વાપી :- વાપીમાં ચોમાસા દરમિયાન સરેરાશ 100થી વધુ ઇંચ વરસાદ વરસે છે. દર વર્ષે આ અતિમાત્રાના વરસાદમાં માર્ગોનું ધોવાણ થતું આવ્યું છે. એમાંય ગત વર્ષે 140 ઇંચ આસપાસ વરસાદ વરસ્યા બાદ સ્થિતિ વધુ બદતર બની હતી. અને એવા જ ખાડામાર્ગ પરથી પસાર થઈ એક કાર્યક્રમમાં હાજરી આપવા પહોંચેલા પ્રધાન રમણ પાટકર અને ધારાસભ્ય કનું દેસાઈએ વચન આપ્યું હતું કે દર વર્ષે જે મુખ્ય માર્ગો પર ખાડા પડે છે. તેવા માર્ગોને સિમેન્ટ કોન્ક્રીટના બનાવીને આ સમસ્યાનું કાયમી નિરિકારણ લાવવામાં આવશે. જો કે તે બાદ સિમેન્ટ કોન્ક્રીટના માર્ગો તો બન્યા નહીં અને લોકોએ આ વખતે ફરી 40 ટકા જેટલા વરસાદમાં જ મુખ્ય માર્ગો પરના મસમોટા ખાડામાંથી પસાર થવાની અને કમરના દુખાવા નફામાં મેળવવાની નોબત આવી છે.
વાપીમાં મંત્રીનું સિમેન્ટ કોન્ક્રીટના રોડનું વચન ફરી એકવાર ખાડામાં ગયું, 40 ટકા વરસાદમાં માર્ગો બિસ્માર વાપી ગુજરાતનું જ નહીં પરંતુ એશિયાનું મોટું GIDC હબ છે. એ સાથે એક તરફ મુંબઈ નજીક છે તો, બીજી તરફ ઔદ્યોગિક વસાહત ધરાવતા દમણ સેલવાસ એટલે અહીં રોજના હજારો નાનામોટા વાહનોની અવરજવર થાય છે. હાલમાં ચોમાસામાં આ અવરજવરના તમામ મુખ્ય માર્ગોનું ધોવાણ થયુ છે. જાણે ખાડામાં માર્ગ છે કે માર્ગમાં ખાડા તે વાહનચાલકોને સમજાતું નથી.
વાપીમાં મંત્રીનું સિમેન્ટ કોન્ક્રીટના રોડનું વચન ફરી એકવાર ખાડામાં ગયું, 40 ટકા વરસાદમાં માર્ગો બિસ્માર વાપીથી સેલવાસ મુખ્ય માર્ગ પર ચંદ્રલોક પાસે, વાપીથી નાસિક જતા ડુંગરા કરવડ માર્ગ પર, વાપીથી દમણ જતા ચલા માર્ગ પર આ વર્ષે પણ પારાવાર મસમોટા ખાડા પડયાં છે. જેને કારણે આ મુખ્ય માર્ગો પરથી ટ્રાન્સપોર્ટના વાહનોમાં વપરાતા ડિઝલમાં દૈનિક 1 લાખ લીટર ડીઝલનો વેડફાટ થાય છે. સમયની બરબાદી થાય છે. લોકોના કમરના દુખાવા વધી રહ્યાં છે. 108 ઇમર્જન્સી સર્વિસની જો તાતી જરૂરિયાત ઉભી થાય તો કદાચ તે પણ સમયસર પહોંચી શક્તિ નથી. ત્યારે લોકોની માગ છે કે જે રીતે માસ્કના 500માંથી 1000 રૂપિયા વસૂલવામાં વિલંબ નથી થતો. રાજકીય આગેવાનોના કાર્યક્રમોને ભવ્ય કાર્યક્રમ બનાવવામાં ઉત્સાહ દેખાડે છે. તો આવો જ ઉત્સાહ માર્ગોમાં પડતા ખાડાઓ ભરવામાં અને ભ્રષ્ટાચાર રોકવામાં કેમ નથી દેખાડવામાં આવતો. નવાઈની વાત તો એ પણ સામે આવી કે જ્યારે રસ્તાઓ પર મસમોટા ખાડા પડી ગયાં છે. લોકો વાહનચાલકો પરેશાન થઈ રહ્યાં છે. ત્યારે જાણે તંત્ર તેમને વધુ પરેશાન કરવા માગતું હોય તેમ ચાલુ વરસાદમાં રોડ કોન્ટ્રાકટર ખાડામાં મોરમ પુરાણ કરી રહ્યાં છે. જે વરસાદના પાણીમાં જ ધોવાઈ જવાનું છે. પરંતુ કામગીરી બતાવવા માટે વરસાદને વિલન ચીતરતાં આ કોન્ટ્રાક્ટરો, નેતાઓ, અધિકારીઓ માટે વહીવટ અને વહેવાર સર્વોપરી છે. એમાં પ્રજા પીસાય તો ભલે પીસાય.
ઉલ્લેખનીય છે કે આ બિસ્માર માર્ગ અંગે ETV ભારતે ગત વર્ષે સિમેન્ટ કોન્ક્રીટના માર્ગનું વચન આપનાર વન અને આદિજાતિ રાજ્યપ્રધાન રમણ પાટકર સાથે ટેલિફોનિક વાત કરતા તેમણે જણાવ્યું હતું કે આ રસ્તા અંગે સિમેન્ટ કોન્ક્રીટનો માર્ગ બનાવવાની પ્રક્રિયા થઈ ચૂકી છે, પરંતુ હાલ ચોમાસુ હોઈ દrવાળી બાદ આ માર્ગ સિમેન્ટ કોન્ક્રીટના બનાવવામાં આવશે.
તો, નેશનલ હાઇવે ઓથોરિટીના એક્ઝિક્યુટિવ એન્જીનીયર નવનીત પટેલે પણ ટેલિફોનિક વાતચીતમાં જણાવ્યું હતું કે આ માર્ગને CC રોડ બનાવવાની મંજૂરી મળી ગઈ છે. જે દીવાળી બાદ શરૂ થશે. હાલમાં લોકોને પડતી મુશ્કેલી નિવારવા માર્ગના ખાડાઓમાં પુરાણ કામગીરી હાથ ધરવામાં આવી છે.
