जयपुर. प्रदेस री दो विधानसभा मांय उपचुनाव अर दो ज़िलां रा पंचायत चुणाव नै लैर दोन्यू मुख्य राजनीतिक दल कांग्रेस अर भाजपा मांय अबार की टैम सुंसाटो माच्योड़ो है. दोन्यू दला रा जैपर आळा दफ्तरां मांय पदाधिकारी सागै बड़ा नेता अर कार्यकर्ता रो मैऴो दिन-रात देखबा नै मिल रियो है. इरै मांय सबसू बड़ो काम निजर राखबा अर तालमेल नै लैर चाल रियो है. इण काज सारु बैठकां का काम भी जोरा पै है। दला रा मुख्य प्रचारक कदै दौरो करसी, इनै लैर नीति बणबा को काम भी करयो जावै है.
पढ़ें- राजस्थान: दिवाळी तांय कोनी बदले पाठसाला रो टैम
भाजपा रा प्रदेस पदाधिकारी करसी बैठक
प्रदेश भाजपा मुख्यालय पर आज सनिवार री सांझ 4 बज्या प्रदेस रा पदाधिकारी एक मोजिज बैठक राखी है. दल रा प्रमुख डॉक्टर सतीश पूनिया रा झँड़ा नीचे बैठक मांय संगठन रा सगळा पदाधिकारी अर मोर्चों रा प्रमुख भी पूगैला. बैठक नै लेर कोई आधिकारिक मसौदो तो कोनी मिल्यो है. पण मान्यो जावै है कि इण बैठक मांय उपचुनाव अर पंचायत चुनाव समेत राज्य सरकार नै सगळा मसला नै लैर आंदोलन री आगली नीति त्यार करी जाणी है.
वसुंधरा राजे री जात्रा पर भेद
पेल्या री मुखमंत्री वसुंधरा राजे नै भाजपा आपणा दल रो प्रमुख प्रचारक बणायो है. पण प्रचार अर जनसम्पर्क रा अभियान को भाग बै रैवेला या कोनी. इण बात रो भेद अबार तांय कोनी सुळझ सक्यो है. आसार है कि बै आपरी बहू री सरदा कोनी हुया सू प्रचार री मुहिम सागै कोनी जुड़ पावैला. पण इनै लैर फिलहाल कोई नेता वात करबा नै त्यार निजर नहीं आवै है. इस्यो मान्यो जावै कि राजे का आया सू भाजपा नै आ चुणावा मांय घणो लाभ व्हैयी सकै है.
