વાપી GIDCમાં વેસ્ટ એસિડના નિકાલનો પર્દાફાશ, GPCBએ નોટિસ ફટકારી

વાપી GIDCમાં કેમિકલ માફિયાઓ દ્વારા પર્યાવરણને નુકસાનકારક કેમિકલ બનાવી તેનો ગેરકાયદે ધંધો કરતા હોવાનું બહાર આવ્યું છે. એક બંધ ફેકટરીમાં વેસ્ટ કેમિકલને જમીનમાં ખાડો ખોદી નિકાલ કરવાની ઘટના સામે આવતા GPCBએ ફેક્ટરીના માલિકને નોટિસ ફટકારી કાયદેસરની કાર્યવાહી હાથ ધરી છે.

વાપી: વાપી GIDCના ફેઈઝ ત્રણમાં આવેલી એક ફેક્ટરીના કમ્પાઉન્ડમાં અંબિકા ઈન્ડસ્ટ્રીઝ નામની કંપની જે સોડિયમ ક્લોરાઈડ બનાવતી અને છેલ્લા કેટલાક સમયથી ઉત્પાદન બંધ કરી ચૂકેલી કંપનીના માલિક અમૃતલાલ પટેલે GPCBમાં ફરિયાદ કરી હતી કે, તેમની ફેક્ટરી જે કમ્પાઉન્ડમાં છે તેના માલિક અને સી.એચ. ઈન્ટરનેશનલ ટ્રેડિંગ કંપનીના નામે કેમિકલ પ્રોડક્ટનું ટ્રેડિંગ કરતાં હસમુખ પટેલ તેની ફેક્ટરીની ખુલ્લી જગ્યામાં ખાડો કરી તેમાં વેસ્ટ કેમિકલ એસિડના ડ્રમ ખાલી કરી રહ્યા છે.

આ માહિતી બાદ GPCBએ ઘટના સ્થળે જઈ કાયદેસરની કાર્યવાહી હાથ ધરી નોટિસ ઓફ એન્ટ્રી બજાવી જે એસિડ ખાલી કર્યું છે, તે એસિડ ક્યાંથી લવાયું હતું અને કેટલા સમયથી આ પ્રવૃત્તિ કરવામાં આવી રહી છે તે અંગે માહિતી માંગી છે.