Vadodara High Profile Rape Case: આરોપી અશોક જૈન પાલીતાણાથી ઝડપાયો

વડોદરાના ચકચારી બળાત્કાર કેસમાં ભાગેડુ આરોપી અશોક જૈનની ક્રાઈમ બ્રાંચે પાલિતાણાથી આજે વહેલી સવારે ધરપકડ કરી છે. આ શખ્સ ધર્મશાળામાં છુપાયો હતો અને સવારમાં પોલીસનો ભેટો થઇ જતા તેના હોશ ઉડી ગયા હતા. આ કેસના અન્ય આરોપી રાજુ ભટ્ટના 3 દિવસના રિમાન્ડ પૂરા થતાં આરોપીને જ્યુડિશિયલ કસ્ટડીમાં મોકલી આપવાનો આદેશ કર્યો હતો.

• બળાત્કાર કેસના આરોપી અશોક જૈનની ક્રાઈમ બ્રાંચે પાલિતાણાથી ધરપકડ કરી
• રાજુ ભટ્ટના રિમાન્ડ પૂરા જ્યુડિશિયલ કસ્ટડીમાં મોકલી આપવાનો આદેશ કર્યો
• અશોક જૈનને પકડી પાડવા માટે વડોદરા ક્રાઈમ બ્રાન્ચની પાંચ ટીમો બનાવી હતી

વડોદરાઃ શહેરના ગોત્રી વિસ્તારમાં બનેલા હાઈપ્રોફાઈલ રેપ કેસમાં ફરાર બંને મુખ્ય આરોપી પૈકી એક રાજુ ભટ્ટની ધરપકડ બાદ હવે અશોક જૈનની પણ ધરપકડ કરવામાં આવી છે. વડોદરા ક્રાઈમ બ્રાંચની ટીમે અશોક જૈનને પાલિતાણાથી ઝડપી પાડ્યો છે. અશોક જૈનની ધરપકડ સાથે ગોત્રી દુષ્કર્મ કેસના બંને મુખ્ય આરોપીઓ હાલ પોલીસની પકડમાં આવી ગયા છે. મહત્વનું છે કે રાજુ ભટ્ટના પકડાઈ ગયા બાદ કોઈપણ ભોગે અશોક જૈનને પકડી પાડવા માટે વડોદરા ક્રાઈમ બ્રાન્ચની પાંચ ટીમો બનાવીને રાજ્યના જુદા જુદા વિસ્તારોમાં કાર્યરત કરવામાં આવી હતી.

અશોક જૈનને ભત્રીજાના સંપર્કમાં રહેવું ભારે પડ્યું

અશોક જૈનને પકડી પાડવા માટે આ પાંચ ટીમો ઉપરાંત ડિજિટલ સર્વેલન્સનો પણ સહારો લેવામાં આવ્યો હતો. અને તેના પરિવાર તેમજ નજીકના વ્યક્તિઓના ફોનને સર્વેલન્સ પર રાખવામાં આવ્યા હતાં. જોકે ચાલાક અશોક જૈને ફરાર થયાના પહેલા દિવસથી જ પોતાનો મોબાઈલ બંધ રાખ્યો હતો. અને ફોનનો બિલકુલ પણ ઉપયોગ કરતો નહોતો. જોકે આ બધા વચ્ચે તે પોતાના ભત્રીજાના સતત સંપર્કમાં હતો, જેના આઘારે પોલીસ અશોક જૈન સુધી પહોંચી શકી છે. તેના ભત્રીજાની અટકાયત કરીને પૂછપરછ બાદ વડોદરા ક્રાઈમ બ્રાંચની ટીમે પાલિતાણામાં અશોક જૈન જ્યાં છુપાયો હતો ત્યાં દરોડો પાડીને ઝડપી પાડ્યો હતો. અને તેમજ હવે તને વડોદરા લાવવા માટે આગળની કાર્યવાહી કરવામાં આવી રહી છે.

પીડિતાને ન્યાય મળશે - હર્ષ સંઘવી

આ દરમિયાન ગૃહ રાજ્યપ્રઘાન હર્ષ સંઘવીએ જણાવ્યું કે, વડોદરા પોલીસ દ્વારા આ મામલે પહેલા દિવસથી અલગ અલગ ટીમો બનાવીને તમામ આરોપીઓને પકડી પાડવામાં સઘન પ્રયાસો કરવામાં આવી રહ્યા છે. ત્યારે આ કેસમાં બંને મુખ્ય આરોપીને હવે પકડી લેવામાં આવ્યા છે. હું આશ્વાસન આપવા માગું છું કે, પીડિતાને ન્યાય મળશે અને ખૂબ જ ચોક્કસાઈ પૂર્વક ચાર્જશીટ તૈયાર કરવામાં આવશે.

અશોક જૈનને પકડી પાડતાં મોટી સફળતા મળી

અશોક જૈનના વકીલ મારફત આગોતરા જામીન અરજી દાખલ કરવામાં આવી હતી. જેની સુનાવણી બાદ આવતીકાલે એટલે કે શુક્રવારે તેનો ચુકાદો આવવાનો હતો, ત્યારે એક જ દિવસ પહેલા પોલીસે અશોક જૈનને પકડી પાડતાં મોટી સફળતા મળી છે. મહત્વનું છે કે આ કેસમાં બે આરોપીઓ પૈકી પાવાગઢના મંદિરનો પુર્વ ટ્રસ્ટી રાજુ ભટ્ટ જુનાગઢથી ઝડપાયો હતો. જે બાદ ક્રાઈમ બ્રાન્ચ દ્વારા તેને કોર્ટમાં રજૂ કરીને 14 દિવસના રિમાન્ડ માગવામાં આવ્યા હતાં. જેમાં કોર્ટે પહેલા ત્રણ દિવસના રિમાન્ડ આપ્યા હતા જે બાદ ક્રાઈમ બ્રાન્ચે આ ત્રણ દિવસ પૂર્ણ થતાં ફરી વધુ રિમાન્ડ માંગતા કોર્ટે આરોપી રાજુ ભટ્ટના બીજા ત્રણ દિવસના રિમાન્ડ મંજૂર કર્યા હતા.

આ પણ વાંચો :Jammu and Kashmir: જમ્મુ-કાશ્મીરના ઇદગાહમાં આતંકવાદી હુમલો, બે શિક્ષકોની સ્કૂલમાં કરી હત્યા

આ પણ વાંચો : UP Road Accident : બારાબંકીમાં પ્રાઇવેટ બસ અને ટ્રકની ટક્કર, 9 ના મોત, અનેક લોકો ઘાયલ થયા