रेंगे बर रद्दा नई, पढ़े बर भवन नई, नक्सल के गढ़ म तभो होही पढ़ई

बीजापुर: छत्तीसगढ़ म जबर नक्सली परभावित क्षेत्र म सिक्षा के स्तिथी कइसन हे सबे जानत हे. कोनो जगह रद्दा नई हे त कोनो जगह बिजली, अब अतका कमी हे त स्कुल के बारे म तो कोनो सोच नई सकय. फेर आज अइसन फोटू आए हे, जेला देख के आप ल अपन सोच बदले ल पड़ जही. ऐ तस्वीर हरय, धुर नक्सली परभावित गांव गोरना के जिंहा 15 बछर ले बंद पड़े स्कूल ल फेर से खोले गेहे. अउ एला जिला परसासन दुवारा गांव वाले के परयास ले खोले हे. जेखर ले स्कुल फेर से चालू हो गेहे. ए गांव के बात करन त इहा आज भी बिजली- पानी के कमी हे. त बरसात के दिन म ए गांव म पहुंचाना बढ़ मुश्किल हो जथे. त खुसी के बात ए हरय की इहां के पढ़े-लिखे लईका मन ल ए स्कूल म सिक्षा दूत के नाम ले नियुक्त करे गे हे. अउ इही मन गांव के लइका मन ल पढ़ाहि.अइसन खबर थोड़े दिन पहिली सुकमा ले आए रिहिस जिंहा 13 बछर ले बंद पड़े स्कुल ल सरकार ह चालू कराये रिहिस. ए खुसी के बात हरय कि अतका नक्सल परभावित क्षेत्र अउ गोरना गांव म अतका कमी के बाउजूद सिक्षा ल बढ़ाये के परयास करे जात हे. विधायक ह काहत हे कि बचे बंद स्कुल ल जल्दी खोले के परयास करे जाही.कतका स्कुल खुल्ही ए तो अवइया बेरा ह बताहि, फेर अतका जरुर हे कि नक्सली मन के गढ़ म सरकार के बंद स्कुल खुले ले सिक्षा के क्षेत्र म उम्मीद के नवा अंजोर जाग गेहे.