વાપીઃ કોરોના વાઇરસે સમગ્ર વિશ્વમાં હાહાકાર મચાવ્યો છે. દેશમાં આ વધતા જતા ફેલાવાને જોતાં 21 દિવસના લોકડાઉન બાદ ફરી લોકડાઉન લંબાવામાં આવ્યુ છે. કોરોનાની મહામારીને લઇને છેલ્લા 21 દિવસથી સમગ્ર દેશના ધાર્મિક સ્થળો, મંદિરો બંધ છે. એવામાં 22 વર્ષથી દર ગુરુવારે ગરીબ નિરાધાર લોકોને ખીચડી કઢીનો મહાપ્રસાદ આપતા વાપીના જલારામ મંદિરમાં 4 ગુરુવારથી આ આયોજન સ્થગિત કરવામાં આવ્યું છે.
21 દિવસના લોકડાઉનના કારણે વાપીના જલારામ મંદિરનો 22 વર્ષનો રેકોર્ડ તૂટ્યો વાપી નેશનલ હાઇવે પર આવેલું અને વાપી આસપાસના લાખો લોકો માટે આસ્થાનું કેન્દ્ર ગણાતું પ્રખ્યાત જલારામ મંદિર લોકડાઉનમાં બંધ કરી દેવામાં આવ્યું છે. આ મંદિરમાં છેલ્લા 22 વર્ષોથી દર ગુરુવારે ગરીબ અને નિરાધાર લોકો માટે ખીચડી-કઢીના મહાપ્રસાદનું આયોજન કરવામાં આવતું હતું.
જે અંગે મંદિરનું વહીવટી કામ સાંભળતા પ્રેમશંકરભાઈ જાનીના જણાવ્યા મુજબ 1997માં મંદિરનું નવનિર્માણ થયા બાદ બીજા વર્ષથી શરૂ કરીને લગાતાર આજ સુધી એક પણ ગુરુવાર ચુક્યા વગર મહાપ્રસાદ યોજાતો હતો. 22 વર્ષ પહેલા શરુ થયેલો આ સિલસિલો અવિરત અટક્યા વગર 2020 સુધી ચાલુ હતો, દર ગુરુવારે અહીં સમગ્ર પ્રદેશના દાતાઓની સહાયથી મહાપ્રસાદનું આયોજન થતું હતું.
21 દિવસના લોકડાઉનના કારણે વાપીના જલારામ મંદિરનો 22 વર્ષનો રેકોર્ડ તૂટ્યો મંદિરમાં મહાપ્રસાદ આપવા માટે દાતાઓનું એટલું લાબું લિસ્ટ છે કે, હાલની તારીખમાં પણ જો કોઈ વ્યક્તિ આ મંદિરમાં મહાપ્રસાદ માટે નામ નોંધાવવા જાય તો તેનો નંબર છેક 2024માં આવશે. જે લોકોની આ મંદિર પ્રત્યેની શ્રદ્ધાને સૂચવે છે. જો કે હાલ લોકડાઉનને કારણે સરકારના આદેશને અનુસરીને મંદિરમાં બધું કામકાજ બંધ છે. સોશિયલ ડિસ્ટન્સનું પાલન કરીને માત્ર સવાર સાંજ આરતી અને બપોરે બાપાને ભોગ ધરાવીને મંદિરના દરવાજા બંધ કરી દેવામાં આવે છે. હાલ લોકડાઉનમાં જે રીતે ઘણી સેવાભાવી સંસ્થાઓ શહેરના ગરીબ પરિવારોને રાશન કીટ અને ભોજન વિતરણ કરી રહી છે, તે કાર્ય જલારામ મંદિરના ટ્રસ્ટીઓ છેલ્લા 8 વર્ષથી કરી રહ્યા છે. દર મહિને 70 થી 75 ગરીબ નિરાધાર લોકોને રાશન કીટ પુરી પાડી રહ્યા છે. આ સેવાકાર્ય લોકડાઉનમાં પણ અવિરત ચાલુ છે.
આ સાથે મંદિરમાં ગરીબ લોકોના સ્વાસ્થ્ય માટે એક હોમિયોપેથી દવાખાનું પણ ખોલવામાં આવ્યું છે. જ્યાં દરેક લોકોની નિઃશુલ્ક સારવાર કરવામાં આવે છે. હાલ લોકડાઉનમાં વડાપ્રધાનના આહવાન બાદ સમગ્ર દેશના લોકોએ પીએમ કેર ફંડમાં નાણાંનું દાન કર્યું છે.
તેમાં જલારામ મંદિર પણ બાકાત નથી. મંદિરના ટ્રસ્ટીઓએ પીએમ કેર ફંડમાં એક લાખનું દાન પણ કર્યું છે. તેમજ કોરોના વાઈરસનું સંક્રમણ ન થાય તે હેતુથી મંદિરના સંચાલકો દ્વારા વર્ષ 1998 થી 2020 સુધીના મંદિરના ઈતિહાસમાં પ્રથમ વખત ધાર્મિક કાર્યક્રમો રદ કર્યા છે. જેના કારણે ગુરુવારના દિવસે પણ મંદિર સુમસામ જોવા માળે છે.
