जयपुर/नई दिल्ली. दिल्ली मांय आज व्हैयी कांग्रेस दल री राष्ट्रीय कार्यकारिणी री बैठक मांय पार्टी री प्रमुख सोनिया गांधी आपरी पार्टी रा नेता नै साफ पैगाम दियो. सोनिया गांधी जी-23 रा नेता सू खियो कि बै खुद आज रा समय मांय पार्टी रा प्रमुख है.
मान्यो जावै कि इण बात सू सोनिया गांधी व्हा सगळा नेता री बात रो जवाब दियो है. जिखा पाछला दिना एक पाती मांय दल रै वास्तै नियमित प्रमुख री बात लिख्या हा. सोनिया गांधी खियो कि बानै साफ बोळ्योड़ी बात ही चोखी लागै है अर बानै आ कोनी भावै कि कोई मीडिया रा माध्यम सू बात करै.
सोनिया खियो कि दल रा आंतरिक चुणावा रो कार्यक्रम व्है त्यार राख्यो है. जीरा बारा मांय जाणकारी दी जावैला. व्है आ भी खिया कि सगळा जणा चावै है कि कांग्रेस दल फेर सू ऊबो हो जावै. पण इण वास्तै सगळा नै एक होर दल हित री बात करणी पड़सी. बठै ही एक समाचार एजेंसी रा माध्यम सू मिल्या समचारा रा मुताबिक 2022 तक सितंबर मांय चुणाव व्हैला.
दल का प्रमुख पै सवाल कोनी - गुलाम नबी
G-23 रै मांय आया कश्मीर रा पूर्व मुखमंत्री गुलाम नबी आजाद भी इण बर आपरी सफाई दी. व्है बोल्या कि सोनिया गांधी माथै ए सवाल कोनी हा. थानै बता देवा कि कांग्रेस रा G-23 रा नेता पाछला बरस सोनिया गांधी नै चिट्ठी लिखर बदलाव अर प्रमुख री भूमिका नै लैर आपरी बात क्ही ही. आ नेता रै मांय आनंद शर्मा, कपिल सिब्बल और गुलाम नबी आजाद भी हा. G-23 रा कई नेता सोनिया नै याद भी दिला चुक्या हैं कि जमीनी स्तर पर अबार तक कोई बदलाव कोनी हुयो है. अर कांग्रेस को ग्राफ पड़तो जा रियो है. पार्टी नै पंजाब सू लैर छत्तीसगढ़ तक संकट रो सामनो भी करणो पड्नायो है.
आ भी पढो सा- राजस्थान के सियासी बदलाव को लेकर राहुल गांधी के आवास पर चर्चा...एक घंटे की मीटिंग के बाद सीएम गहलोत जयपुर रवाना
राज्यों रा चुणाव री हताई
कांग्रेस री प्रमुख बैठक री हताई मांय लखीमपुर खीरी की घटना पै सरकार नै घेरण री नीति पर विचार री बात सामी आई है. बठै ही आगला बरस उत्तर प्रदेस रा चुणावा नै लैर भी बात व्ही. घर मांय माचता रोळा नै लैर भी दल रा लोगा री न्यारी-न्यारी चिंता है अर इपै भी बात क्ही गई है. मान्यो जावै ही इण वजह सू पाछला कुछ बरसा मांय नरा जणा पार्टी रो सात छोड़ दियो या फेर दूजा दला रै सागै गिया परा. ज्यारै मांय राहुल गांधी रा करीबी रैया ज्योतिरादित्य सिंधिया रो नाम है.
जिखा पाछला बरस कांग्रेस छोड़र BJP रो पल्लो पकड़ लियो हो. इ साल जितिन प्रसाद BJP रै मांय गिया. राजस्थान मांय मुख्यमंत्री अशोक गहलोत अर पूर्व डिप्टी CM सचिन पायलट री खींचताण चाल री है. तो पंजाब रा मुख्यमंत्री बदल्नेया पाछै भी लड़ाई कौनी रुकी. इस्या हाल मांय कांग्रेस वास्तै आपरा घर की लड़ाई सू निपटणो बड़ो काम है.
