રાજ્યપ્રધાન કોરોનાના કહેર વચ્ચે ઘરે રહીને પણ થઈ રહ્યા છે લોકોને મદદરૂપ

દેશમાં ફેલાયેલી કોરોના વાઇરસની મહામારીને નાથવા સરકારે 21 દિવસનું લોકડાઉન જાહેર કર્યું છે, ત્યારે વલસાડ જિલ્લાના ઉમરગામ તાલુકાના ધારાસભ્ય અને ગુજરાત રાજ્યના આદિજાતિ વનમંત્રી રમણ પાટકર પોતાનાં ઘરે રહીને પણ પ્રજાલક્ષી સેવા બજાવી રહ્યાં છે.

વલસાડ : કોરોનાના 21 દિવસના લોકડાઉનમાં સરકારે 'વર્ક એટ હોમ' નું સૂત્ર અમલમાં મૂક્યું છે, ત્યારે આ સૂત્રને વલસાડ જિલ્લાના ઉમરગામ તાલુકાના ધારાસભ્ય અને રાજ્યપ્રધાન રમણ પાટકર બખૂબી નિભાવી રહ્યાં છે. સામાન્ય દિવસોમાં શનિવારે અને રવિવારે રમણ પાટકરના ઘરે લોકોનો મેળાવડો જામતો હોય છે. જેમાં તમામ લોકોના વિવિધ પ્રશ્નોનું સ્થળ પર જ નિરાકરણ લાવવામાં આવતું હોય છે. જો કે, હાલ કોરોનાની મહામારી દરમિયાન 21 દિવસનું લોકડાઉન જાહેર થયું હોવાથી રમણ પાટકર પોતાના ગામ ઘોડિપાડા ખાતે પોતાના ઘરે રહીને લોકોને મદદરૂપ થઇ રહ્યાં છે.

આ અંગે રમણ પાટકરે જણાવ્યું હતું કે, લોકડાઉનના પગલે તેઓ પોતાના ઘરે રહીને પણ સતત લોકોની મદદ કરી રહ્યા છે. પોતાનો વિસ્તાર દરિયાકાંઠાનો વિસ્તાર હોય અહીંના માછીમારો બોટ સાથે પોરબંદર, વેરાવળ, ઓખા અને મુંબઈ તરફ ગયા હતા. જે તમામને પરત લાવવામાં સરકાર સાથે પોલીસ સાથે અને આરોગ્ય વિભાગની ટીમ સાથે લાયઝનિંગ કરી ઘરે પરત લવાયા છે.

દુબઈ ગયેલા 42 લોકોને પણ પરત લવાયા બાદ તેઓને હોમ ક્વોરોન્ટાઇનની કડક સૂચના આપી છે. સ્થાનિક લેવલે પણ ગ્રામ્ય વિસ્તારોમાં સરપંચ સાથે સતત સંપર્ક જાળવવામાં આવતો હોવાનું અને ગ્રામ્ય વિસ્તારમાં લોકોને આરોગ્યને લઈને પડતી મુશ્કેલીમાં તબીબી ટીમને મોકલી તપાસ કરાવાઇ રહી છે. નારગોલ બંદરના બોટના ખલાસીઓને પણ મદદરૂપ થઇ પરત લાવી તબીબી તપાસ કરાવી છે. તેમજ તેમના વિસ્તારના અને વડોદરા, અમદાવાદ કે અન્ય શહેરોમાં રહી અભ્યાસ કરતા વિદ્યાર્થીઓને પણ પરત લાવવામાં મદદરૂપ થયા છે. તે ઉપરાંત વલસાડ જિલ્લામાંથી દાહોદ કે રાજસ્થાન કે બિહાર જેવા રાજ્યોમાં જતા શ્રમિકોને પણ બનતી મદદ કરી બસ સહિતની અને ભોજનની વ્યવસ્થા પુરી પાડવામાં આવી છે. આ સાથે લોકોને અપીલ કરી હતી કે, પરિસ્થિતિ ગંભીર બની રહી છે, ત્યારે લોકો પણ જાગૃત બને અને 21 દિવસના લોકડાઉનનું પાલન કરે.