હવે તો ભણી રહ્યું ગુજરાત, વલસાડમાં શાળા સમયે વિદ્યાર્થીઓ નદીએ કપડા ધોવા મજબૂર!

વલસાડ જિલ્લા પ્રાથમિક શિક્ષણ વિભાગને લાંછન લગાડે એવી ઘટના કપરાડા તાલુકાના જીરવલ ગામે સામે આવી હતી. જેમાં શિક્ષકો દ્વારા ચાલુ શાળાના સમય દરમિયાન બાળકોને નદી પર મોકલી કેટલાક કપડાં ધોવડાવવામાં આવતા હોવાનું બહાર આવ્યું છે. જેમાં કોઈ અનિચ્છનીય ઘટના બને તો તે માટે જવાબદાર કોણ ? આ સમગ્ર બાબતે જાણકારી મેળવવા જિલ્લા પ્રાથમિક શિક્ષણ અધિકારીનો સંપર્ક કરવામાં આવતા તેમણે નિયમિત વ્યવહાર મુજબ ફોન ઉઠાવવાની પણ તસ્દી લીધી ન હતી. ત્યારે બાળકોને શિક્ષણના સ્થાને મજૂરી કરાવવામાં આવી રહી હોવાનું બહાર આવી રહ્યું છે.

વલસાડ : જિલ્લા પ્રાથમિક શિક્ષણ વિભાગ આજકાલ ઘોર નિંદ્રામાં હોય એવું જણાઈ રહ્યું છે. ત્યારે કપરાડાના જીરવલ ગામે આવેલી 1થી 8 ધોરણની પ્રાથમિક સ્કૂલમાં અભ્યાસ કરતા બાળકો પાસે ચાલુ શાળાએ સ્કૂલના રૂમાલ, ચાદરો ધોવા નદીએ મોકલવામાં આવતા હોવાનું બહાર આવ્યું છે. જેમાં સ્થાનિક અગ્રણીએ સ્કૂલ ઉપર હકીકત તપાસવા ગયા તો સ્કૂલ ઉપર બાળકો પાસે સ્કૂલ ધોવડાવી અને સાફ-સફાઈ કરાવવામાં આવતી હતી. વળી શિક્ષકોએ પણ અગ્રણી સાથે યોગ્ય વર્તન ન કર્યું હોવાનું આ અગ્રણીએ જણાવ્યું હતું.

આ અંગે સ્થાનિક સમાજિક કાર્યકર જયેંન્દ્ર ગાવીત જીરવલ ગામની મુલાકાતે ગયા હતા. તે સમયે ત્યા નદી ઉપર કેટલીક બાળાઓ સ્કૂલના યુનિફોર્મમાં કપડાં ધોઈ રહી હતી. તેમણે આ બાળાઓને પૂછતાં તેમણે કહ્યું કે, સ્કૂલના શિક્ષકો દ્વારા કેટલાક કપડાં ધોવા માટે નદી કિનારે મોકલી છે. જે બાબત જાણી ચોકી ગયેલા જયેંન્દ્રભાઈએ સ્કૂલ ઉપર જઇ તપાસ કરતા શિક્ષકો સ્કૂલ પર વિધાર્થીઓ પાસે ઝાડુ લઈને સાફ સફાઈ કરાવી રહ્યા હતા.

મહત્વનું છે કે, સ્કૂલના બાળકોને શિક્ષણના સ્થાને નદીએ કપડાં ધોવા મોકલવા અને સ્કૂલ પરિસરને પાણી વડે સાફ સફાઈ કરાવવામાં આવે એ કેટલી હદે યોગ્ય કહી શકાય. આ સમગ્ર બાબતે તેમણે તાલુકા શિક્ષણ આધિકારીને જાણકારી આપી હતી. પરંતુ તેમણે પણ આ બાબતને ગંભીરતાપૂર્વક લીધી ન હતી.

આમ આદિવાસી વિસ્તારના બાળકોને શિક્ષણના સ્થાને ખુદ શિક્ષકો દ્વારા જ મજૂરી કરાવવામાં આવતી હોવાનું બહાર આવ્યું હતું. ત્યારે આવા શિક્ષકો નહિ શિક્ષણ અધિકારીઓ સામે પણ કાર્યવાહી થાય એવી સ્થાનિકોમાં લોક માગ ઉઠી રહી છે. તેમજ શિક્ષણ અધિકારી ઘોર નિંદ્રામાં હોય એવું જણાઈ રહ્યું છે.