ચોરીના ગુનામાં નાસ્તા ફરતા ચિકલીગર ગેંગના 3 સાગરિતો ઝડપાયા, બંધ મકાનોને કરતા હતાં ટાર્ગેટ

વડોદરા ગ્રામ્ય લોકલ ક્રાઈમ બ્રાન્ચે ધીરજ ચોકડી પાસેથી ચિકલીગર ગેંગના ત્રણ સાગરિતોને ઝડપી પાડ્યા છે. ચિકલીગર ગેંગ શહેર અને ગ્રામ્ય વિસ્તારમાં બંધ મકાનોને ટાર્ગેટ બનાવતાં હતાં. ઝડપાયેલા આરોપીઓએ વિવિધ જગ્યાએ ચોરીના ગુનાની આશરે 10 લાખ રૂપિયા સુધીની ચોરીને ઘટનાને અંજામ આપ્યો હોવાની કબુલાત આપી હતી. જોકે, પોલીસ તપાસમાં હજી પણ ચોરીની ઘટનાના ખુલાસા થાય તેવી શક્યતાઓ રહેલી છે.

વડોદરા: વડોદરા ગ્રામ્ય લોકલ ક્રાઈમ બ્રાન્ચે ચિકલીગર ગેંગના ત્રણ સાગરિતોને ઝડપી પાડ્યા છે. ચિકલીગર ગેંગ શહેર અને ગ્રામ્ય વિસ્તારમાં બંધ મકાનોને ટાર્ગેટ બનાવતાં હતાં. પોલીસ સૂત્ર દ્વારા મળતી માહિતી અનુસાર આ ચિકલીગર ગેંગ વડોદરા શહેર અને ગ્રામ્ય માત્ર બંધ મકાનોને જ ટાર્ગેટ બનાવતા હતા, અને સોના - ચાંદીના દાગીનાઓની ચોરી કરતા હતા. આ ગેંગના ત્રણ જેટલા સાગરિતોને વડોદરા ગ્રામ્ય લોકલ ક્રાઈમ બ્રાન્ચે ઝડપી પાડ્યા હતા.

3 સાગરિતોની ધરપકડ: વાઘોડિયાની ધીરજ ચોકડી પાસેથી વડોદરાના કોયલીના કિરપાલસિંહ ઉર્ફે પાલેસિંહ, રાજા સિંહ ડેસર અને ભીલસીંગ ઉર્ફે સંતોકસિંહ સેવાલિયા નામના ચિકલીગર ગેંગના સાગરિતોને ઝડપી પાડ્યાં છે, આ શખ્સોએ વાઘોડિયામાં એક, પાદરામાં બે, ભાદરવામાં બે,આણંદમાં એક તથા વડોદરા શહેરમાં 7 તેમજ ગોધરામાં બંધ મકાનના તાળા તોડી ચોરીને અંજામ આપ્યો હતો. આ ઈસમો પાસેથી ચોરી કરવાના સાધનો બાઇક, મોબાઇલ તેમજ રોકડ મળી 69,750નો મુદ્દામાલ કબજે કર્યો હતો.

10 લાખ સુધીની ચોરીની ઘટનાની કબુલાત: આ ત્રણેય ઈસમો ચોરી કરેલા ઘરેણાં સરખે ભાગે વહેંચી લેતા હતા. ચોરીના દાગીના સાવલીના સલીમ સોની, વડોદરા ફતેપુરાના અમિત પરિહાર તથા સરદાર એસ્ટેટના નિલેશ સોનીને વેચી દેતા હતા. આ ત્રણ ઈસમો પૈકી બે ઈસમોએ વાઘોડિયાના માડોધર ગામે ધનતેરસના તહેવારનો પણ લાભ ઉઠાવી રાત્રે બંધ મકાનને ટાર્ગેટ બનાવી ચોરીને અંજામ આપ્યો હતો. આ ઘટનાના સીસીટીવી ફૂટેજના આધારે સમગ્ર ભેદ ઉકેલાયો હતો. ઝડપાયેલા આરોપીઓ વિવિધ જગ્યાએ ચોરીના ગુનાની આશરે 10 લાખ સુધીની કબૂલાત આપી હતી.