વાપીમાં યુવતીનું અપહરણ કરી 30 લાખની ખંડણી માંગનાર 2 પોલીસ હવાલે, એક ફરાર

વાપીની એક યુવતીનુ અપહરણ કરી રૂપિયા 30 લાખની ખંડણીની માંગણી કરનાર અપહરણકારોનો વલસાડ જીલ્લા પોલીસ દ્વારા નેશનલ હાઈવે ઉપર ફીલ્મી ઢબે પીછો કરી ગણતરીના કલાકોમાં ઝડપી પાડવામાં આવ્યા છે.

• યુવતીનું અપહરણ કરી 30 લાખની ખંડણી માંગી
• વાપી પોલીસે એક પણ રૂપિયો આપ્યા વિના આરોપીઓને દબોચી લીધા
• પોલીસે ફિલ્મી ઢબે પીછો કરી બે આરોપીને પકડી પાડ્યા

વલસાડ, વાપી : વાપીની યુવતીનું શુક્રવારે 3 ઈસમોએ અપહરણ કરી 30 લાખની ખંડણીની માંગ કરી જતી. જે અંગે યુવતીના પિતાએ વાપી ટાઉન પોલીસમાં ફરિયાદ નોંધાવતા પોલીસે અલગ અલગ ટીમ બનાવી ગણતરીના કલાકોમાં જ એક પણ રૂપિયો ચૂકવ્યા વગર આરોપીઓને દબોચી લીધા હતાં. અને યુવતીને હેમખેમ તેના પિતાના હવાલે કરી હતી.

30 લાખની ખંડણી માંગી

વાપી ટાઉન પોલીસે જણાવ્યું કે, શુક્રવારે સાંજના પાંચેક વાગ્યાના સમયે વાપી વિસ્તારમાંથી એક યુવતીનુ ત્રણ ઈસમોએ ખંડણી માટે અપહરણ કર્યું હતું. જે બાદ યુવતીના મોબાઈલ નંબર ઉપરથી યુવતીના પિતાને ફોન કરી તેમની પુત્રી હેમખેમ જોઈતી હોય તો રૂપિયા 30 લાખ લઈને ઉદવાડા નજીક હાઈવે ઉપર આવી જવા જણાવ્યુ હતુ .

અલગ અલગ ટીમો બનાવી અપહરણકર્તાઓને ઝડપી પાડ્યા

યુવતીના પિતાએ વાપી ટાઉન પોલીસ સ્ટેશનનો સંપર્ક કરી વાપી ટાઉન PI બી.જે.સરવૈયા સમક્ષ રજૂઆત કરતા પોલીસે યુવતીના પિતાની ફરીયાદ લઈ આરોપીઓ સામે અપહરણનો ગુનો દાખલ કર્યો હતો. તેમજ બનાવ બાબતે ઉપરી અધિકારીઓને જાણ કરી હતી. બનાવની ગંભીરતાને ધ્યાને લઈ વલસાડ જીલ્લા પોલીસ અધિક્ષક મનોજ શર્મા તથા વાપી વિભાગના ઈન્ચાર્જ નાયબ પોલીસ અધિક્ષક વી.એન.પટેલ તાત્કાલીક વાપી ખાતે આવ્યા હતાં. અને LCB, SOG. તથા વાપી ટાઉંનની અલગ અલગ ટીમો બનાવી ભોગ બનનાર યુવતી તેમજ અપહરણકર્તાઓની તપાસ ચાલુ કરી દેવામાં આવી હતી.

યુવતીને આરોપીઓના કબ્જામાંથી બચાવી

મોડી રાત્રે ગણતરીના કલાકોમાં એક પણ રૂપિયાની ખંડણી આપ્યા વગર ભોગ બનનાર યુવતીને આરોપીઓના કબ્જામાંથી હેમખેમ બચાવી લેવામાં આવેલ હતી. પોલીસે આ ઓપરેશનમાં 2 આરોપીઓ અબ્દુલ સમદ ઈમ્તિયાક શેખ, તોસીફ ઉર્ફ ચીનુ સાજીદ ઘોરીની ધરપકડ કરી લીધી છે. જ્યારે એક આરોપી મુરાદ, રહે. પુજા સોસાયટી, કબ્રસ્તાન રોડ, વાપી તે આ તકે ફરાર છે ત્યારે પોલીસે તેને ઝડપી પાડવા ચક્રો ગતિમાન કર્યા છે.

બાઇક પર ભાગ્યા હતા આરોપીઓ

વાપી ટાઉન પોલીસ સ્ટેશનના પોલીસ ઈન્સ્પેકટર બી.જે.સરવૈયા તથા વાપી ટાઉન ટીમ દ્વારા ફીલ્મી ઢબે આરોપીના સ્પ્લેન્ડર મોટર સાઇકલનો નેશનલ હાઈવે ઉપર પીછો કરી સફળ રીતે ઓપરેશન પાર પાડી, યુવતીને આરોપીઓના કબ્જામાંથી હેમખેમ બચાવી પરત તેના પરીવારને સોંપવામાં આવી હતી.

આ પણ વાંચો : ગોંડલમાં 6 શખ્સોએ મહિલા પર સામુહિક દુષ્કર્મ ગુજાર્યો

આ પણ વાંચો : મોરબીમાં સગીરા સાથે દુષ્કર્મ આચરનાર બે નરાધમ ઝડપાયા