વલસાડમાં જિલ્લા પંચાયતનું 69.64 ટકા અને 6 તાલુકા પંચાયતનું 69.72 ટકા મતદાન નોંધાયું

રવિવારે યોજાયેલી સ્થાનિક સ્વરાજની ચૂંટણીમાં વલસાડ જિલ્લાના 6 તાલુકા પંચાયતની 152 બેઠક માટે ચૂંટણી યોજાઈ હતી. જ્યારે જિલ્લા પંચાયતની 32 બેઠક માટે ચૂંટણી આયોજીત કરવામાં આવી હતી. જિલ્લા પંચાયતની બેઠક માટે 69.64 ટકા જ્યારે તાલુકા પંચાયતની 152 બેઠકો ઉપર 69.72 ટકા મતદાન થયું હતું તો ઉમરગામ નગરપાલિકામાં 67.46 ટકા મતદાન નોંધાયું હતું. જ્યારે ધરમપુરની પાલિકાની એક બેઠક માટે 65.71 ટકા મતદાન નોંધાયું હતું.

• જિલ્લા પંચાયતની 32 બેઠકો ઉપર 6,62,759 મતદારોએ કર્યું મતદાન
• તાલુકા પંચાયતની 152 બેઠકો માટે 6,61,138 મતદારોએ કર્યું મતદાન
• સૌથી વધુ મતદાન ધરમપુર તાલુકામાં
• વલસાડ જિલ્લા પંચાયતની બેઠક માટે 69.64 ટકા મતદાન નોંધાયું

વલસાડ: જિલ્લા પંચાયતની 32 બેઠકો માટે રવિવારે સવારથી આયોજિત કરવામાં આવેલ ચૂંટણી પ્રક્રિયામાં કુલ 9,51,676 મતદાતાઓ પૈકી 6,62,759 મતદારોએ મતદાન કરતાં સવારે 07:00થી સાંજે 06:00 વાગ્યા સુધી માં 69.64 ટકા જેટલું મતદાન નોંધાયુ હતું. જોકે જિલ્લા પંચાયતની 32 બેઠકો ઉપર કુલ 88 ઉમેદવારોનું ભાવિ EVMમાં સિલ થયું છે.

તાલુકા પંચાયતની બેઠકો માટે 69.72 ટકા મતદાન થયું

વલસાડ જિલ્લાની 6 તાલુકા પંચાયત માટે પણ રવિવારે મતદાન પ્રક્રિયા હાથ ધરવામાં આવી હતી. જેમાં કુલ 152 બેઠકો ઉપર 425 ઉમેદવારો માટે મતદાન યોજાયું હતું. વલસાડ તાલુકાની 31 બેઠકો માટે કુલ 2,36,629 મતદારો પૈકી 1,57,680 મતદારો એ મતદાન કર્યું. સાંજે 66.64 ટકા મતદાન નોંધાયું હતું. પારડીની 22 બેઠકો ઉપર 49 ઉમેદવાર માટે કુલ 1,29,691 મતદારો પૈકી 89,885 મતદાતાએ મતદાન કરતા 69.31 ટકા મતદાન નોંધાયું હતું. વાપીની 15 બેઠકો માટે 32 ઉમેદવારો માટે કુલ 66,064 મતદારો પૈકી 40,750 મતદારોએ મતદાન કરતા 61.68 ટકા મતદાન નોંધાયું. ઉમરગામની 30 બેઠકો માટે 75 ઉમેદવારો માટે કુલ 1,97,549 મતદારો પૈકી 1,23,892 મતદારોએ મતદાન કરતા 65.29 ટકા મતદાન નોંધાયું. કપરાડામાં 30 બેઠકો માટે 69 ઉમેદવારો માટે કુલ 1,76,259 મતદારો પૈકી 1,36,366 મતદારોએ મતદાન કરતા 77.37 ટકા મતદાન થયું.

સૌથી વધુ મતદાન ધરમપુરમાં

ધરમપુરમાં વહેલી સવારથી જ મતદાન કરવા માટે મતદારોમાં ઉત્સાહ જોવા મળ્યો હતો અને એ ઉત્સાહ સાંજના છેડે મતદાનના આંકડા ઉપર પણ જણાઈ આવ્યો હતો. ધરમપુર તાલુકા પંચાયતની 24 બેઠકો માટે 57 ઉમેદવારો ચૂંટણી મેદાન માં છે. કુલ 1,42,069 મતદાતા પૈકી 1,12,565 મતદારોએ જંગી મતદાન કરતા 79.23 ટકા મતદાન નોંધાયું હતું. કુલ 152 તાલુકા પંચાયત બેઠક માટે કુલ 9,48,261 મતદાતાઓ પૈકી 3,38,999 પુરુષ અને 3,22,139 સ્ત્રી મતદારોએ આમ કુલ 6,61,138 મતદારોએ મતદાન કરતા કુલ 69.72 ટકા મતદાન થયું હતું.

ઉમરગામ પાલિકામાં 67.46 ટકા મતદાન

તાલુકા અને જિલ્લા પંચાયતની સાથે-સાથે ઉમરગામ નગરપાલિકા અને ધરમપુર પાલિકાના એક વોર્ડ માટે પણ ચૂંટણી યોજાઈ હતી. જેમાં ઉમરગામ પાલિકાના 27 વોર્ડ માટે 72 ઉમેદવારો માટે કુલ 21,979 મતદારો પૈકી 14,826 મતદારો મતદાન કરતા મતદાનના અંતે 67.46 ટકા મતદાન થયું હતું. ધરમપુર નગરપાલિકાના એક વોર્ડ માટે 2 ઉમેદવારો મેદાનમાં હોય કુલ 3,024 મતદારો પૈકી 1,987 મતદાતાએ મતદાન કર્યું હતું. જે બાદ મતદાનને અંતે 65.71 ટકા મતદાન થયું હતું.

આમ મતદાનને અંતે તાલુકા પંચાયતની 152 બેઠકો માટે 425 ઉમેદવારો અને જિલ્લા પંચાયતની 32 બેઠકો માટે 88 ઉમેદવારોનું ભાવિ EVMમાં સીલ થયું છે.