વલસાડઃ જિલ્લામાં છેલ્લા 2 દિવસથી અવિરત ધીમીધારે વરસાદ વરસી રહ્યો છે. જેના કારણે જનજીવન ઠપ્પ થયું છે. જિલ્લાના વાપી સહિત સંઘપ્રદેશ દમણ તેમજ સંઘપ્રદેશ દાદરાનગર હવેલીમાં વરસાદી વાતાવરણથી ખેડૂતોમાં ખુશીનો માહોલ જોવા મળ્યો હતો.
વાપીમાં રેલવે અન્ડરબ્રીજમાં પાણી ભરાઇ જતાં વાહનચાલકોને અવર-જવર માટે ભારે મુશ્કેલી વેઠવી પડી હતી. રેલવે અન્ડરબ્રીજમાં પાણી ભરાયું હોવા છતાં અમુક વાહનચાલકોએ તેમાંથી પસાર થવાની કોશિશ કરી હતી, જેથી તેમના વાહન બંધ પડતા વાહનને ધક્કો મારી પાણીની બહાર કાઢવા પડ્યા હતા.
કારમાં નીકળેલા લોકો વધુ હેરાન થયા હતાં. જિલ્લામાં સવારના 06થી બપોરના 12 વાગ્યા સુધીના વરસાદની વાત કરીએ તો ઉમરગામમાં 46 MM, કપરાડામાં 18 MM, ધરમપુરમાં 54 MM, વાપીમાં 37 MM, પારડીમાં 112 MM અને વલસાડ તાલુકામાં 49 MM વરસાદ નોંધાયો છે.
જિલ્લાના સૌથી મોટા ડેમ મધુબન ડેમમાં પણ પાણીની આવક સતત વધી છે. હાલ 14,762 ક્યૂસેક પાણીની આવક થઈ રહી હોવાથી જળ સપાટી 75.85 મીટરે પહોંચી છે. જે લેવલને જાળવી રાખવા 2 દરવાજા 1.20 મીટર ખોલવામાં આવ્યાં છે. જેના થકી 12,372 ક્યુસેક પાણી દમણગંગા નદીમાં છોડવામાં આવી રહ્યુ છે.