સુરતના ઓલપાડ તાલુકાના તલાટીઓ 11 માગને લઈને ઉતર્યા Mass CL પર, કચેરી બંધ રહેતા સ્થાનિકોના કામ અટવાયા
રાજ્યના તલાટી મંડળે 11 જેટલી માગને લઈ છેલ્લા કેટલાય સમયથી તબક્કાવાર વિરોધ કરી રહ્યા છે. તેવામાં સુરતના ઓલપાડ તાલુકાના તલાટીઓ માસ સી.એલ. (Mass CL) પર ઉતરતા પંચાયતમાં કામ માટે આવતા સ્થાનિકો અટવાયા છે. જોકે, તલાટીઓ ઓલપાડ તાલુકા પંચાયત કચેરીની (Olpad Taluka Panchayat Office) બહાર ધરણાં કરવા માટે મંડપ પણ બાંધ્યો હતો. જોકે, જિલ્લા કલેક્ટરે ધરણાં માટે મંજૂરી રદ કરી દીધી હતી, પરંતુ કચેરીની બહાર તલાટી મંડળ ભેગું થતા કચેરીની બહાર પોલીસ બંદોબસ્ત (Police Security) ગોઠવવામાં આવ્યો હતો. એટલે તલાટીઓ વિરોધ પ્રદર્શન કરી શક્યા નહતા. તો તલાટી મંડળના પ્રમુખે જણાવ્યું હતું કે, તલાટીઓ અચોક્કસ મુદત સુધી કામથી અડગા રહીને વિરોધ નોંધાવશે. તાલુકાં પંચાયતની કચેરી (Taluka Panchayat Office) બંધ રહેતા લોકો કલાકો સુધી કચેરીની બહાર પોતાનું કામ થવાની રાહ જોઈને બેઠા હતા, પરંતુ છેવટે લોકો ઘરે પરત ફર્યા હતા.