વડોદરા : મહાનગરપાલિકાની કચેરી બહાર પોસ્ટર સાથે દરજીપુરા ગામના લોકોએ વિરોધ પ્રદર્શન કરીને રસ્તા અને પાણીની સમસ્યા દૂર કરવા માટે તંત્રને જગાડવાનો પ્રયાસ કર્યો હતો. તે સાથે જ સત્તાધીશોને એકવાર ગામની મુલાકાત લઇ સમસ્યા જોઈને તેનું નિરાકરણ કરવાની માંગ કરી હતી.
ઉલ્લેખનીય છે કે, દરજીપુરા ગામને વડોદરામાં સમાવેશ બાદ 5 વર્ષનો સમય વીતી ગયો છે. તેમ છતાં પણ પ્રાથમિક સુવિધાના અભાવે સ્થાનિક રહીશોમાં પાલિકા વિરૂદ્ધ આક્રોશ જોવા મળી રહ્યો છે.
આ અંગે આમ આદમી પાર્ટીના વોર્ડ નં -4 ના પ્રમુખ યોગેન્દ્ર પરમારે જણાવ્યું હતું કે, દરજીપુરા ગામનો 2015 માં પાલિકામાં સમાવેશ કરવામાં આવ્યો હતો. પરંતુ હજી સુધી ગામમાં પ્રાથમિક સુવિધાઓનો અભાવ છે. જ્યારે હવે નવા 7 ગામને પાલિકામાં સમાવેશ કરવામાં આવ્યા છે. તેમને પણ પાલિકા સુવિધાઓ આપી શકવાની નથી અને તેમને પણ અન્યાય થશે.
