MLA Dharmendra Sinh Vaghela : વાઘોડિયા બેઠકના અપક્ષ ધારાસભ્યના રાજીનામાની પ્રબળ શક્યતાઓ

અત્યારે ગુજરાતની અત્યંત મહત્વની એવી વાઘોડિયા બેઠક પરથી અપક્ષ ધારાસભ્ય ધર્મેન્દ્ર સિંહ વાઘેલા રાજીનામું આપે તેવી શક્યતાઓ પ્રબળ બની છે. આ શક્યતાઓને પરિણામે ગુજરાતનું રાજકારણ ગરમાયું છે. વાંચો સમગ્ર સમાચાર વિસ્તારપૂર્વક. Vadodara Vaghodiya independent MLA Dharmendra Sinh Vaghela Madhu Srivastav

વડોદરાઃ ગુજરાત વિધાનસભાની સૌથી મહત્વની બેઠક અને સૌથી રસાકસી વાળી બેઠક એટલે વાઘોડિયા વિધાનસભાની બેઠક. આ બેઠક પર 14 હજારથી વધુ મતો મેળવીને અપક્ષ ધારાસભ્ય ધર્મેન્દ્રસિંહ વાઘેલા વિજયી બન્યા હતા. અત્યારે ગુજરાતના રાજકારણમાં ધારાસભ્ય ધર્મેન્દ્ર સિંહ વાઘેલા પોતાના પદ પરથી રાજીનામું આપીને ભાજપમાંથી ફરીથી ચૂંટણી લડે તેવી ચર્ચાએ જોર પકડ્યું છે. જેના લીધે ગુજરાતનું રાજકારણ ગરમાયું છે.

વાઘોડિયા બેઠક અગત્યનીઃ લોકસભાની ચૂંટણીઓની સાથે વિધાનસભાની પેટા ચૂંટણીઓ પણ યોજવાની સંભાવના છે. ભાજપાની એક ખાસ ટીમદ્વારા ગુજરાતમાં કોંગ્રેસ, આમ આદમીપાર્ટી તેમજ અપક્ષમાંથી ચૂંટાયેલા ધારાસભ્યોને ભાજપામાં લાવવા માટે કવાયત પણ શરૂ કરી દેવાઈ છે. જેના માટે ધારાસભ્યોને પેટા ચૂંટણીમાં ટિકિટની ખાતરી આપવામાં આવી રહી છે. ભાજપાની ટીમે આ રણનીતિનો પ્રથમ ઉપયોગ વાઘોડિયા બેઠક પરથી અપક્ષ ચૂંટાઈ આવેલા ધારાસભ્ય ધર્મેન્દ્રસિંહ વાઘેલા પર કર્યો હોવાની ચર્ચા થઈ રહી છે. અપક્ષ ધારાસભ્ય ધર્મેન્દ્રસિંહ વાઘેલા ગમે ત્યારે વાઘોડિયા બેઠક ઉપરથી રાજીનામું આપવાની જાહેરાત કરે તેવી શક્યતાઓ જોવાઈ રહી છે. આજે તેઓ એ વડોદરા નજીક એક ફાર્મ હાઉસમાં પોતાના ટેકેદારો, કાર્યકરો સાથે બેઠક પણ કરી હોવાનું જાણવા મળ્યું છે. આ બેઠકમાં તેમના સમર્થકોએ પણ ભાજપામાં જોડાવા માટેની લીલી ઝંડી આપી દીધી હોવાનું કહેવાઈ રહ્યું છે. હવે તેઓ અપક્ષ ધારાસભ્ય પદેથી રાજીનામું આપ્યા બાદ ભાજપમાં જોડાશે અને ભાજપ માંથી ટિકિટમેળવીને વાઘોડિયા બેઠક ઉપર જ પેટા ચૂંટણીમાં ઝંપલાવશે તેવી શક્યતા છે.‍

મધુ શ્રીવાસ્તવની સ્ટ્રેટેજીઃ વાઘોડિયા બેઠક પર એકથી વધુ વખત ભાજપમાંથી ચૂંટાઈ આવેલા માજી ધારાસભ્ય મધુ શ્રીવાસ્તવે પણ સળવળાટ શરુ કરી દીધો છે. તેમણે તાજેતરમાં કૉંગ્રેસમાં જવાના સંકેત આપ્યા હતા. તેઓ લોકસભાની ચૂંટણી સાથે સંભવીત વાઘોડિયા વિધાનસભા પેટા ચૂંટણીમાં કૉંગ્રેસમાંથી ટિકિટ મેળવી ધર્મેન્દ્ર સિંહ વાઘેલા સામે ચૂંટણી લડે તેમાં કોઈ નવાઈ નથી. મધુ શ્રીવાસ્તવે કૉંગ્રેસની ટિકિટ ઉપર વાઘોડિયા બેઠક ઉપર ચૂંટણી લડવા માટે પ્રદેશ કોંગ્રેસ અધ્યક્ષ શક્તિસિંહ ગોહિલનો પણ સંપર્ક કર્યો હતો. આ બાબતે વધુ જાણવા માટે વાઘોડિયાના અપક્ષ ધારાસભ્ય ધર્મેન્દ્રસિંહ વાઘેલાનો સંપર્ક કરવા માટે પ્રયત્ન કર્યો હતો, પરંતુ તેમનો સંપર્ક થઈ શક્યો ન હતો.

હાલ વાઘોડિયાના અપક્ષ ધારાસભ્ય ધર્મેન્દ્રસિંહ વાઘેલાએ રાજીનામું આપવાની વાત વહેતી કરી છે, પરંતુ તેઓનું રાજીનામું સ્વીકારાય અને વાઘોડિયા બેઠક ઉપર વિધાનસભાની પેટા ચૂંટણી આવે તો હું મેદાન છોડવાનો નથી. મારી ઉમેદવારી નોંધાવવાની સંપૂર્ણ પણે તૈયારીઓ છે. વાઘોડિયાના મારા મતદારો પ્રત્યે આજે પણ મારી એટલી જ લાગણી છે ભલે હું હાલ સત્તામાં નથી...મઘુ શ્રીવાસ્તવ(પૂર્વ ધારાસભ્ય, વાઘોડિયા)