RTOનો કાર્યબોજ હળવો, નવા વાહનચાલકોના લર્નિંગ લાઇસન્સ હવે ITIમાં નિકળશે

વલસાડ: સરકાર દ્વારા હાલમાં જ આરટીઓના નિયમોમાં ફેરફાર કરી કાયદાને વધુ કડક બનાવવામાં આવ્યો છે. જેથી છેલ્લા કેટલાક દિવસથી લર્નિંગ લાઇસન્સ બનાવવા માટે ભારે લાંબી લાઈનો જોવા મળી રહી હતી.જેના કારણે આર.ટી.ઓ કચેરીનું કાર્યભાર ખૂબ વધી ગયો હતો. કચેરીનો કાર્યભારનો બોજ હળવો કરવા માટે સરકાર દ્વારા હાલમાં જ એક પરિપત્ર જાહેર કરીને લર્નિંગ લાઇસન્સ આપવા માટે હવે જિલ્લાની દરેક આઈ.ટી.આઈમાં એક વિશેષ કેન્દ્ર શરૂ કરવામાં આવશે તેવી સૂચના આપવામાં આવી હતી.જે માટે વલસાડ જિલ્લામાં પણ આવેલી 6 જેટલી આઈટીઆઈમાં કેન્દ્ર ટૂંક જ સમયમાં કાર્યરત થઈ જશે, જ્યારે આરટીઓ ખાતે લર્નિંગ લાઇસન્સ આપવાનો બંધ કરવામાં આવશે.

સરકાર દ્વારા હાલમાં જ વાહન વ્યવહારના નિયમોને વધુ કડક બનાવી લોકોને કાયદાનું પાલન કરવાની ફરજ પડી રહી છે. જે કારણે જેમની પાસે અત્યાર સુધી લાઇસન્સ ન હતું એવા અનેક લોકો હવે આરટીઓ કચેરી ખાતે લાઇસન્સ મેળવવા માટે ધક્કા ખાઈ રહ્યા છે.અચાનક જ આરટીઓ કચેરી ખાતે છેલ્લા એક માસથી લાઇસન્સ બનાવવા માટે લોકોની જંગી જનમેદની અને લાંબી કતારો જોવા મળી રહી હતી. જેના કારણે આરટીઓ કચેરી રવિવારે પણ ચાલુ રાખવાની સરકારને ફરજ પડી રહી છે.

આ પ્રકારનું કાર્યબોજ વધી જવાને કારણે સરકાર દ્વારા વધુ એક પગલું ભરતાં એક પરિપત્ર જાહેર કરી આગામી દિવસમાં દરેક જિલ્લાની ઇન્ડસ્ટ્રીયલ ટ્રેનિંગ સેન્ટરમાં લર્નિંગ લાઇસન્સ આપવા માટે એક વિશેષ કેન્દ્ર શરૂ કરવામાં આવશે. જે માટે દરેક જિલ્લામાં આ પરિપત્રની જાણકારી આપી દેવામાં આવી છે ત્યારે વલસાડ જિલ્લામાં પણ 6 તાલુકામાં આવેલા આઈ.ટી.આઈ એટલે કે ઇન્ડસ્ટ્રીયલ ટ્રેનિંગ સેન્ટરમાં પણ લર્નિંગ લાઇસન્સ માટે વિશેષ સુવિધા કેન્દ્ર શરૂ કરવામાં આવશે.

જોકે પરિપત્ર અનુસાર લર્નિંગ લાઈસન્સ મેળવવા માટે આવનાર તમામે પ્રતિ લાયસન્સ રૂપિયા 100 જેટલું મહેનતાણું આઈ.ટી.આઈને આપવાનું રહેશે અને આ માટે આઈટીઆઈના દરેક ઇન્સ્ટ્રક્ટર અને આચાર્યને લોગ-ઈન અને પાસવર્ડ આઇડી આપવામાં આવશે. વળી લર્નિંગ લાઇસન્સની કામગીરી માટે ઓટોમોબાઇલ અને મેકેનિક ટ્રેડના કર્મચારીને ટેસ્ટીંગ ઓફિસર તરીકે નિમવાના રહેશે.

આ સમગ્ર બાબતે વાતચીત કરતા ટેલિફોનિક વાતચીતમાં પારડી આઇટીઆઇના આચાર્યએ જણાવ્યું કે, તેમને ઉપરી કચેરીથી આ પરિપત્ર બાબતે જાણકારી આપવામાં આવી છે. તેમજ આવતીકાલે એટલે કે તારીખ 11ના રોજ લર્નિંગ લાઇસન્સના કેન્દ્ર શરૂ કરવા માટે તેમને આરટીઓ કચેરી ખાતે એક વિશેષ ટ્રેનીંગ પણ આપવામાં આવશેની જાણકારી તેમને આપી હતી. સાથે સાથે તેમણે તે પણ જણાવ્યું હતું કે, આરટીઓ કચેરીની કામગીરી હળવી થશે, પરંતુ આઈ.ટી.આઈ કેન્દ્રનો બોજ આ કામગીરીને કારણે વધી જશે.