વડોદરા: શહેર નજીક આવેલા બાજવા ગામમાં રહેતા ચંદ્રેશભાઇ અરવિંદભાઇ શાહ(36) તેમજ તેના બે મિત્રો રાજુભાઇ અને નરેન્દ્રભાઇ સાવલી તાલુકામાં ખાનગી કંપનીમાં નોકરી કરે છે અને ત્રણેય મિત્રો રોજ કારમાં નોકરી ઉપર જતા હતા. નાઇટ શિફ્ટમાં નોકરી કરીને ત્રણેય મિત્રો કારમાં ઘર તરફ જઇ રહ્યા હતા. જે દરમિયાન વહેલી સવારે 5:30 વાગ્યાના સુમારે તેઓની કાર સીસવા ગામના તળાવમાં ખાબકી હતી. સાવલીથી નીકળેલી કારના ચાલક રાજુભાઇને સીસવા ગામ પાસે ઝોકું આવી જતાં રોડની બાજુમાં આવેલા પ્રોટેક્શન વોલ વિનાના તળાવમાં કાર ખાબકી હતી.
વડોદરા નજીક કાર ચાલકને ઝોકુ આવતા જતા કાર તળાવમાં ખાબકી, એકનું મોત તળાવમાં કાર ખાબકતા જ ગામના લોકો દોડી આવ્યા હતા અને બચાવ કામગીરી શરૂ કરી હતી. આ સાથે ફાયર બ્રિગેડને જાણ કરતા ટી.પી.-13 ફાયર બ્રિગેડના ફાયર સબ ઓફિસર ઓમ જાડેજા સ્ટાફ સાથે દોડી ગયા હતા અને બચાવ કામગીરી શરૂ કરી એક યુવાનને બચાવી લીધો હતો અને તળાવમાં ડૂબી ગયેલા ચંદ્રેશભાઇ અરવિંદભાઇ શાહના મૃતદેહને બહાર કાઢી હોસ્પિટલ ખાતે મોકલી આપ્યો હતો.
કારમાં સવાર ત્રણ યુવાન પૈકી કાર ચાલક રાજુભાઇ તરીને બહાર આવી ગયા હતા. જ્યારે બીજાને ગામ લોકોની મદદથી ફાયર બ્રિગેડની ટીમે બચાવી લીધો હતો. સીસવા ગામમાં લગ્ન પ્રસંગ હોવાથી ગામના લોકો જાગતા હતા. કાર તળાવમાં ખાબકતાં જ ગામ લોકો દોડી ગયા હતા અને તુરંત જ બચાવ કામગીરી સાથે ફાયર બ્રિગેડને જાણ કરતા બે યુવાનો આ ઘટનામાં બચી ગયા હતા. આ બનાવની જાણ તાલુકા પોલીસને થતાં પોલીસ પણ પહોંચી ગઇ હતી અને તાલુકા પોલીસે ગુનો નોંધી કાર્યવાહી હાથ ધરી છે.
