વલસાડમાં મહિલા સ્વસહાય જૂથ કાજુ પ્રોસેસીંગ યુનિટ દ્વારા મેળવશે રોજગારી

વલસાડઃ ગુજરાત સરકાર દ્વારા અનેક એવી યોજના ઓ અમલમાં છે. જેમાં આદિવાસી વિસ્તારમાં મહિલાઓ પગભર થઈ શકે. વલસાડ દક્ષિણ વન વિભાગના સહયોગથી કેમ્પા પ્રોજેકટ અંતર્ગત કપરાડા તાલુકાની માંડવા ગામે કાર્યરત શિવશક્તિ મહિલા સ્વસહાય જૂથને પગભર કરવા 10 લાખની ગ્રાન્ટમાંથી નવું કાજુ પ્રોસેસીંગ યુનિટ શરૂ કરવામાં આવ્યું છે. જેનું ઉદ્ઘાટન રાજ્ય કક્ષાના પ્રધાન રમણલાલ પાટકરના હસ્તે કરવામાં આવ્યું હતું.

વલસાડ જિલ્લા દક્ષિણ વન વિભાગના સહયોગથી કપરાડા જેવા અંતરિયાળ વિસ્તારની મહિલાઓનું સ્વસહાય જૂથ આર્થિક રીતે પગભર થાય અને મહિલાઓને તેમના જ ગામમાં રોજગારી મળે એવા ઉમદા હેતુથી કેમ્પા પ્રોજેક્ટ અંતર્ગત શિવશક્તિ મહિલા સ્વસહાય જૂથને 2018-19માં કાજુ પ્રોસેસીંગ યુનિટ સ્થાપવા માટે 10 લાખની ગ્રાન્ટની ફાળવણી કરવામાં આવી હતી.

જે ગ્રાન્ટ મુજબ દક્ષિણ વન વિભાગના સહયોગથી કપરાડા તાલુકાના માંડવા ગામે નવા કાજુ પ્રોસેસિંગ યુનિટ બનીને તૈયાર થતા વન આદિજાતિ કલ્યાણ રાજ્ય કક્ષાના પ્રધાન રમણ લાલ પાટકરના હસ્તે રીબીન કાપી તેનું લોકાર્પણ કરવામાં આવ્યું હતું. તેમણે પ્રોસેસીંગ યુનિટની કામગીરી અંગેની પણ જાણકારી મેળવી હતી. આ યુનિટમાં એક સાથે 250 કિલો કાજુનું ઉત્પાદન થઈ શકે છે. 5 દિવસ સુધી કાજુ ઉપર પ્રોસેસ કર્યા બાદ તે પૂર્ણતઃ ખાવા લાયક પેકીંગ કરવામાં આવે છે.

કાર્યક્રમ દરમિયાન રાજ્ય કક્ષાના પ્રધાને કહ્યું કે, સરકાર દ્વારા મહિલા સશક્તિકરણ માટે અનેક કર્યો કરવામાં આવે છે. જેમાંનું આ એક કાર્ય છે. છેવાડાની બહેનો જે ઘર છોડી રોજગારી મેળવવા જઇ નથી શકતી, તેઓ માટે સ્થાનિક કક્ષાએ આ પ્રોસેસીંગ યુનિટ રોજગારી માટે મદદ રૂપ બનશે. આ ઉપરાંત સ્થાનિક કક્ષાના કાજુની પણ માંગ વધશે. ભૌગોલિક સ્થિતિ મુજબ કપરાડા વિસ્તારમાં અનેક લોકો કાજુની પણ ખેતી કરતા હોય છે ત્યારે તેઓને પણ ખેતીમાં ઉપજતા કાજુનો ભાવ મળશે.

કાર્યક્રમ દરમિયાન વલસાડ જિલ્લા દક્ષિણ વન વિભાગના ડી.એફ.ઓ.એમ. જે પરમાર, નાયબ વન સંવરક્ષક ઉત્તર વનવિભાગ બી. સૂચિન્દ્રા, નાયબ વન સંરક્ષક એચ. એસ. પટેલ, સામાજિક વનીકરણ અધિકારી એસ. જે. કેદારીયા સહિત કપરાડા તાલુકાના રાજકીય અગ્રણીઓ ઉપસ્થિત રહ્યા હતા.