ઉમરગામ તાલુકાના સ્ટેમ્પ ડ્યુટી હેઠળના 3.5 કરોડના વિકાસના કામો અટવાયા, તાલુકા પ્રમુખે TDO પર કર્યા આક્ષેપ

વલસાડ જિલ્લામાં આગામી દિવસોમાં તાલુકા અને જિલ્લા પંચાયતની ચૂંટણી યોજાવાની છે. આ માટે 15 દિવસ બાદ આચારસંહિતા પણ લાગુ પડી જશે. ત્યારે ઉમરગામમાં હાલના તાલુકા પંચાયતના પ્રમુખ અને સભ્યો દ્વારા સામાન્ય સભામાં મંજુર થયેલા વિકાસના કામોની તાંત્રિક મંજૂરી જલ્દી મળે તે માટે રજૂઆત કરી છે.

વલસાડ : જિલ્લામાં આગામી દિવસોમાં તાલુકા અને જિલ્લા પંચાયતની ચૂંટણી યોજાવાની છે. આ માટે 15 દિવસ બાદ આચારસંહિતા પણ લાગુ પડી જશે. ત્યારે ઉમરગામમાં હાલના તાલુકા પંચાયતના પ્રમુખ અને સભ્યો દ્વારા સામાન્ય સભામાં મંજુર થયેલા વિકાસના કામોની તાંત્રિક મંજૂરી જલ્દી મળે તે માટે રજૂઆત કરી છે.

આ અંગે ઉમરગામ તાલુકા પંચાયત પ્રમુખ જયાબેન પટેલે ચિંતા વ્યક્ત કરતા જણાવ્યું હતું કે, જિલ્લાના દરેક તાલુકામાં વિકાસના કામોની તાંત્રિક મંજૂરી મળી ગઈ છે. જ્યારે જિલ્લા પંચાયતના પ્રમુખ મણિલાલ પટેલ અને રાજયપ્રધાન રમણ પાટકર પોતે ઉમરગામના જ હોવા છતાં ઉમરગામ તાલુકાને અન્યાય કરી કરી રહ્યા છે. તાલુકામાં વર્ષ 2016-17 બાદ 2018-19, 2019-20ના સ્ટેમ્પ ડ્યુટીના અંદાજિત 4 કરોડના વિકાસના કામો ટલ્લે ચડ્યા છે. આ અંગે જ્યારે પણ TDO ને રજૂઆત કરવામાં આવતા તેઓ ગલ્લાંતલ્લાં કરે છે, અને પ્રમાણપત્રો આવે પછી મંજૂરી આપવાના વાયદા કરી રહ્યા છે.

જ્યારે હવે આગામી દિવસોમાં ચૂંટણીને ધ્યાને રાખી તાલુકામાં આચાર સંહિતા લાગુ થશે. ત્યારે ગામલોકો અને સભ્યો વિકાસના કામો જલ્દી થાય તેવી કાગડોળે રાહ જુએ છે. તેમજ તાલુકા પંચાયતના પ્રમુખ સામે જ ગંભીર સવાલો ઉભા કરતા હોવાનો વસવસો પ્રમુખે વ્યક્ત કર્યો હતો.

ઉમરગામ તાલુકામાં દરેક ગામમાં શાળા સંકુલ, મુખ્ય માર્ગો, પાણીની સુવિધા, સ્મશાનની સુવિધા આરોગ્યની સુવિધા, ગટરની સુવિધા સહિતના કામોનો દરેક સામાન્ય સભામાં સર્વાનુમતે ઠરાવ થતો આવ્યો છે. પરંતુ તે બાદ TDO દ્વારા તાંત્રિક મંજૂરી મળતી નથી. એ સિવાય સ્થાનિક ધારાસભ્ય અને રાજયપ્રધાન તેમજ ગામના જ જિલ્લા પંચાયતના પ્રમુખ પણ આ અંગે કોઈ રસ દાખવતા ના હોવાનો આક્ષેપ પણ પ્રમુખે કર્યો છે.જ્યારે આ અંગે ઉમરગામ તાલુકા પંચાયતના TDO સુરેશ કલારાનો સંપર્ક કરતા તેમણે કેમેરા સામે કંઈ જ બોલવાનો ઇન્કાર કરી તમામ વિકાસના કામોની ફાઇલ વહીવટી મંજૂરી માટે મોકલી દીધી હોવાનું અને આગામી દિવસોમાં તેની મંજૂરી મળી જશે તેવું જણાવ્યું હતું. જોકે, TDO, જિલ્લા પંચાયતના પ્રમુખ અને તાલુકા પંચાયતના પ્રમુખ વચ્ચે અનેક વિરોધાભાસ હોય ઉમરગામ તાલુકાના વિકાસના કામો અવરોધાયા છે. જો તે હજુ પણ મંજુર નહિ થાય તો આગામી તાલુકા પંચાયતની ચૂંટણીમાં હાલના પ્રમુખ અને સભ્યો ચૂંટણી પ્રચારમાં ગામલોકોના રોષનો ભોગ બનશે. માટે જ ઉમરગામ તાલુકા પંચાયતના વિકાસના કામો પર રાજકીય બ્રેક લાગ્યો હોવાની ચર્ચા રાજકીય અગેવાનોમાં ચિંતાનું કારણ બન્યું છે.