પારડી પોલીસને પોકેટ કોપ મોબાઇલ એપ થઇ મદદરૂપ, ચોરાયેલી 3 મોટરસાયકલ સાથે 1 યુવકની કરી ધરપકડ

વલસાડ: પારડી વિસ્તારમાં છેલ્લા કેટલાક સમયથી વાહન ચોરીના બનાવોમાં વધારો નોંધાયો હતો. જેના આરોપીની ધરપકડ કરવામાં પોલીસને પોકેટ કોપ મોબાઇલ એપ આશિર્વાદ રૂપ સાબિત થઇ છે. પારડી પોલીસે સોમવારના રોજ દમણી ઝાપા વિસ્તારમાં વાહન ચેકિંગ દરમિયાન એક યુવકની ધરપકડ કરી છે. જેની પૂછપરછ કરતાં યુવકે મોટરસાઈકલ ચોરી કરી હોવાનું કબુલ્યું હતું.

પારડીના દમણી ઝાપા વિસ્તારમાં સોમવારે મોડી સાંજે પોલીસ વાહન ચેકિંગ દરમિયાન વાસુદેવ સિંગ નામનો એક યુવક livo મોટરસાયકલ નંબર GJ 15 BL 9023 લઇને પસાર થઇ રહ્યો હતો. જેથી પોલીસે તેની અટકાત કરીને બાઈકના દસ્તાવેજ માગ્યા હતા. પરંતુ યુવક પાસે દસ્તાવેજ ન મળવાથી, પોલીસે પોકેટ કોપ મોબાઇલ એપમાં મોટરસાઈકલનો નંબર નાખ્યો હતો. જેમાં મોટરસાઈકલ ચોરીની હોવાનું જાણવા મળ્યું હતું.

પોલીસે આરોપીની અટકાયત કરીને વધુ પૂછપરછ કરતાં જાણવા મળ્યું કે, આરોપીએ કુલ 3 મોટરસાઈકલની ચોરી કરી છે. જેથી પોલીસે આરોપી વાસુદેવની અટકાયત કરીને આગળની કાર્યવાહી હાથ ધરી હતી.

ઉલ્લેખનીય છે કે, પોકેટ કોપ મોબાઇલ એપમાં ચોરાયેલા વાહનોના તમામ નંબરો એડ કરવામાં આવતાં હોય છે. એપની અંદર ચોરાયેલા વાહનનો નંબર નાખવાથી તે વાહન અંગેની તમામ માહિતી એપમાં આવી જતી હોય છે.