કોરોના અને ખેડૂત આંદોલનની અસરઃ વલસાડમાં ફ્રૂટ-શાકભાજી ભાવ ગગડયા પણ ગ્રાહકો..?

વલસાડ જિલ્લો શાકભાજી અને ફળ માટે જાણીતો છે. અહીં સ્થાનિક બજારમાં લોકલ અને અન્ય રાજ્યમાંથી મબલક શાકભાજી અને ફળો ઠલવાતા આવ્યા છે. જો કે હાલમાં વાપીના વેપારીઓ માટે ગુજરાન ચલાવવું મુશ્કેલ બન્યું છે. વેપારીઓના મતે પહેલા કોરોના કાળની મુશ્કેલી હતી. હવે ખેડૂત આંદોલન પણ ચાલી રહ્યું હોવાથી મબલક ઉત્પાદન સાથે ભાવ ખુબજ નીચા આવ્યા છે. પરંતુ તેને ખરીદનારા ગ્રાહકો માર્કેટમાં આવતા નથી.

• શિયાળામાં શાકભાજીનું થયું મબલક ઉત્પાદન
• મબલક ઉત્પાદનને કારણે ફળ શાકભાજી થયા સસ્તા
• કોરોના કાળ અને ખેડૂત આંદોલનની અસર શાકભાજી પર
• સસ્તી થઈ શાકભાજી પણ ખરીદનારા નથી મળતા

વાપીઃ વલસાડ જિલ્લો શાકભાજી અને ફળ માટે જાણીતો છે. અહીં સ્થાનિક બજારમાં લોકલ અને અન્ય રાજ્યમાંથી મબલક શાકભાજી અને ફળો ઠલવાતા આવ્યા છે. જો કે હાલમાં વાપીના વેપારીઓ માટે ગુજરાન ચલાવવું મુશ્કેલ બન્યું છે. વેપારીઓના મતે પહેલા કોરોના કાળની મુશ્કેલી હતી. હવે ખેડૂત આંદોલન પણ ચાલી રહ્યું હોવાથી મબલક ઉત્પાદન સાથે ભાવ ખુબજ નીચા આવ્યા છે. પરંતુ તેને ખરીદનારા ગ્રાહકો માર્કેટમાં આવતા નથી. કોરોના કહેરના મરણતોલ ફટકા બાદ દેશના ખેડૂતોનું આંદોલન શાકભાજીના વેપારીઓ માટે મુશ્કેલ બન્યું છે. પખવાડિયા પહેલા શાકભાજી અને ફળના આસમાને પહોંચેલા ભાવ ગગડયા છે. મબલક ઉત્પાદન સામે ખરીદનારા ગ્રાહકો ગાયબ હોય વેપારીઓએ શાકભાજી ફળ-ફળાદીને ફેંકવાની નોબત આવી છે.

કોરોના કાળ સાથે ખેડૂત આંદોલનની શાકભાજી પર અસર

વાપીમાં શાકભાજી અને ફ્રુટની 3 જેટલી મુખ્ય માર્કેટ આવેલી છે. જેમાં સ્થાનિક તેમજ અન્ય જિલ્લા અને રાજ્યની પુષ્કળ શાકભાજી આવતી હોય છે. જો કે હાલમાં શાકભાજીના ભાવ ખૂબ જ નીચા ગયા છે. તેમ છતાં શાકભાજી ખરીદનારા નથી. આ અંગે વાપીમાં હોલસેલ શાકભાજીનું વેંચાણ કરતા સચિન ગોણનું કહેવું છે કે, 15 દિવસ પહેલા જે શાકભાજી અને ફ્રૂટ 50 થી 80 રૂપિયા કિલો હતાં, તે હવે 10 થી 40 રૂપિયાએ કિલો વેંચાઈ રહ્યા છે. પરંતુ માર્કેટમાં ગ્રાહકો નથી. કોરોના કાળમાં નુકસાન વેઠનારા ખેડૂતો, વેપારીઓ હાલ મબલક ઉત્પાદન બાદ પણ ખોટ વેઠી રહ્યા છે. ગ્રાહકો નહિ મળવાને કારણે શાકભાજી અને ફ્રૂટ બગડી રહ્યા છે. આથી વેંચાણ કરવાને બદલે ફેંકવા પડી રહ્યા છે.

ગ્રાહકો નહિ મળવાને કારણે શાકભાજી-ફળને નુકસાન

શાકભાજીની જેમ ફ્રૂટ માર્કેટના વેપારીઓને પણ ગ્રાહકોની ખોટ વર્તાઈ રહી છે. ગ્રાહકો નહિ મળવાને કારણે કેટલાક વેપારીઓએ ફળ-ફળાદી મંગાવવાનું બંધ કર્યું છે. કોરોના કહેરની અસરમાં અનેક નાની મોટી ગ્રામ્ય બજારો બંધ કરી છે. ખેડૂત આંદોલનની અસરમાં ગ્રાહકો ખરીદી માટે આવવાનું ટાળી રહ્યા છે. ભાવ મુજબ હાલ માર્કેટ સસ્તું છે. તેમ છતાં ગ્રાહકોની રાહમાં આખો દિવસ બેસી સાંજે તેને ફેંકવું પડે છે.

પખવાડિયા પહેલાની સરખામણીએ ભાવ ઘટ્યા

જો કે છેલ્લા 15 દિવસની સરખામણીએ ભાવમાં ખૂબ જ મોટો ફરક પડ્યો હોવાથી હોટેલ, રેસ્ટોરન્ટ, અને કેટરિંગના ધંધા સાથે જોડાયેલા શાકભાજી ખરીદનારા ગ્રાહકોને તડાકો પડ્યો છે. તેમના મતે હાલ રીંગણા સિવાય દૂધી, ટામેટા, વાલ, પાપડી, મરચા, લીંબુ, ધાણા, કોબીજ, ફુલાવર સહિત તમામ શાકભાજી અને સંતરા, કીનું, કેળા, સફરજન જેવા ફળોનો ભાવ ખૂબ જ નીચો આવ્યો છે.

સસ્તું શાકભાજી અને ફળ વેપારીઓ માટે ખોટનો ધંધો

ઉલ્લેખનીય છે કે, લોકડાઉનમાં શાકભાજી અને ફળના ભાવ આસમાને પહોંચ્યા હતાં. જે બાદ હાલ શિયાળાની સીઝનમાં મબલક ઉત્પાદનને કારણે ભાવ ઘટ્યા છે. તેમ છતાં લોકોમાં હજુ પણ કોરોના કહેરનો ડર અને ખેડૂત સામે સરકારનું બેવડું વલણ વેપારીથી ગ્રાહકોને દૂર કરી રહ્યું છે. જેથી રોજનું રોજ કમાઈને ગુજરાન ચલાવનારા ખેડૂતો, વેપારીઓ માટે જીવન નિર્વાહ કરવાનું મુશ્કેલ બન્યું છે.