देश मा कोरोना कू कहर
देश मा कोरोना कू कहर लगातार बढ्नु च. दिल्ली एम्स मा मेडिसिन विभाग का पूर्व एचओडी प्रो. पांडे की कोरोना से मौत ह्व़े गी. देश मा कोरोना का अब तलक 131868 केस छिन. जेमा 54441 लोग ठीक ह्व़े गिन, त 3867 लोखुं मौत ह्व़े गी.
महाराष्ट्र मा एक साधू की हत्या
महाराष्ट्र का नांदेड़ का एक आश्रम मा एक साधु की हत्या ह्व़े गी. पुलिस ते अभी हत्या कु मकसद नि पता ह्व़े, लेकिन मामला मा जांच शुरू करे ली.
उत्तराखंड मा पैर पसारणु कोरोना
उत्तराखंड मा कोरोना कू प्रकोप लगातार बढ्नु च. आज देहरादून मा एक और मरीज मिन्न से प्रदेश मा कोरोना संक्रमित मरीजों की संख्या 298 ह्व़े गी. हालांकि प्रदेश मा 238 कोरोना केस एक्टिव छिन. ब्याली रात ऋषिकेश एम्स मा कोरोना पीड़ित एक मेहला की मौत ह्व़े गी छे.
खाई मा फरकी कार, द्वी आदिम घायल
टिहरी जिला का जाखणीधार-दणोली गौ से पेहली गराकोट मोटर मार्ग का पास एक ऑल्टो कार खाई मा फरकी. हादसा मा द्वी आदिम घायल छिन. द्वीयों ते अस्पताल मा भर्ती करी गे. जेमा एक मेहला की हालत नाजुक बते जाणी च.
पुलिस न निभे बीटा कु फर्ज
लॉकडाउन का दौर मा उत्तराखंड पुलिस कू नयु चेहरा समणी ऐ. ब्याली रात ऋषिकेश एम्स मा कोरोना संक्रमित मेहला की मौत ह्व़े गी छे. आज पुलिस टीम न वेकू अंतिम संस्कार करी.
कोरोना अस्पताल पोंछिन सीएम त्रिवेंद्र
पहाड़ मा कोरोना का दस्तक और येते कम कन्नो श्रीनगर मेडिकल कॉलेज मा कोविड-19 अस्पताल तैयार च. इं कड़ी मा आज सीएम त्रिवेंद्र सिंह रावत न अस्पताल पोंछिकी व्यवस्थाओं कू जायजा ले.
कोरोना मरीज मिन्ना बाद द्वी किलोमीटर कू एरिया कंटेनमेंट जोन घोषित
हरिद्वार जिला का बहादराबाद थाना क्षेत्र का गणपति एन्क्लेव मा भी ब्याली रात एक कोरोना मरीज मिली. जेका बाद स्वास्थ्य और पुलिस टीम न वेकु घोर सील करेली और द्वी किलोमीटर तक कू एरिया ते कंटेनमेंट जोन घोषित करे ली.
ट्रेनी पायलटों ते उड़ाने परमिशन मिली
पंतनगर एयरपोर्ट बटी 56 ट्रेनी पायलटों मा से सिर्फ 10 ट्रेनी पायलटों ते एक टेमे उड़ान भन्ने परमिशन मिल गी. हालांकि सोशल डिस्टेंसिंग कू पालन जरुरी होलू. जेका बाद एयरपोर्ट बटी सिंगल और डबल इंजन का छोटा एयरक्राफ्ट न उड़ान शुरू करे ली.
वन कर्मियों दगड़ी मारपीट मामला मा 17 का खिलाफ मुकदमा
टिहरी रेंज का एक वन कर्मी और द्वी अन्य कर्मचारियों दगड़ी मारपीट और लूट मामला मा पुलिस अब हरकत मा ऐ गी. पीड़ित लोखुं का शिकायत पर राजस्व पुलिस न द्वी लोखुं का खिलाफ नामजद और 15 का खिलाफ अज्ञात मा मुकदमा दर्ज करी.
भोल मने जाली ईद, घोर मा नमाज पढ़ने अपील
जम्मू कश्मीर और केरल मा आज ईद कू त्यौहार मने गे. लेकिन दिल्ली का शाही इमाम का ऐलान का बाद बाकी राज्यों मा भोल मने जाली ईद. नैनीताल जामा मस्जिद कमेटी और प्रशासन न लॉकडाउन का कारण रोजेदारों ते अपणु घोर पर ही नमाज पढ़ने अपील करी.
