामला बड़ी कार्वे ह्वे. अल्मोड़ा का जिला प्रशासन न पटवारी ते सस्पेड करिकी जांचक आदेश दे. बते जांणूं च कि नौना ते कुछ दिन पेहली राजस्व पुलिस न अभिरक्षा मा ले छो. जैका बाद वेकी मौत ह्वे गी छे. वे नौना का शरीर मा चोट का गहरा निशान भी छा.

ALT Balaji का वेब सीरीज पर नाराज संत समाज, सेना कू अपमान कन्नो आरोप

हरिद्वार का संत समाज न एकता कपूर का ALT Balaji पर 'XXX: Uncensored 2' का एक सीन पर आपत्ति जते. संत समाज कू आरोप च फिल्म मेकर का ओर से यू वेब सीरीज मा सेना कू अपमान कन्ने कोशिश ह्वे. संत समाज का ओर से मामला मा विरोध दर्ज ह्वे और कार्वै मांग करि.

सस्ती दरों मा बिजली बेचणं ते मजबूर यूपीसीएल

लॉकडाउन मा छूट और बढ़ती गर्मी का कारण प्रदेश में विद्युत खपत मा त बढ़ोतरी ह्वे गी. लेकिन अभी भी यूपीसीएल केंद्रीय ग्रिड ते 2 से 3 मिलियन यूनिट बिजली सस्ती दरों मा बेचण ते मजबूर च.

किसाने मेहनत लाई रंग, गिनीज बुक ऑफ वर्ल्ड रिकॉर्ड मा नाम दर्ज

अल्मोड़ा जिला का बिल्लेख गौं का किसान गोपाल दत्त उप्रेति न जैविक खेती से करि कमाल. 7 फुट एक इंच लंबू धनिया कू पौधा उगै. गिनीज बुक ऑफ वर्ल्ड रिकॉर्ड मा नाम दर्ज.

भोल लगलू पूर्ण चंद्रगृहण

5 जून का दिन पूर्ण चंद्र ग्रहण च. चंद्र ग्रहण 5 जूने रात करीब 11 बजकर 15 मिनट पर शुरू होलू, जू 6 जून तड़के ढाई बजि तक रोलू.