લોકડાઉનમાં કંપની માલિકે કંપનીમાં જ ખોલી નાખ્યું જુગારધામ, 41.76 લાખના મુદ્દામાલ સાથે 8 શકુનીઓ ઝડપાયા

વાપીમાં સેકેન્ડ ફેઈઝ GIDC માં આવેલી પ્રિટેક કંટ્રોલ્સ નામની કંપનીમાં GIDC પોલીસે દરોડા પાડીને 8 જુગારિયાઓને 41,76,500ના મુદ્દામાલ સાથે ઝડપી પાડ્યા હતાં. લોકડાઉનના સમયમાં કંપનીમાં જ કંપની માલિક પૂનમ પંચાલ શ્રાવણીયો જુગાર રમાડતો હતો.

વાપી: શહેરમાં કોરોના વાઇરસને કારણે લોકો ઘરમાં કેદ છે, ત્યારે વાપી GIDC પોલીસે જુગારીયાઓ પર દરોડા પાડ્યા હતા. બાતમીને આધારે કરેલી આ દરોડા અંગે પોલીસ સ્ટેશનમાંથી મળેલી વિગતો મુજબ વાપી GIDC માં 2nd ફેઈઝમાં આવેલી પ્રિટેક કંટ્રોલ્સ નામની કંપનીમાં બીજા માળે કંપનીનો માલિક પૂનમ ઈશ્વર પંચાલ તેના અન્ય મિત્રો સાથે જુગાર રમતો હોવાની વિગતો મળી હતી. જે આધારે રાત્રે 10:15 કલાકે પોલીસે કંપની પર દરોડા પાડ્યા હતા.

જે દરમિયાન પોલીસે 8 જુગારિયાઓની અટક કરી હતી. જે સાથે પટમાં રાખેલા 25,500 રોકડા, તમામની અંગઝડતીમાં 3,24000, 37000 ના 8 મોબાઈલ, 37,90,000 ના પાંચ વાહનો મળી કુલ 41,76,500નો મુદ્દામાલ કબ્જે કરી જુગારધારા કલમ હેઠળ કાયદેસરની કાર્યવાહી કરી હતી.ઉલ્લેખનીય છે કે, હાલ લોકડાઉનના સમયમાં કંપનીઓ બંધ છે. શ્રાવણ માસ ચાલી રહ્યો છે, ત્યારે આવા સમયે કંપની માલિક પૂનમ પંચાલે કંપનીમાં જ જુગારધામ ખોલી નાખ્યું હતું. પોલીસે કબ્જે કરેલા વાહનોમાં 14 લાખની ઇનોવા કાર, 22 લાખની હ્યુન્ડાઇ કંપનીની ટકસન કાર સહિત ત્રણ બાઈકનો સમાવેશ થાય છે.વધુમાં પકડાયેલા કુલ 8 ઇસમોમાં કંપની માલિક પૂનમચંદ પંચાલ પાસેથી 43,000, તેમના ભાઈ દશરથ પંચાલ પાસેથી 1 લાખ, અંકિત ચતરલાલ પાસેથી 22 હજાર, વિજય દવે પાસેથી 28 હજાર, કેતન મકવાણા પાસેથી 12 હજાર, પરવેઝ મુલતાની પાસેથી 40 હજાર, અયુબ શેખ પાસેથી 59 હજાર, મનીષ મોડિયા પાસેથી 20 હજાર રૂપિયાની રોકડ મળી આવી હતી.