24 घंटा का भीतर देश मा 80 से ज्यादा लोखुं मौत
देश मा कोरोना कू कहर जारी च. अब तलक कोरोना का कुल 70756 केस ऐ गिन. मौत कू आंकड़ा बड़ीकी 2293 पोंछी. वखि, राहत वली बात यू च कि 22455 लोग ठीक भी ह्व़े गिन.
दिनभरै खास खबर, एक नजर मा आज पांचवी बार देश ते सम्बोधित करला पीएम
कोरोना संकट का बीच आज पांचवी बार प्रधानमंत्री नरेंद्र मोदी फिर देश का समणी आला. वू रात 8 बजी देश ते संबोधित करला. यन उम्मीद च कि लॉक डाउन पर फिर बडू ऐलान कर सकदिन पीएम.
आज बटी 15 रूट पर यात्री ट्रेन शुरू
भारतीय रेलवे न आज बटी कुछ चुनिंदा मार्गों पर यात्री ट्रेन शुरू करी. जेमा बड़ी संख्या मा लोखुं यात्रा करी. इं बीच लोखुं सोशल डिस्टेंसिंग कू पुरु पालन करी. ट्रेन मा सफर कन्नो यात्रियों ते कम से कम डेढ़ घंटा पेली रेलवे स्टेशन पर ओंण जरुरी च.
प्रसिद्ध गायक एसपी बालासुब्रमण्यम कोरोना वीरों ते गे एक गाणु
देश मा स्वास्थ्यकर्मी, पुलिसकर्मी, सफाईकर्मी और अन्य लोग कोरोना से जंग मा महत्वपूर्ण भूमिका निभोणा छिन. प्रख्यात गायक एसपी बालासुब्रमण्यम न गीत गाकर इं कोरोना वॉरियर्स ते धन्यवाद बोली.
उत्तराखंड मा कोरोना संक्रमितों की संख्या 69
उत्तराखंड मा कोरोना संक्रमितों की संख्या 69 ह्व़े गी. आज नैनीताल मा एक मरीज मा कोरोना वायरसे पुष्टि ह्व़े. इंसे पेहली बाजपुर मा एक ट्रक चालक पर कोरोना संक्रमण की पुष्टि ह्व़े छे. वू पंजाब कू छो. ते वास्ता वेते उत्तराखंड मा कोरोना संक्रमितों मा नि गिने जालू.
पुणे बटी ट्रेन मा हरिद्वार पोंछिन 1200 प्रवासी
आज पुणे बटी एक ट्रेन 1200 प्रवासी लोखुं ते लेकी हरिद्वार रेलवे स्टेशन पोंछी. सभी लोखुं की मेडिकल जांच का बाद ही उन्ते घोर जाने परमिशन होली. इं 1200 लोखुं मा से 700 लोग हरिद्वार का ही छिन.
प्रवासियों ते रोजगार खुंण लोन देला बैंक
पौड़ी जिला प्रशासन न बड़ी पहल करी. घोर वापसी कन्न वला प्रवासियों ते रोजगार खुंण आसान लोन देला बैंक. नियमानुसार वेते ही लोन दे जालू जू अपणु घोर मा ही स्वरोजगार शुरू करलू.
होटल व्यवसायियों ते बिजली दरों का टैक्स मा मिलेली छूट
लॉकडाउन का दौरान उत्तराखंड सरकार बटी बडू ऐलान ह्व़े सकदु, होटल व्यवसायियों ते बिजली दरों का टैक्स मा दे जाली छूट. साथ ही रीवर राफ्टिंग समेत अन्य खेलों मा नि ले जालू साल कू रिन्यूअल चार्ज.
बदरीनाथ धाम मा सिर्फ 28 लोग ही कर सकला अखंड ज्योति का दर्शन
कोरोना संक्रमण का कारण इं बार बदरीनाथ धाम मा अखंड ज्योति का दर्शन सिर्फ 28 लोग ही कर सकला. धाम का कपाट खुन्ना वक्त रावल और मंदिर कू स्टाफ ते ही धाम मा ओण अनुमति होली. बदरीनाथ धाम का कपाट इं साल 15 मई का दिन खुल्ला.
चम्पावते नौनी न अमेरिका मा करी उत्तराखंड कू नाम रौशन
कोरोना महामारी का बीच अमेरिका बटी एक अच्छी खबर ऐ. उत्तराखंड का चम्पावत जिला की रोण वली पूजा पांडेय न अमेरिके मशहूर यूनिवर्सिटी ऑफ नार्थ कैरोलिना बटी एमएससी की डिग्री पास करीकी सबसे पेहलू स्थान हासिल करी.
