વિજય શંખનાદ સાથે કોંગ્રેસના ઉમેદવારે નામાંકન પત્ર કર્યું રજૂ - Congress Arjan Bhudia in Bhuj

કચ્છ ગુજરાત વિધાનસભાની ચૂંટણીના પડઘમ વાગી ચૂક્યા છે, ત્યારે કચ્છની 6 વિધાનસભા બેઠકો માટે કોંગ્રેસ દ્વારા પોતાના પ્રબળ ઉમેદવારોને ટિકિટ ફાળવી દેવામાં આવી છે. ટિકિટ ફાળવવામાં આવેલા ઉમેદવારો પોતાના નામાંકનપત્રો ભરી રહ્યા છે, ત્યારે નામાંકન પત્ર રજૂ કરવાના છેલ્લા દિવસે ભુજ વિધાનસભા બેઠક માટેના (Bhuj Assembly seat candidate) કોંગ્રેસના ઉમેદવાર અરજણ ભુડિયાએ સવારે માધાપર સરદાર પટેલની પ્રતિમાથી વિજયના શંખનાદ સાથે રેલી કાઢવામાં આવી હતી. જેમાં બહોળી સંખ્યામાં સમર્થકો અને કાર્યકરો જોડાયા હતા. ગાંધીજીની પ્રતિમાને અરજણ ભુડિયાએ હારારોપણ કર્યું હતું, ત્યારબાદ દશનામ ગોસ્વામી સમાજવાડી ખાતે કાર્યકર્તા મિલન અને જનસભા (Congress Arjan Bhudia in Bhuj) યોજી હતી. જનસભાને સંબોધ્યા બાદ અરજણ ભુડિયાએ પોતાનું નામાંકન પત્ર કલેકટર કચેરીએ ચૂંટણી અધિકારી અને મદદનીશ કલેકટર અતિરાગ ચાપલોત સમક્ષ રજૂ કર્યું હતું. નામાંકન પ્રક્રિયા સમયે આદમ ચાકી, ઘનશ્યામ ભાટી, રમેશ વોરા સહિત પટેલ સમાજના અગ્રણીઓ તાલુકા કોંગ્રેસના આગેવાનો, કાર્યકરો અને સમર્થકો મોટી સંખ્યામાં હાજર રહ્યા હતા. (Gujarat Assembly Election 2022)