વલસાડઃ જિલ્લાના ધરમપુર અને કપરાડા તાલુકાના મોટા ભાગના ખેડૂતો ડાંગરની ખેતી કરે છે અને જિલ્લામાં મોટા ભાગે ખેડૂતો ડાંગરની ખેતી પર જ જીવન ગુજરાન ચલાવતા હોય છે, ત્યારે વર્ષોથી ચાલી આવતી પરંપરા મુજબ આજે પણ અંધ શ્રદ્ધાનું બીજ ક્યાંક જોવા મળે છે. ખેતરો એક તરફ લીલાછમ છે ત્યાં અનેક ખેતરોની વચ્ચે કાળા રંગનું ભાત જોવા મળે છે, જે અન્ય કરતા અલગ તરી આવે છે.
આ ભાતને લોકો નજર ભાત તરીકે ઓળખાવે છે અને તેઓનું માનવું છે કે બુરી નજરથી ડાંગર ના પાકને બચાવવા માટે કાળા રંગનું ભાત ખેતરની વચ્ચે ઉગાડવામાં આવે છે. નાના બાળકને જેમ કોઈની બુરી નજરથી બચાવવા માટે કાળા રંગનું મેષનું તિલક કરવામાં આવે છે, એમ જ લીલા ડાંગરના પાકની વચ્ચે કાળા રંગનું ટપકું સમાન આ નજર ભાત પણ અનેક ખેતરોમાં આજ કાલ ઝૂમતું જોવા મળે છે.