વલસાડની વાંચન પ્રિય જનતાને જ્ઞાનસાગરમાં ડૂબકી મરાવતી ગાંધી લાઈબ્રેરીનું રીનોવેશન શરૂ

કહેવાય છે પુસ્તકોએ એક શ્રેષ્ઠ મિત્રની ગરજ સારે છે અને એ માટે જ વાંચન એ દરેક માટે જ્ઞાન વર્ધક હોય છે આજના સમયમાં પણ એક વર્ગ એવો છે જે દરરોજ વાંચન પ્રત્યે ખૂબ રસ ધરાવે છે અને તેઓ દરરોજ નિયમિત વાંચન કરતા હોય અને એ માટે શ્રેષ્ઠ સ્થળ હોય તો એ છે લાઇબ્રેરી વલસાડ શહેરમાં 70 વર્ષ કરતા પણ વધુ સમયથી કાર્યરત મહાત્મા ગાંધી લાઈબ્રેરી વલસાડ વાસીઓ અને વિવિધ પરીક્ષાની તૈયારી કરનાર વિધાર્થીઓ માટે ખૂબ આશીર્વાદ રૂપ છે. પાલિકા દ્વારા સંચાલિત ગાંધી લાઈબ્રેરીના મકાન હાલ અંદાજીત 1 કરોડ 75 લાખના ખર્ચે નવી બનવા જઈ રહી છે અને એ માટે હાલ આ લાઇબ્રેરીને પાલિકા ટાઉન હોલમાં વૈકલ્પિક રીતે ખસેડવામાં આવી છે.

વલસાડઃ શહેરમાં વસવાટ કરતા પ્રબુદ્ધ નાગરિકોની વાંચન ભૂખને સંતોષવા માટે 15 ઓગષ્ટ 1948ના રોજ તે સમયના વલસાડ પાલિકાના પ્રમુખ જનાર્દન બાપુભાઈ દેસાઈ દ્વારા મહાત્મા ગાંધી લાઈબ્રેરીની સ્થપના કરવામાં આવી હતી તે સમયે નિયમિત લોકો અહીં વાંચન માટે વર્તમાન પત્રો અને મેગેઝીનનું વાંચન કરતા જે બાદ 6 નવેમ્બર 1955માં ડો. જીવરાજ મેહતાને હસ્તે લાઈબ્રેરીનું નવું મકાન હાલ જ્યાં છે તે સ્થળે વિકસાવવામાં આવ્યું હતું.

મહત્વનું છે કે, વલસાડની મહાત્મા ગાંધી લાઇબ્રેરીમાં ગુજરાતી ભાષાના 14,817 તેમજ અન્ય ભાષાઓના મળી કુલ 23,600 પુસ્તકો સામેલ છે દરરોજ અહીં 500થી વધુ લોકો નિયમિત રીતે વર્તમાન પત્રો સહિત મેગેઝીન જે 47 જેટલા અહીં ઉપલબ્ધ છે. તેનું અધ્યયન કરવા માટે આવે છે મહત્વ નું છે કે, વલસાડ શહેરની 70 વર્ષ જૂની આ લાઇબ્રેરીમાં સને 1529માં લખાયેલું પુસ્તક ધી એની એડ ઓફ વર્જિલ (સી ડે લુઈસ) નું તેમજ 1904માં લખાયેલ સત્યર્થ પ્રકાશ (પંડિત મયા શંકર)નું પણ ઉપલબ્ધ છે તો સાથે સાથે સને 1911નું બર્નાર્ડ સો ધી કમ્પ્લેટ પ્લેસ પણ ઉપલબ્ધ છે. આમ સૌથી જુના પુસ્તકો અહીં મળી રહે છે 150 રૂપિયા ભરીને અહીં સભ્ય પદ મેળવી પુસ્તકો મેળવી શકાય છે.મહત્વનું છે કે, સ્વર્ણિમ જ્યંતી મુખ્યમંત્રી શહેરી વિકાસ યોજના અંતર્ગત લાઈબ્રેરીને વધુ સુદ્રઢ બનાવવા માટે તેના જુના મકાનનું રીનોવેશન અંદાજિત રૂપિયા 1 કરોડ 75 લાખ 86 હજારમાં કરવામાં આવી રહ્યું છે. જેનું ખાત મુર્હત સાંસદના હસ્તે કરવામાં આવ્યું હતું. હાલ રીનોવેશનને પગલે લાઈબ્રેરી પાલિકા ટાઉન હોલમાં વૈકલ્પિક રીતે તારીખ 20-1-20થી ખસેડવામાં આવી છે.આમ વલસાડની વાંચન પ્રિય જનતા વિધાર્થીઓ માટે જ્ઞાન સાગર પીરસતી મહાત્મા ગાંધી લાઈબ્રેરી હવે નવું મકાન બન્યા બાદ વધુ સુગમ બેઠક વ્યવસ્થા અને વધુ પુસ્તકો સાથે ફરી લોકોની વાંચન ભૂખ સંતોષી શકશે.