Junagadh Accident : કેશોદમાં કાળજું કંપાવે તેવો અકસ્માત, એકટીવા ચાલક યુવતી ક્રેન નીચે આવી ગઈ
જૂનાગઢ : જિલ્લાના કેશોદ શહેરમાં સમી સાંજે રુવાડા ઉભા કરી દે તે પ્રકારની અકસ્માતની ઘટના સામે આવી છે. શહેરના માર્ગ પર ક્રેન ચાલકે બેફીકરાઈ પૂર્વક એકટીવા ચાલક યુવતીને અડફેટે લેતા તેનું ઘટના સ્થળે જ મૃત્યુ થયું છે. સમગ્ર મામલામાં કેશોદ પોલીસે અકસ્માતનો ગુનો નોંધીને વધુ તપાસ હાથ ધરી છે.
કાળજુ કંપાવી ઘટના :જૂનાગઢ જિલ્લાના કેશોદ શહેરમાં કાળજું કંપાવે તેવી અકસ્માતની ઘટના સામે આવી છે. જેમાં પ્રવિણા વાજા નામની સોંદરડા ગામની યુવતીનું ઘટના સ્થળે જ મૃત્યુ થયું છે. જેને લઈને સમગ્ર પંથકમાં ઘેરા શોકની લાગણી પ્રસરી ગઈ છે. ક્રેન ચાલકે ખૂબ જ બેફીકરાઈ પૂર્વક તેનું વાહન હંકારતા એકટીવા ચાલક યુવતીને અડફેટે લેતા પ્રવિણાબેનનું ઘટના સ્થળે કમકમાટી ભર્યું મૃત્યુ નીપજ્યું હતું. અકસ્માતની ઘટના સામે આવતા જ ખૂબ મોટી સંખ્યામાં લોકો ઘટના સ્થળે એકત્ર થયા હતા, પરંતુ અકસ્માત સર્જીને ક્રેનનો ચાલક ફરાર થયો છે. જેને પકડી પાડવા માટે પોલીસે તપાસના ચક્રો ગતિમાન કર્યા છે.
કેશોદ પોલીસે નોંધ્યો અકસ્માતનો ગુનો :સૂત્રો અનુસાર કેશોદ પોલીસ મથકના PI કે જે પટેલ સહિત પોલીસ કાફલો ઘટના સ્થળે પહોંચી ગયો હતો. યુવતીનો મૃતદેહ કેશોદ સિવિલ હોસ્પિટલે પોસ્ટમોર્ટમ માટે મોકલ્યો છે. હાલ કેશોદ પોલીસ અકસ્માતનો ગુનો નોંધીને ફરાર ક્રેન ચાલકની શોધખોળ શરૂ કરી છે. ક્રેન કોની માલિકીની છે અને ક્રેનનો ચાલક કોણ છે તેને લઈને પોલીસે તપાસ શરૂ કરી છે. સમગ્ર અકસ્માતની ઘટનાના CCTV સામે આવ્યા છે. જે કોઈપણ વ્યક્તિનું કાળજું કંપાવી નાખે તેવા છે. મૃતક યુવતી એકટીવા લઈને જઈ રહી હતી ત્યારે પાછળથી આવેલી મહાકાય ક્રેને યુવતીને અડફેટે લેતા તેનું ઘટના સ્થળે જ કમકમાટી ભર્યું મૃત્યુ થયું હતું.