अपणुं उत्तराखंडः दिनभरै खास खबर, एक नजर मा

उत्तराखंड चारधाम आणु वाल लोखूं वेरिफिकेशन होलू. कांग्रेसन देहरादून मा सर्वधर्म सभा कैरि. हरीश रावतन बोली हरीश धामी मेरो बेटा जनि. समायोजना मांग परि स्वास्थ्य कर्मी धरना पर बैठि. सीएम धामीन मॉनसून थै निपटणै तैयारी लिए बैठक करि. अपणुं उत्तराखंड मा पढ़ा, दिनभरै खास खबर.

उत्तराखंड चारधाम आणु वाल लोखूं वेरिफिकेशन होलू:उत्तराखंडा मुख्यमंत्री पुष्कर सिंह धामीन बोली कि चारधाम यात्रा मा उत्तराखंड आणु वाल लोखूं सरकार वेरिफिरेशन करली. सीएमन बोली कि चारधाम यात्रा टैम परि राज्य मा क्वे भी यन आदिम नि ऐ सकलो जे कारण हमरि धार्मिक आस्था तै ठेस पहुंचली. सीएमन बोली कि यन लोखूक हमरी सरकार वेरिफिकेशन करली. ये से पैले साधु-संतुन मांग करि छै कि उत्तराखंडा चारधाम मा गैर हिंदुओं थै प्रवेश नि दिण चैनी.

कांग्रेसन देहरादून मा सर्वधर्म सभा कैरि:उत्तराखंड कांग्रेसन आज देहरादून मा धार्मिक सद्भाव और सौहार्दै लिए सर्वधर्म समभाव प्रार्थना सभा कैरि. ये सभा मा कांग्रेसा नेताऊंल 20 मिनटौ मौन भी रखी. प्रार्थना सभा मा राष्ट्रपिता महात्मा गांधी जी थै याद करि के रघुपति राघव राजा राम भजन गैके सांप्रदायिक सौहार्द रखणै प्रार्थना कैरि. प्रार्थना सभा मा सब धर्मा धर्मगुरुन भाग लेनी.

हरीश रावतन बोली हरीश धामी मेरो बेटा जनि:कांग्रेसै सर्वधर्म समभाव प्रार्थना सभा मा पार्टी सब बड़ा नेता इकट्ठा ह्वेनी. कांग्रेस प्रदेश अध्यक्ष करण माहरान बोली बीजेपी वोट बटोरणै लिए सांप्रदायिक सौहार्द बिगाणण मा लगी छैंछ. कांग्रेसा नेताऊं रिसाण परि हरीश रावतन बोली कि हमरि पार्टी एक परिवार जन छा. परिवार मा नाराजगी ज्यादा दिन तक नि चलदी. हरीश रावतन यन भी बोली कि हरीश धामी त म्यर बेटा जन छा. धामी कांग्रेस छोड़के नि जाणू.

समायोजना मांग परि स्वास्थ्य कर्मी धरना पर बैठि:कोरोना टैम परि जूं स्वास्थ्य कर्मियों थै फूलों माला पैराइ गेछि उन थैं अब नौकरी बटि निकालि ऐली. ये विरोध मां स्वास्थ्य कर्मी देहरादून में गांधी पार्क मा धरना परि बैठि गेनी. ये लोख बोलणा छा कि कोरोना टैम परि त स्वास्थ्य विभागन उनर खूब फायदा उठायो. अब जब विभाग थै उनरि जरूरत नि छा तब नौकरी बटि निकालि ऐली. स्वास्थ्य कर्मी मांग करणा छा कि उनू थै कखि भी समायोजित करा.

बॉलीवुड सिंगर कैलाश खेरन सीएम धामी दगड़ि करि मुलाकात:बॉलीवुड सिंगर कैलाश खेरन आज मुख्यमंत्री पुष्कर सिंह धामी दगड़ि मुलाकात करि. द्वीनू मुलाकात देहरादून मा मुख्यमंत्री घौर मा ह्वेई. ये मुलाकात मा कैलाश खेरन मुख्यमंत्री धामी थै उत्तराखंडै पर्यटन, संस्कृति और आध्यात्य जन बिंदुओं परि चर्चा कैरि. कैलाश खेरन अपणि केदारनाथ धामै यात्रा अनुभव भी मुख्यमंत्री दगड़ी साझा करि.

सीएम धामीन मॉनसून थै निपटणै तैयारी लिए बैठक करि:मॉनसून हर साल उत्तराखंड मा भौत नुकसान पहुंचांदू. बरसात मा ज्यादा नुकसान ना हो ये लिए मुख्यमंत्री धामीन आज अफसरूं दगड़ी बैठक करि. मुख्यमंत्री अफसरूं थैं बोली की बरखा आण से पहले सब इंतजाम पूरा ह्वे जाण चैन. सीएमन बोली कि आपदा प्रबंधन विभाग खास तौर परि अलर्ट पर रौण चैन. मुख्यमंत्रीन बोली कि जिन जगहूं परि नुकसान होणै ज्यादा डौर छा, उन जगूं थै पहले ही चिन्हित करा.

मसूरी हाथी पांव मा बुड्या भ्योल मा गिरि:मसूरी हाथी पांव इलाका मा एक बुड्या भ्योल मा गिरि गेई. ये कारण बुड्या प्राण चलि गेनि. 61 सालौ बुड्या हरियाणा रौण वौल छा. पुलिसन बताई कि बुड्या मसूरी हाथी पांव इलाका मा घूमणौ छौ. तबैरि वू सड़क बटि भ्यां गिरि ग्येनी. लोखूंन तत्काल पुलिस थै रैबार देई. पुलिसौं जनि रैबिर मिलि उनून एसडीआरएफ थै रेस्क्यूं बोली. एसडीआरएफन भ्योल बटि हरियाणा बुड्यै लाश निकालि.

उत्तराखंडा बौणू मा आग लगि:उत्तराखंडा बौणू मा इन दिनों आग लगी छा. नैनीताला जंगलू मा जोरदार आग लगि छा. हनुमानगढ़ इलाका मा यति जोरदार आग लगी छा कि 12 से ज्यादा पथरौल आग बुझाणा छा. आग बुझाण वाल लोख तीन बार नैनीताल बटि पाणि ल्ये गेनी. ये बाद भी आग नि बुझि. पौड़ी गढ़वाला बौणू मा भी आग लगीं छा. जंगलात वालूं आग बुझाणा सारै कोशिश बेकार हूणि छा.