देश मा कोरोना कू कहर
देश मा कोरोना कू कहर कम नि होंणु च. देश मा कोरोना का केस 1 लाख 90 हजार का पार पोंछगिन. वखि, मौत कू आंकड़ा 5300 का पार पोंछगी.
मोदी कैबिनेट न गरीबों ते खोली खजाना
मोदी सरकार 2.0 कू पेहलू साल पूरू होंणा बाद पेहली कैबिनेट बैठक मा लिए गिन कई अहम फैसला. सबसे बड़ी बात सरकार न गरीबों ते खोली खजांणु. रेहड़ी, पटरी वालों ते 10 हजारे मदद. 50 लाख रेहड़ी पटरी वलुं ते मिलेलु लाभ.
उत्तराखंड मा भी कोरोना कू कहर
देवभूमि उत्तराखंड मा भी कोरोना संक्रमण तेजी से अपणु पैर पसारणुं च. शाम 4 बजि तक प्रदेश मा 23 और कोरोना मरीज समणि एन. जैका बाद उत्तराखंड का कोरोना मरीजों की संख्या 929 पोंछगी.
सतपाल महाराजे का परिवार मा एक निकली कोरोना नेगेटिव
उत्तराखंड का कैबिनेट मंत्री सतपाल महाराज और उंकू पुरू परिवार का 5 लोग कोरोना पॉजिटिव छिन. वखि, ऊंकू छोटू नौनू कोरोना नेगेटिव निकली. उधर, सतपाल महाराज और उंकू परिवार का 5 अन्य लोखुं ते ऋषिकेश एम्स मा भर्ती करि गे. जख उंकू इलाज चन्नू च.
उत्तराखंड कैबिनेट ह्वे होम क्वारंटाइन
29 मई का दिन सतपाल महाराज उत्तराखंड कैबिनटे मीटिंग का पोंछी छा. अब किलेकी वू कोरोना पॉजिटिव छिन, त एहतियातन पुरू उत्तराखंड कैबिनेट होम क्वारंटाइन ह्वे गी. आज शासकीय प्रवक्ता मदन कौशिक न बयान जारी करेकी बोली कि मुख्यमंत्री त्रिवेंद्र सिंह रावत समेत तमाम मंत्री और सचिवालय का आईएएस और पीसीएस अफसर सेल्फ क्वारंटाइन मा चलगिन.
हरियाणा का पूर्व सीएम हुड्डा का भतीजा का पेट्रोल पंप मा लूट
उधम सिंह नगर जिला का बाजपुर क्षेत्र मा आज बड़ी घटना ह्वे. तीन नकाबपोश बाइक सवार बदमाशो न तमंचा का नोंक पर एक पेट्रोल पंप लूटेली. यू पेट्रोल पंप हरियाण का पूर्व सीएम भूपेंद्र सिंह हुड्डा का भतीजो च. पूरी वारदात पंप का पास लग्यूं सीसीटीवी कैमरा पर कैद ह्वे गी. पुलिसक जांच शुरू.
आज रुड़की पोंछी पेहली ट्रेन, पोंछिन 32 प्रवासी
लॉकडाउन मा फस्यां उत्तराखंड का यात्रियों ते लेकी आज पेहली ट्रेन रुड़की रेलवे पोंछी. जेमा 32 यात्री रुड़की रेलवे स्टेशन पोंछी. यात्रियों मा अधिकांश रुड़की का रोंण वला छिन. ऊंते फर्स्ट क्वारंटाइन का बाद निजी वाहनों बटि घौर भेजी जोलू.
पिछला 5 सालों मा 23 बाघों की मौत
कॉर्बेट नेशनल पार्क मा बाघों कू अस्तित्व खतरा मा. पिछला 5 सालों मा यख 23 बाघों की मौत ह्वे गी. जेमा एक बाघे मौत सांप का कटणं से ह्वे जबकि एक आपसी संघर्ष मा मौरी छो. उधर, बाघों मौत पर वन्यजीव प्रेमी और पर्यावरणविद खासा कॉर्बेट प्रशासन का खिलाफ नाराज छिन.
आज खुल गी फूलों की घाटी
चमोली जिला मा विश्व प्रसिद्ध फूलों की घाटी आज खुल गी. जेमा प्रशासन न सभी तैयारियां पूरी करेली. हालांकि कोरोना वायरस का कारण अभी यख पर्यटकों कू आवाजाही पर रोक च.
गंगा दशहरा पर्व पर श्रद्धालुओं न लगे आस्थे डुबकी
गंगा दशहरा पर्व पर आज श्रद्धालुओं न गंगा मा आस्थे डुबकी लगे. साथ ही पूजा- अर्चना कर सुख-समृद्धि कामना करि. हालांकि कोरोना महामारी का कारण इं बार लोग बाग हरकी पैड़ी का ब्रह्मकुंड मा नि पोंछिन.
