दाई-बहिनी मन संग सुवा नाचा करिस SDM रुचि

मुंगेली: भूपेश बघेल के सरकार छत्तीसगढ़ी परंपरा ल आघू बढ़ाए अउ ओला संजोए बर बड़ परयास करत हवय. अइसन म भला सरकार के अंदर म काम करईया सरकारी अधिकारी मन ह कइसे पीछे रहि. बिलासपुर-लोरमी के एसडीएम रुचि सर्मा ह गांव के दाई-बहिनी मन संग छत्तीसगढ़ के पारंपरिक लोक नृत्य सुवा करत दिखाई दिस. अधिकारी ल सुआ नाचत देख गांव के दाई-बहिनी मन ह अब्बड़ खुस दिखत हवय. गांव के दाई-बहिनी मन संग एसडीएम रुचि शर्मा के सुवा नाच ल चारो मुड़ा म पसंद करे जात हे, जेखर वीडियो ह सोसल मीडिया म अब्बड़ वायरल घलो होवत हवय. सुआ नाचा म दाई-बहिनी मन के सुख-दुख के भाव ह देखे बर मिलथे. सुआ नाचा म कोनो परकार के बाजा के उपयोग नई होवय, एमा दाई-बहिनी मन खुद ले सुवा गीत गाथे अउ ताली बजा के नाच करथे. बिसेस रुप ले एला गांव-गंवई म ज्यादा नाचे जाथे. ए मामला म लोरमी के एसडीएम रुचि शर्मा ह काहत हे कि ओखर कार्यालय म गांव के महिला मन सुआ नाचे बर आए रिहिस, अउ ओ मन ल देख के ओखरो मन सुआ नाचे के करिस अउ वहु ओखरे मन संग नाचे बर लगगे. रुचि काहत हे कि सब ल छत्तीसगढ़ परदेस के अइसन परंपरा अउ लोककला ल बचाए के हमेसा परयास करना चाही.